¹ Nlukwaaka, Nlukwaaka, nkitthawenleni? Essiyani nkikhalaka ottayi wookoopola ni n'hiiwaka okhuwelawaka? ² Nlukwaaka, inaakhuwela othana, massi Nhu khan'nokiiwa; ni ohiyu akin'maala, massi akinphwanha otaphuwatja. ³ Tjitjon'mo, Nhu mwattakattiifu; mwene owiisrael. ⁴ Amutjiihu yaahookhuluvelani; yaahookhuluvelani, ni mwaahowoopolatja. ⁵ Yaahookhuwelani, ni mwaahaarweelatja. Yaahookhuluvelani, ni yaanophwanha yaapheelaaya. ⁶ Massi miivano akinakhala kintthu; kinaatanhifwiya naatthu. ⁷ Yaale ooteene ankiweha anaakitarawatja; anaakiruwanatja; anaatukutha murutjaya yiiraka: ⁸ Yena naakhuluvela Apwiya; wiira Apwiya amoopole. Wiira Yena antaphulatje, kontha nawiittottopela. ⁹ Kontha Nhu nkikumihale nmirimani; mwaahokikhavihera waaryaaka nmirimani mwaanumwanaka. ¹⁰ Eyareliywaaka kivahenriye nmatataniwinhu; Nhu mwaNlukwaaka nen'ne waaryaaka nmirimani mwaanumwanaka! ¹¹ N'hikikhale ottayi, kontha mirikoriko tjiri wakhiviru; khaavo ookikhavihera. ¹² Awananyaaka entji ankoomolaniha; oolipa entji ahokirukureerya. ¹³ Ayenatja anaakinhakula phanka kharamu oopheela onvara etthu. ¹⁴ Kinaamwaressiya phanka maatji, ni makhuvaaka ooteene ahohiyana. Nrimaaka onoothuluwa. ¹⁵ Ekurutjaka tjihuuma phanka nluku; nliminaka nhokuuma mwaano. Nhu n'hokirihela ottayi wontthupi nowookhwani. ¹⁶ Elapwa tjihokirukureerya, kihorukureeriya naatthu ootakhala; ayenatja ahottenlatja matataaka ninhaatjaka. ¹⁷ Kinawaalikela makhuvaaka ooteene. Ayenatja anaakiweha nookitanhifwatja. ¹⁸ Anaakawelanatja ekuwotjaka; ahorihatja eparakha nkuwonimwaka. ¹⁹ N'hikhale ottayi, Apwiya; sontte, nkikhavihatjere wowaakuvya, ekurwaaka! ²⁰ Moopole erohwaaka nkatanani niikumyaaka nkharaminu ontakhwani. ²¹ Nkoopole mwaano mokhramu; nkikumihe n'nhakani momope tjontakhwani. ²² Kihokhuwela ntjinaninhu mwaassihimaaka; eriyari waatthu oothukumana kinaahala wookhuwelani. ²³ Nhu n'nowoova Apwiya, munttottopele! Atthu ooteene aJaco, munttittimihe! N'moove, ooteenetjinhu, atthu owiisrael! ²⁴ Yena khantanhifwale wala khan'hanhurihale oohuva; Apwiya khaavithale ekhovyaaya; owakathi oohuvoole wankhuwenlyaaya, ayena yaahomwiiwa. ²⁵ Wiipawaka onkookhala wanhu waatthuni; kinaahala oviriha tjookhuluveihatjaka ohoolo wayaale an'woovani. ²⁶ Atthu oohuva anaahala olya, yaale anaarweela Apwiya anaahala otthapa. Mirimatjaya tjihale woohimalatho. ²⁷ Atthu ooteene ovathi anaahala wuupuwela ni anaahala waakulela waaPwiya. Atthu ooteene anaahala wookokhorelani. ²⁸ Kontha omwene phuwaaPwiya; Ayena phan'hoolela elapo tjooteene. ²⁹ Atthu ooteene ovathi anaahala otthapenla essukuhuulu ni anaahala onkokhorela; akhwale ooteene, ooteene yaale ananriiha okhwa, anaahala onkokhorela. ³⁰ Nikhoto nin'hala owa ninaahala onkokhorela; ni ayenatja anaahala ohimeerya nikhoto in'hala owaatho mwaha waaPwiya. ³¹ Ayenatja anaahala owa ni anaahala okhuwela essaariyeenhu; anaahala waattonkela itekotjinhu yaale ahinayariya.