¹ Apwiya nthukwaaka ni woopwaawaka; kin'hala omoova pani? Apwiya ntthawelo weekumyaaka; tupani n'hala okoopopiha? ² Atakhali wawaalyaaya pheela okussa ekumyaaka, ankittharatthara naawananyaaka phatherekuwale ni ahomora. ³ Anakhotto anookilukamaru, nrimaaka khun'hala woova; hata apheele okiwanana, hata tjitjon'mo kinaahala okhala ookhuluvela. ⁴ Etthu emotja kinawaalepela Apwiya ni yeeyo kinaahala orweela: wiira kikhale enupa yaaPwiya mahuku ooteene eekumyaaka, wiira koone oreera waaPwiya noohala npaanimwaya. ⁵ Kontha nihuku nomahuviho, Ayena anaahala okivitha n'nikhukunimwaya; Ayena anaahala okivitha n'hina moheemaaya. Ayena anaahala okeessa watjulu mwala! ⁶ Vano, murwaaka on'hala okhala watjulu waawanani ankirukureerya. Nootteeliya, kinaahala ovaha okuttho n'heemaniwinhu; kinaahala wiipa ni waavuwiha Apwiya! ⁷ Mwiiwe, Apwiya, ntjuunaka kookhuwelakani! Nkoonele ekiriri ni nkaakhule. ⁸ Nrimaaka onawuulumelani: Owe waryaaka! Wariinhu, Apwiya, kinaahala woorweelani! ⁹ N'hikivithe ekhoveenhu; n'hinkhotte nantekweenhu noorussiya; Nhu mwankhaviherwaaka; n'hikihiye wala n'hikitthawe, Nluku owoopwaawaka! ¹⁰ Hata athumwanaka naanumwanaka wankitthawaaya, Apwiya anaahala okikussa. ¹¹ Nkifunttihe nttaleenhu, Apwiya! Nkeettihere nttala wooreera mwaha waawananyaaka. ¹² N'hikivahenre mootthunani tjaawananyaaka, kontha ankuulumelaka anamoona oohikhala, apheelaka okipanka yootakhala. ¹³ Yaahala okiraneela essiyani kihiwaaminale Apwiya elapo yaatthu? ¹⁴ Mwanriihe Apwiya! Nkhale oolipa wanrimaniwinhu! Mwanriihe Apwiya!