¹ Mwiipele Apwiya, kontha phiyooreera omwiipela etjipo Nlukweehu; phinphwanela omwiipela. ² Apwiya ananteka Jerusalem ni anawaathukumnaniha oovavarya owiisrael. ³ Ayena anaavoniha mirima tjookukurya noovoniha makhwattaaya. ⁴ Ayena anawaalikela etthontto noovaha matjina tjooteene. ⁵ Muulupale Nlukweehu ni omiiriirya; otjuwelatjawawe khunlikiya. ⁶ Apwiya anawaakhavihera oohuva; Ayena anawaarihela vathi oovavaryaa. ⁷ Mwiipele Apwiya niitjipo tjomahala; n'mwiipele etjipo Nluku nitjooruma. ⁸ Ayena anaakhuneela erimu nimahutte ni anaatthonkomaniha epula, yuunuwihaka malassi n'mamyaakoni. ⁹ Ayena anaaliha enama ni assaana aanakhuku, yunlakavale. ¹⁰ Ayena khaanoona ekuru nkavaloni; Ayena khan'moona olipa ntthu. ¹¹ Apwiya anaapheela yaale anaattittimiha, ananriiha nfebtwaaya. ¹² Mwiipele Apwiya, Jerusalem! Mwiipele Apwiya, Siao! ¹³ Ayena anaalipihera eparattatta tjomikhoratjinhu; Ayena anawaareeriha anamwane anaakhalaneenhu; ¹⁴ Ayena anaawaana nrettele n'mwiinanoniwinhu; Ayena anawoovahani eyoolya yomaana. ¹⁵ Ayena anaakurussela tjoorumatjaya elapo yovathi; Nuulumonaya ninawaakuvatja. ¹⁶ Ayena anaakhuneela etthaya; anaavavaressa ntthupu phanka ettuura. ¹⁷ Ayena anaamorossa epula yomaluku. Tupani n'hala ovilela oririya onkurussaaya. ¹⁸ Ayena anaakurussa nuulumonaya ni anaamwaressela; Ayena anaawaana ephyoo ni maatji phweeneenhaka. ¹⁹ Ayena ahokhuwela nuulumonaya waJaco, ekettelotjaya ni tjoorumatjaya tjossariya wiisrael. ²⁰ Ayena khaapankale tjo'mo niilapo ekhwaawe ni yaayo khiivo entjuwelaaya mwaha wokettelotjaya. Mwiipele Apwiya!