¹ Ntteeliyeke waaPwiya, nhu anassariya! Phaassineene ooreera mirima woopheela onttottopela. ² Mwaavuwihe Apwiya, nitjooruma; mwiipeke etjipo ni tjooruma nimikhoyi khuumi. ³ Mwiipeleke etjipo tjophiyaaru; moopeke nootjuwelatja ni mwiipeke nooratta. ⁴ Kontha nuulumo naaPwiya nowookwa, ni tjin'varaaya tjooteene tjossariya. ⁵ Ayena anfenta ekhalelo tjooreera niissariya. Nlaponi tjinootjara ekhweeli tjaapwiya wowaataana. ⁶ Ninuulumo naaPwiya, erimo tjihunpiya niitthonttwaa tjooteene tjipankiye noovutjenla wonmwaanomwaya. ⁷ Ayena anaatakaniha maatji onpahari; mookhuruwela anaweessa mapurwaaya. ⁸ Elapo yooteene yooviye Apwiya; wakhula pinaatamu ontuniyani anthamale. ⁹ Kontha Ayena tjooteene ahuuluma ni tjihopankiya; Ayena yaanowuulumatja ni tjooteene aheessa opurwaaya. ¹⁰ Apwiya anawaateeliha waataana waatthu; ayena anawunteeliha miteko tjaatthu. ¹¹ Etthunelo yaaPwiya enaakhala woohimala, etthunelo tjowanrimaniwaya, womakhoto ooteene. ¹² Ooreeriya atthu kontha Nluku phaaPwiya, atthu Ayena yaathanlalyaaya phanka yoohalanaaya. ¹³ Apwiya an'weha anari wiirimu ni anawoona atthu ooteene. ¹⁴ Wonipuro ninkhalaaya, Ayena anawaaweha ankhala nlaponi. ¹⁵ Ayena, phanunpa mirimatjaya tjooteene, anaaweha tjoovaratjaya tjooteene. ¹⁶ Khaavo mwene noopwaa mwaha woowintjivana anakhotto; nakhotto khanoopwa mwaha wokurutjawe. ¹⁷ Ekhavalo woohiphwanela owuutthemani; enookhalanaru ekuru tjintji, khinoopola. ¹⁸ Nkawehani!Meetho aaPwiya ari naale anoova, wayaale ananriiha nfentwaaya wokhweeli, ¹⁹ wowiira ahikhwatje ni waakhaliha akumi mahuku otala. ²⁰ Hi ninanriiha Apwiya; Ayena nkhaviherweehu nimwaakiherweehu. ²¹ Mirimatjihu tjinaatteeliya waayena, kontha ninkhuluvela ntjinanaya ttakattiifu. ²² Nfentweenhu wokhweeli, Apwiya, okhale nihi, tjitjon'mo phanka tjinookhuluveleehuni.