¹ Etanpi enuuluma phanaka ehako wanrimani wantthu omwiipiphini; khuuvo omoova Nluku nmeethonimwaya. ² Kontha anamwiimaaliha, yuupuwelaka wiira etanpitjaya khatjin'hala otjuwenliya, wala otanhifwiya. ³ Moolumwaaya ankhala otanpi ni owootha; yena khanpheela okhala ootjuwela wala oovara yooreera. ⁴ Arupaathi wankoriniwawe, nuupuwela mittala tjotanpi; yena ntthara nttala wootakhala, ni khan'huluwa yootakhala. ⁵ Nfentweenhu wokhweeli, Apwiya, onaaphiyeera wiirimu; ekhweeliinhu enaaphiyeera nmahutteni. ⁶ Essariyeenhu eri phanka myaako tjaNluku; Essariyeenhu eri phanka epahari yowinssa. Apwiya, Nhu n'nawaassunka atthu tjitjon'mo niinama. ⁷ Wooreeressa nfentweenhu wokhweeli, Nluku! Atthu antthawenla ntthuutji womapupheenhu. ⁸ Ayenatja anaahala ossukhuru niiyoolya yonpaaniwinhu; Nhu n'nawaahiya awuryaka murweenhu wooreeressa. ⁹ Kontha, emuro yeekumi erininhu; munthukonimwinhu, ninaahala woona nthuko. ¹⁰ Mwintjere nfentweenhu wayaale ooteene anootjuwelani niissariyeenhu, ooreera mirima. ¹¹ N'hin'hiye ootakhala nrima akiweelaka. N'hihiye ntata nantthu ootakhala nikikussaka. ¹² Vaavale anaahala omora atakhali; ayenatja ahomorelatja vathi ni khanphwanela ovuwa.