¹ Kinaahala woovuwihani, Nlukwaaka, Mwenyaaka; kinaahala ottottopela ntjinaninhu mahuku ooteene. ² Kinaahala woottottopelani mahuku ooteene ni kinaahala okokhorela ntjinaninhu mahuku ooteene. ³ Muulupale Nluku ni oophwanela ovuwihiya. ⁴ Nikhoto nimotja ninaahala ovuwiha tjoovaratjinhu ni nikhwaawe ninaahala okhuwela mitekotjinhu tjokuru. ⁵ Kinaahala okhalela nphantte waaryawinhu ni mitekotjinhu tjomiiriirya. ⁶ Tjen'nho tjinaahala okhuwela tjoovaratjinhu, nimi kinaahala okhuwela eyuulupaleenhu. ⁷ Anaahala okhuwela, ni anaahala wiipela essariyeenhu. ⁸ Apwiya phomahala ni okirri, khanpitja orussiya ni nfentwaaya mwintji. ⁹ Apwiya phooreera aatthu ooteene; tjoovaratjaya tjkiriri tjinawoonyaa n'mitekonimwaya. ¹⁰ Yunpaleenhu yooteene enaahala woovuwihani, Apwiya; anoottharenlani anaahala woottottopelani. ¹¹ Anoottharenlani anaahala olalyaa waaryawinhu, ni anaahala wuulumela ekurutjinhu. ¹² Anaahala waatjuweliha atthu miteko tjaNluku ni waaryawawe. ¹³ Omweneenhu omwene woohimala, ni oweryawinhu onkhala womakhoto ooteene. ¹⁴ Apwiya anawaakhavihera ooteene amorale ni anawaavussa ooteene ootteetthyaa. ¹⁵ Meetho aatthu ooteene anawanriihani; ni Nhu n'nawaavaha eyoolya owakathi wooreerela. ¹⁶ N'nawaataphulela ntata enpheelaaya atthu ooteene. ¹⁷ Apwiya phossariya n'mittalanimwaya mooteene ni phomahala watjooteene tjinvaraaya. ¹⁸ Apwiya ari wakhiviru wayaale anaavuwiha, anaavuwiha niikhweeli. Ayena anawaakhavihera enpheelaaya yaale anoova; ¹⁹ Ayena anawiiwa okhuwelawaya ni anawoopola. ²⁰ Apwiya anaaweha yaale ooteene anaafenta, massi anaahala waamoriha omwiipiphini ooteene. ²¹ Malakwaaka anaahala wiipa ntjipo naApwiya. Atthu ooteene avuwihe ntjinanawe ttakattiifu, womahuku ooteene.