¹ Erimu tjinaakhuwela waarya waNluku, ni tjinawoonya mirekotjawe. ² Khula nihuku miteko tjinawiiranyaa; khula ohiyu onawoonyaa otjuwelawawe. ³ Khanivo ntjuu wala moolumo, matjuaawe khaaniiwanyaa. ⁴ Mitthakatjawe, tjinawiiwanyaa elapo yooteene ni mitekotjawe, npakha nvirale etuniya. Nluku hontthonkomaniha heema wiira akhalelatje ntjuwa. ⁵ Ntjuwa niri phanka ntheli akhumaka onkhalaawe ni phanka nlopwana oolipa iittottopaka niikwahaawe. ⁶ Ntjuwa ninkhuma nphantte elapo onphwanhaaya erimu ni ninaavikana erimu nlootho ninlootho nikhwaawe, ovihawaya khun'mala. ⁷ Ekettelo Yaapwiya yokhweeli ni enaamaaliha nrima; namoona aaPwiya nantjuweliha ntthu. ⁸ Ekano tjaaPwiya phitjooreera ni tjinaatteeliha nrima; tjooruma tjaaPwiya phitjooreera ni tjinawaana nthuko n'meethoni. ⁹ Ekhalelo tjaaPwiya phitjooreera ni yoolipa; tjookhuwela tjaaPwiya tjokhweeli ni tjowookwaa! ¹⁰ Tjofaita tjinene woovikana ewooru, tjootjiva ovikana oravo. ¹¹ Kweeli, mwaha wotjen'nho nrumeyi nawiitaphula; mowiwenla ehaavo etthuvo yuulupale. ¹² Tupani n'hala woona tjookossatjawe? Nkirapihe mwatjookossa tjiipithale. ¹³ Muntaphulatje nrumeyiinhu mwatjookossatjawe, n'hihiye ekihoolelaka. Kinaahala okhala okhweeli ni kinaahala oohiira etthu mwatjoovaratjaka. ¹⁴ Moolumo on'mwaanomwaka ni muupuwelelo owanrimaniwaka akhale owaaminiya n'meethoniwinhu, Apwiya, nkhaliherwaaka.