¹ Nviriyane khuwelawaka wossariya, Apwiya; nreryee marweenhu woovekelawaka wonkhavihero! Mwiiwe mavekelwaaka, ankhuma nmalakuni mokhweeli. ² Mavekelwaaka akhale wariinhu; meethweenhu yoone yooreera! ³ Mwawehaweha nrimaaka, mwakiweela ohiyu wooteene, n'naahala okireeriha ni khamun'hala okiphwanhana yootakhala hata emotja; malakwaaka khan'hala wootha. ⁴ Tjoovara tjaathu, ni moolumo on'mwaanowinhu, yaanaakikhaliha ottayi tjomittala tjaatthu ootakhala mirima. ⁵ Weettawaka waahokhala woolipa nmittalaniwinhu; enhaatjaka khatjirimeelale. ⁶ Kin'nookhuwelani, Nluku, kontha mun'nokaakhula; nkireryeele marweenhu ni nkiwenle kuulumaka. ⁷ Nthoonhere, weenan'na yooreera, waataanawinhu; tinhu n'noopola nintataninhu noolopwana yaale anootthawenlani mwaawananyaaya. ⁸ Nkikhavihere phanka mwanthiyana on'meethoniwinhu; nkivithe muntthuutjini womapupheenhu, ⁹ mwaatakhali ankoomolaniha, mwaawanani ankirukureerya. ¹⁰ Ayenatja khaanakiriri nintthu; malakwaaya anuuluma tjitthu tjoohikhala. ¹¹ Ayenatja ankittiyenla mun'viraaka, anaakiwehessessa wiira akimorihe. ¹² Ankhalatja phanka kharamu apheelaka onvara ntthu, phanka kharamu nthurumela mowiipithyaa. ¹³ Nvuwe Apwiya, mwaakhumenlatje! Mwaamorissatje! Niikataneenhu, nkumihe ekumyaaka mwaatthu ootakhala mirima! ¹⁴ Nintataninhu, Apwiya nkitaphulatje mwaatthu ontuniyani, kontha yoohalana eri yeekumiyeela! Mwaatjalihatje tjooteene tjaahiyeraleenhu; wiira assaanaaya arupale mihakhutjaya, ni yaahiyere assaanaaya enkoohala. ¹⁵ Kinaahala owoonani. Kakwavale, kinaahala otteeliya mwaha woowoonani.