¹ Kinawootthawenlani, Apwiya; n'hikhalakhale nkihiyaka kihukhumwiyaka. Nkoopole mwaha wossariyeenhu. ² Nkiiwe ni nkoopole wowaakuvyaatja! Nkhale mwala wontthawenlwaaka, nlipihero woopheela okoopola. ³ Kontha Nhu mwamwalaaka n mwanlipiherwaaka; mwaha wontjinaninhu, nikikhavihere ni nkeettihere. ⁴ Nkikumihe n'miryankhoni tjikitthonkomaniheralyaaya, kontha Nhu mwantthawelwaaka. ⁵ Nmtataniwinhu kinaakhuluvela n'nepaaka; n'naahala okikumiha, Apwiya, Nluku okhweeli. ⁶ Okikassiri yaale anaakokhorela anluku oohikhala; massi mi kinaakhuluvela Apwiya. ⁷ Kinaahala otthapa nootteeliya nmwaataananiwinhu, kontha Nhu n'hoona ohuvawaka, n'hotjuwela mahuviho owanrimaniwaka. ⁸ Khankivahenrale nmatatani mwaan'wananyaaka. Enhaatjaka n'heessa nipuro nooreera. ⁹ Nkoonele ekiriri, Apwiya, kontha kihohuva; meethwaaka anaatjukula, eroohwaaka niirutthwaaka. ¹⁰ Kontha ekumyaaka ehotjyaa otjukulatja niiyaakhatjaka, tjowuulumiya. Ekurwaaka enaassirikan'na mwaha weetanpyaaka ni makhuvaaka aneera amalaka. ¹¹ Mwaha waawananyaaka ooteene, atthu anaakitanhifu; assimwaattaman'nuaaka anaatuthuwa ni tjookikhumenlatjaka, ni akintjuwela ooteene anaakoova. Anaakitthawa yakoona nphironi. ¹² Kinaaliyaliya phanka ntthu ookhwa, yooyo hinuupuwenliya nintthu. Kiri phanka mwaapu woophyaa. ¹³ Kinawiiwa moolumo mentji, moolumo owoopiha omiphantte tjooteene, phanka, nkhayi, akikhuwelaka. Ayena anpheela okiiva. ¹⁴ Massi mi kinookhuluvelani Nhu, Apwiya: Mhu mwaNlukwaaka. ¹⁵ Mweettelwaaka ori nmatataniwinhu. Nkikumihe mwaawananyaaka ni mwayaale ankoomolaniha. ¹⁶ Nreerihe ekhoveenhu wanantekweenhu; nkoopole mwaha wonfentweenhu wokhweeli. ¹⁷ N'hikihiye kihuvihiyaka, Apwiya, kontha kinawookhuwelani! Ahuvihiye atthu omwiipiphini. Akhale oomaala nkhapureni. ¹⁸ Akhale oomaalihiya malaku aatthu owootha, an'muulumela ntthu ossariya moolumo oohikhala, otanhifu noohiwatja. ¹⁹ Otthunawihu phumuulupale, onaassunkereenhu yaale anoohissimwani; n'nawaakhavihera ohoolo waassaana aatthu, yaale anootthawenlani. ²⁰ N'nikhukuniwinhu, n'nawaassunka mwatjoovara tjaatthu. Nhu n'nawaakhavihera, n'nikhukuni, mwatjowuulumatjiya. ²¹ Oottottopeliya akhale Apwiya, kontha ayena ahothoonhera nfentwaaya wowaataana owakathi waaryaaka opooma. ²² Kaanowaakuvatjaru: Kihofuttiya meethoniwinhu, mwaaniiwa ovekelawaka wookhuwelaakani. ²³ Mwaafente Apwiya, anonttharenla ooteene. Apwiya mwaakhavihere owaamini, massi mwaahukhumu woomalela owiikukhuuliha. ²⁴ Nkhale oolipa ni ookhuluvela, ooteene nhu n'naariiha nkhavihero waaPwiya.