¹ Nluku okikhavihatjere, kontha Nhu mwantthawelwaaka. ² Kin'wiirela Apwiya: Nhu mwaaPwiyaaka. Tjirinaaka tjooteene tjooreera tjinkhuma wanhu. ³ Hata naatthu ttakattiifu ari vathi, ekupaleelwaaka yooteene eri naayenatja. ⁴ Anaarweela anluku akhwaawe anintjenra ohaawawaya. Akin'hala omwaressa ephome mwanlukwaaya, wala akin'hala ossipa matjinaaya wamalakuniwaka. ⁵ Apwiya, Nhu mwanipuronaka noothanliya ni munkireeriha; Nhu mun'neettihera mahukwaaka. ⁶ Tjihokimorela tjitthu mapuro ooreera; weekhweeli yoohiyeriyaaka, yomaana. ⁷ Kinaahala waatthapela Apwiya, ankilaka; npakha ohiyu, muupuwelelwaaka onaakilaka. ⁸ Owakathi wooteene, kinkhala naaPwiya ohoolowaka; akin'hala orimeela, kontha ayena ankhala moonwaaka nlopwana. ⁹ Phimaana, nrimaaka onaatteeliya ni n'nepaaka onaatthapa. Weekhweeli, kinaakhala oolipa. ¹⁰ Kontha khamun'hala ohiya nrimaaka nkhapure, wala khamun'hala ontthuniha mwaaminiinhu avaraka yoohikhala. ¹¹ Nhu n'naakifunttiha nttala weekumi; ohoolowinhu, ohaavo ohakalala ventji; moonweenhu nlopwana, ohaavo opuha woohimala.