¹ Haleluya! Mwiipele Apwiya owiirimu. ² Mwiipele, malaikhaaya ooteene, mwiipele anakhottwaaya ooteene. ³ Mwiipele, ntjuwa nimweeri; mwiipele, etthontto tjooteene. ⁴ Mwiipele, erimu; nimaatji ari vatjulu erimu. ⁵ Mwiipele ntjina naApwiya, kontha Ayena phiiralyaaya, ni tjihunpiya. ⁶ Ayena akhalihale womahuku ooteene; Ayena ahokurussa ekettelo ehin'malatho. ⁷ Mwiipele Apwiya, atthu ooteene, tjitthu tjon'maatjini ni tjooteene tjen'nhe tjinkhala mapuro owinssa, ⁸ mooro nimaluku, mahutte, ephyoo tjuulupale tjikhale tjowiiwelela nuulumoninhu, ⁹ myaako nimapuro owiipithyaa ooteene, miri tjowiima nimiri tjikhwaawe, ¹⁰ enama tjontakhwani nitjovate, wakhula yunpiye eneetta vathi niinuni, ¹¹ mamwene ovathi niilapo tjooteene, akhulupale naatthu an'hoolela ooteene, ¹² mittonpe naassithiyana, mahumu naanamwane. ¹³ Ooteenetjinhu, mwiipele ntjina naApwiya, kontha ntjinanaya paassi phinphwanela ni waaryawaya ohomwareela elapo yooteene ni wiirimu. ¹⁴ Ayena ahaavaha otthema atthwaaya, woowiipela attakattiifwaaya, atthu owiisrael, atthu owanrimaniwaya. Mwiipele Apwiya!