¹ Mikinawoofentani, Apwiya, mweekurwaaka. ² Apwiya ekurutjaka, nlipiherwaaka, yaayo paassi phari nlipiherwaaka; nlukwaaka phiikurwaaka; Yooyo phintthawenlwaaka. Yena mwaakiherwaaka, ekuru yowoopwaawaka ni nipuronaka nonkhuluvelo. ³ Kinaahala waakhuwela Apwiya, akhanle phanphwanela okhuweliya, ni kinaahala woopwaa mwaawananyaaka. ⁴ Mikhoyi tjowuukhwani tjinaahala okitthuka, onholo tjowoorimeela tjihokoopopiha. ⁵ Mikhoyi tjonkhapure tjihokivilikela; miryakho tjowookhwani tjihokivariha. ⁶ Moohaawaniwaka, kihaakhuwela Apwiya; kihokhuwela mwaha wonkhavihero waNlukwaaka. Npaanimwaya, ayena ahiiwa ntjuunaka; okhuwelawaka woolepela ohophiya wariinhu, ohophiya n'maaruniwinhu. ⁷ Vano, etthaya yaahopittikuwatja, ni ephattuwelo tjomyaako tjaahokumihatjiya noorussiya waNluku. ⁸ Mwiissi waahokhuma nphulanimwaya; mooro waahokhuma mwaanomwaya; ni waahoparihela tjitthu. ⁹ Ayena yaahohula erimu ni yaahokhuruwa, ni oripela tjinene waari vathi enhaatjaya. ¹⁰ Ayena yaahothukumaniha ni yaahovava, ni mapupha ophyoo. ¹¹ Ayena yaahokhaliha epiphi heema n'motja woorukureeryawaya, yaahopanka ntjoko womahutte wopula wiirimu. ¹² Maluku moolupale ni mooro waahomora ohoolowawe. ¹³ Ntju naaPwiya naakhala phanka etari! Ntju nowiirimu naahokhuwela. ¹⁴ Ayena yaahoriha mattheeryaaya ni yaahaaphwanha awananyaaya; yaahaakawanihatja. ¹⁵ Vano, okhuwelawaya wokhotto, Apwiya, ni ovukhenliya wophyoo wonphulaniwaya, ephattuwelo tjomaatji tjaahokhumenla ni ephattuwelo tjotuniya tjaahokhuma. ¹⁶ Ayena yaahotaphula ntata ni yaahokivarenla! Ayena ahokikumiha nmaatjini. ¹⁷ Ni ahokikumiha nkuruni mwaawananyaaka, wayaale yahaakipheela, yaari oolipa tjinene wokivikana. ¹⁸ Ayenatja yaahokiweela mahuku omahuvihwaaka, massi Apwiya yaari mwaakihwaaka! ¹⁹ Ayena yaahokeessa nipuro nuulupale nootthukuwa. Ayena ahokoopola, kontha yaahotjiveliya nimiivano. ²⁰ Apwiya yaahokitthuvela mwaha weekhalelwaaka; Ayena yaahokitaphulatja, kontha matataaka yaari ooreeratja. ²¹ Kaahokhala munttalani mwaaPwiya ni akintthawatthawale Nlukwaaka. ²² Ekettelotjaya tjooteene tjossariya tjiri nimiivano. Ni tjoorumatjaya, akihuluwale. ²³ Khiivo epankalyaaka ohoolowaya kaari ottayi wotanpi. ²⁴ Apwiya ahokitaphulatja mwaha weekhalelwaaka, kontha matataaka yaari ooreera vameethoniwaya. ²⁵ Wayaale on'nema, Nhu n'nawiithoonhera n'nema; ntthu nkumi, n'nanthoonhera okumi. ²⁶ Wayoole ooreera, n'nanthoonhera okumi; massi Nhu n'nomwaakhula ootakhala nrima. ²⁷ Kontha Nhu n'nomoopola oohuva, massi n'naakurussa yaale arina meetho owiitjoona. ²⁸ Nhu mwanthukwaaka; Apwiya, Nlukwaaka, n'nomwaleela epiphyaaka. ²⁹ Kontha, ninhu, kinaalapuwa mikatjamiho; niNlukwaaka, kinaatupha tjowoopiha. ³⁰ Nluku, nttalaawe womaana. Nuulumo naaPwiya phinooreera! Yena mwinkittho wayaale anontthawenla. ³¹ Tupani Nluku woohikhala Apwiya? Mwala tupani woohikhala Nluku? ³² Nluku yooyo phinkivaha ekuru; Ayena nassariya phin'mweessaaya munttalaniwaya. ³³ Ayena anaakaakuvihatja ni anaakeessa otjulu! ³⁴ Ayena anaakifunttiha owana ni myoonotjaka wiira kikhune nookhala phanka nreko noporontje. ³⁵ Nhu n'hokivaha nlipihero wowoopwaaniwinhu. Ntataninhu noolopwana nin'nikiliha ni n'naakissonttela. ³⁶ N'hokipheelela nipuro nowookwaa wiira keesse enhaatjaka, wowiira ayenatja ahitherekuwe. ³⁷ Kihoomolaniha awananyaaka ni kihaavara; ni akihokolyaale npakha wakwanhulatjiyaaya. ³⁸ Kihowuntakatja npakha woolwaanalyaaya wunwa; ayenatja yaamorelatjale vathi enhaatjaka. ³⁹ Kontha Nhu mwaahokitjaliha ekuru tjookhottoni; n'haatthema ooteene yaale yaakiweheeha. ⁴⁰ N'hokivaha essiko yaawananyaaka; kihuntakatja yahaakipheela. ⁴¹ Ayenatja yaanowiihanatja atthu wiira yaakiheriye massi khaavo aawa; ayenatja yaahowiihanatja Apwiya massi khayaakhulale. ⁴² Kahaakhalihatja ooyevatja, phanka ntthupi nphyoo; kaahaarihelatja ota phanka etthu yoohinteko. ⁴³ N'hpkikumiha n'manhakunhakuni mwaatthu. N'hokikhaliha n'hooleli aatthu. Atthu yahaatjuwelaaka yaahokihissimu. ⁴⁴ Tjitjon'mo tjaakiiwaaya, ayenatja yaaanokiiwelela; akhopela yaahokhanhenriya okikhorela. ⁴⁵ Akhopela attettemelaka, yaahokhuma mwiipithalyaaya. ⁴⁶ Apwiya ahaavo! Oottottopeliya okhale mwalaaka! Nluku moopolyaaka avuwihiye! ⁴⁷ Ola Nluku naattarussa atthu oovara miteko tjootakhala, wamiivano an'nokeettihera elapo. ⁴⁸ Kihotaphulatjiya mwaawananyaaka! Weekhweeli, Nhu n'nokoopola mwaha wayaale yaakiweheeha! Nhu n'hokoopola mwaatthu ootakhala. ⁴⁹ Phimaana, kinaahala woovahani mahala, Apwiya, ohoolo waatthu; kinaahala wiipa etjipo mwantjinaninhu! ⁵⁰ Nluku naakivaha otthema ninaakithoonhera waataanawawe: wa Davi naatthu anonttharenla, womahuku ooteene.