¹ Kinawoovahenrani eroohwaaka, Apwiya! ² Nlukwaaka, kinookhuluvelani Nhu. N'hikihiye kikhalaka oothanhiya, hata awananyaaka waniittottopaaya mwaha wawaka. ³ Hikhale n'motjaaya wayaale an'waariihani akhalaka ootanhifwiya, massi akhaleke owoonihatjiya ehaaya yaale anvara tjootakhala, woohikossiyeetthu. ⁴ Nkitjuwelihe mittalatjinhu, Apwiya; nkiitthutjihe tjoovaratjinhu. ⁵ Nkeettihere ekhweeliinhu ni nkifunttihe, kontha Nhu mwaNluku owoopwaawaka; wanhu ohaavo wanriiha owakathi wooteene. ⁶ Muupuwele, Apwiya, mitekotjinhu tjoothunku nootthunawinhu wowaataana, kontha ayenatja ahaavo. ⁷ N'huupuwele tjookossatjaka wala tjoovaraaka kinari nanttonpe; nkuupuwele mwaha wowaataana, Apwiya, mwaha wonfentweenhu. ⁸ Apwiya phooreera ni ossariya; phimaana, Ayena anawaahulela mittala atthu ookossa. ⁹ Ayena anaaweettiheraowiiyeviha woyeele eri yossariya ni anawaatjuweliha nttalaaya. ¹⁰ Mittala tjooteene tjaaPwiya tjonfento mwintji ni weekhweeli wayaale anssunka waataanawaya naanamoonaaya. ¹¹ Mwaha wonfento nontjinaninhu, Apwiya, nkilevenle tjookossatjaka, tjuulupale tjinene! ¹² Tupani nlopwana n'woova Apwiya? Apwiya anaahala omwiitthutjiha nttala woopheela othanla. ¹³ Yena naahala okhala wowanriiha, naassimutjaawe anaahala okhala nlaponi. ¹⁴ Opatthani waaPwiya wayaale anoova; Ayena anawaatjuweliha waataanawaya. ¹⁵ Meethwaaka ankhala waaPwiya, kontha Ayena anaahala okumiha enhaatjaka munryankhoni. ¹⁶ Nkihokoleele ni nkoonele ekiriri, kontha kiri veekha ni oossanka. ¹⁷ Mahuviho owanrimaniwaka anawintjenrya; nkikumihe n'mahuvihoni! ¹⁸ N'wehe ohaawawaka ni mahuvihwaaka; nkilevenle tjookossatjaka tjooteene. ¹⁹ Awananyaaka entji; ayenatja anaakithanhatja ventji. ²⁰ Nkhavihere ekumyaaka ni nkaapule; n'hikihiye kihuvihiyaka, kontha Nhu kinawootthawenlani! ²¹ Otthuna nookhalelaokikhavihere, kontha phinhu kin'wanriihani. ²² Nluku, nmoopole Israel nimikatjamihotjawe!