¹ Apwiya, anaakaakihera yaale ankoomolaniha; anawaawanana yaale ankiwanana. ² Nkusse mwaakiherweenhu mwankaani ni mwaakiherweenhu muulupale; nvuwe ni nkikhavihere. ³ Nkusse nttheereninhu niiyuumeenhu yookhottoni wayaale ankoomolaniha; n'himeerye eroohwaaka: Kimoopolyeenhu. ⁴ Woyaale anpheela okiiva yoonihatjiye ehaaya; anpheela okooniha oweryaa akhaleke owaanhiherana. ⁵ Akhaleke phanka nkhuttha ohoolo wophyoo, nlaikha naaPwiya naarweehaka ottayi. ⁶ Nttalaaya okhale wooripela ni woothenrya, nlaikha naaPwiya niwoomolanihaka. ⁷ Woohiitthu, ayenatja ahokitaphulela ntthavinaya; ayenatja ahothpelatja nlikitti ekumyaaka. ⁸ Okwanhuwatja waavare wowaakuvyaatja; nintthavi nitaphulatjalyaaya naavare tjahanriihaaya; amorele mon'mo, mookwanhuwatjanimwaya. ⁹ Massi mikinaahala otteeliya nootthapela woopolawimnhu. ¹⁰ Makhuvaaka ooteene anaahla wiira: Apwiya, tupani owoolikan'nani, naakussa oohuvihiya naatthu oolipa owaavikanatja ayenatja, ni noopola amassikhini ni oohiphwanela anpheela owinýera? ¹¹ Anamoona owootha anaahala okhumenla, yaayo an'nokuulumela woohikhala. ¹² Ankiliva yootakhala niyooreera, enkitjukulihatja. ¹³ Weeraaya awerenýaka, kihowara essaakho; kihaavekelela nimurwaaka wattheremaniwaka. ¹⁴ Kaari oomala phanka assihimaaka; kaahotjukula phanka anumwanaka. ¹⁵ Massi, wamoralyaaka, yaahotteeliya ni yaahothukumana; yaahokithukumanela, ni yaahokikhumenlatja, yaahokaatta woohikihiyenra. ¹⁶ Woohihissima yanakhala emotja, yaahokaattatja, yaahokitathuwelatja. ¹⁷ Pwiya, n'nohala okikhavihatjera eyaakhani? Moopole ekumyaaka wokhotto yookwanhula; moopole ekumyaaka mwaakharamu. ¹⁸ Vano, kinaahala woossukhurunu waatthuni entji; kinaahala wootthapelani waatthuni entji. ¹⁹ N'haahiye awananyaaka akiweelaka; n'haahiye arweehelaka mitekotjaya ohoolo tjoohikhala. ²⁰ Kontha ayena khaanuulumela nrettele, massi anaatthonkomanihera moolumo owootha atthu ankhala ninrettele nlaponiwihu. ²¹ Ayenatja an'nokuulumatjera tjootakhala, yiiraka: Meethweehu ahoona n'nho. ²² Nhu mun'noonaka, Apwiya, n'hikhale oomaala; Pwiya n'hikikhale ottayi. ²³ Nvuwe ni nkoopole; Nlukwaaka ni Pwiyaaka, moopole mwahaaka. ²⁴ Nkaakihe, Apwiya Nlukwaaka, mwaha wonfentweenhu, n'haahiye akithyaaka. ²⁵ N'haahiye yiiraka wanrimaniwaya: Nihophwanha yaapheeleehu. N'haahiye yiiraka: Nihonkussa. ²⁶ Yoonihatjiye ehaaya ni akhale ooliyaliya antthapenla ohaawawaka. Akhuneeliye niihaaya noohukhumwiya ankiruwana. ²⁷ Anpheela woopwaawaka akhuwele noohakalala nootteeliya; yuulume woohhiyenra: Attottopeliye Apwiya! Antteeliya mookhalani ratta mwanantekwaaya. ²⁸ Vano, kinaahala wuulumela essariyeenhu ni kinaahala owiipelai nihuku nooteene.