Ekapiitulo 146
1
Oottottopeliya akhale Apwiya. Nrimaaka, owiipele Apwiya.
2
Kakhala nkumi kinaahala owiipela Apwiya; kinaahala omwiipela etjipo Nlukwaaka kakhalaru.
3
N'haakhuluvele atthu, wayaayo khuuvo woopwaa.
4
Ekumi yantthu yamalavale, yena nkhalatho ntthupi; nihuku nen'no, mitekotjawe tjinaamala.
5
Ooreeriya phuule nkookhala niNluku aJaco phanka onttiyaawe, yooyo nanriiha Apwiya, Nlukwaawe.
6
Apwiya ahunpa erimu niitthaya, epahari nitjitthu tjooteene tjirinaaya; Naayena nfentwaaya khun'malatho.
7
Ayena anawaalamula niissariya oohuva ni anawaaliha oovoliya. Apwiya anawaatthukula ootthukiya;
8
Apwiya anaatthukula meetho aatthu oohoona; Apwiya anawaakhavihera yaale yaahuvihiya; Apwiya anaafenta atthu ossariya.
9
Apwiya anawaakhavihera atthu ookhuma ottayi; Ayena anaakhavihera ekhwaatjuni naanan'khweli; Ayena anaaweheeha anamatankanha.
10
Apwiya omwenyaaya khun'malatho; Nlukweenhu, oSiao, naahala ohoolela makhoto ooteene. Mwiipele Apwiya.