¹ Mwene niittottopa nkurunimwihu, Apwiya! Naavuwiha ventji tjinene woopolawinhu! ² N'honvaha tjootthuna tjowanrimaniwawe ni khamunkhottenle yoovekelaawe. ³ N'honreeriha ventji; n'honwariha ekhara nmurumwawe yowooru. ⁴ Yena hoolepelani ekumi ni Nhu n'honvaha; n'honvaha mahuku mentji eekumi oohimala ni oohimala. ⁵ Waaryawawe wuulupale mwaha wootthemawinhu; n'honkhaliha thatjiri ni okuru. ⁶ Yena n'honreeriha woohimala ni ohakalala ohoolowinhu. ⁷ Kontha mwene naakhuluvela Apwiya; mwaha wonfento wokhweeli wowiirimu ohinhala omalatho. ⁸ Ntataninhu ninaahala waaphwanha awananiinhu; Ntataninhu noolopwana ninaahala waaphwanha ooteene yaale anoothanhani. ⁹ Owakathi woorussiyawinhu, n'nohala waapaha nimooro. Apwiya n'nohala waakussa noorussiyawinhu, ni mooro onaahaa waapaha. ¹⁰ N'naahala waamaliha assaaneenhu ovathi; ayenatja khan'hala okhalana atthu owaattharenla . ¹¹ Ayenatja yoopankani yootakhala, khan'hala ophwanela, ¹² kontha n'naahala waahokolossera tootho; n'naahala waathoonhera nreko. ¹³ Nttottopeliye, Apwiya, nkurunimwinhu! Ninaahala wiipa ni ninaahala ovuwia ekurwiinhu.