¹ Ooreerihiya ntthu oolevenliya tjoovaratjawe, kontha etanpyaawe yookhuneeliya. ² Ooreerihiya ntthu oohikossa waaPwiya, ni n'nepa khuuvo wootha. ³ Kinakhanle oomaala, makhuvaaka yaakhala ootteetthyaa nihuku nooteene. ⁴ Kontha, othana noohiyu, ntataninhu naanokilemela; ekurwaaka yiira emalaka phanka owakathi wontjuwa. ⁵ Vano kihotjuwela etanpyaaka ohoolowinhu ni akivithale yookossaaka. Kaahuulumatja: Kinaahala olaphulula tjookossatjaka waaPwiya, ni Nhu n'hokilevenla etanpyaaka. ⁶ Phimaana, ooteene yaale arina nttittimiho ahaana wookokhorelani owakathi womahuviho muulupale. ⁷ Nhu mwamwinkitthwaaka; N'naahala okikhavihera nmahuvihoniwaka. N'naaahala okiwiihera etjipo tjootthema. ⁸ Kinaahala woofunttiha nttala woopheela otthara. Kinaahala woofunttiha ni meethwaaka. ⁹ Ohikhale phanka enama ehiniiwa, tjihiniiwa tjineettiheriya niikopo. ¹⁰ Namahanhuriha haana etjuku tjintji, massinnfento wokhweeli waaPwiya onawaakhuneela yaale anaakhuvela. ¹¹ Ntteeliyeke waaPwiya, ni mwiittottopeke, nhu anassariya; nkhuweleke nootteeliya ooteene ari oorera mirima.