¹ Kinaahala waatthapela Apwiya owakathi wooteene; nttittimihweenhu khunkhuma wamalakuniwaka. ² Kinaahala waatthapela Apwiya! owootjyaa yiiwe ni atteeliye. ³ Mwaatthapele Apwiya nimiivano; nitthapele nkhayi ntjinanaya. ⁴ Kihaarweela Apwiya naayena ahokaakhula; ahokivaha otthema mwaha watjowoovatjaka. ⁵ Yaale anaaweha anaatteeliya ni khaanoonatja ehaaya. ⁶ Nlopwana oohuvihiya aahaakhuwela Apwiya ni yaahomwiiwa; Ayena yaahontaphulatja tjonkhumenla tjooteene. ⁷ Nlaikha naaPwiya ninaarukureerya yaale anoova ni anawaataphulatja. ⁸ Nlawihatje ni n'nawoona wiira Apwiya phooreera; ooreeriya ntthu naatthawenla. ⁹ Moove Apwiya, attakattiifwaaya,; khiivo enaahaleela yaale anoova. ¹⁰ Akharamu ooyevatja, enawaathwaaka eyoolya ni anaahuva niitala, massi yaale anaarweela Apwiya khiivo yooreera en'hala waahaleela. ¹¹ Nkawaani, assaanaaka, nkiwenle; kinaahala woossomihani tjihaleenhu woova Apwiya. ¹² Nthuni npheela okumi, ni hipheelaka okhala mahuku mentji wiira oone yooreera? ¹³ N'huulumatje yootakhala ni malakweenhu yuulumaka yowootha. ¹⁴ N'huluwe tjootakhala, ni npanke yooreera; nrweele nrettele ni nttharatthare. ¹⁵ Meetho aaPwiya ari naanassariya ni maarwaaya, anviriyana okhuwelawaya. ¹⁶ Ekhove yaaPwiya eri naale anpanka tjootakhala, akumihaka muupuwelelwaaya nlaponi. ¹⁷ Anassariya anakhuwela ni Apwiya anawiiwa, ni anawaataphulatja mikatjamihotjaya tjooteene. ¹⁸ Apwiya ari wakhiviru waatthu oohuvihiya mirimatjaya ni anawoopola oomora mun'nepani. ¹⁹ Mahuviho aanassariya phamentji, massi Apwiya anawoopola ooteene. ²⁰ Ayena anaakhalenla makhuvaaya; khanivo nimotjaaya nin'hala opwessiya. ²¹ Yootahala enamwiiva ootakhala; yaale anaanhokha anassariya anaahala alamuliya. ²² Apwiya anaaweha erooho yaatthwaaya; yaale anontthawenla, khaavo n'hala olamuliya.