¹ Oottottopeliya akhale Apwiya, mwalaaka, anlipihera matataaka okhottoni, niikokhotjaka okhottoni. ² Nhu mwantthawenlwaaka ninlipherwaaka; mun'nokitaphulatja; Yaale ankikhaliha nlaponi. ³ Apwiya, ntthu tupani oopheela okussa tjootjuwelatjawe, wala mwaana antthu, oopheela on'weheeha. ⁴ Ntthu ri phanka ephyoo; mahukwaawe ari phanka ntthuutji onvira. ⁵ Anaakurussa erimu, Apwiya; anaakwanha myaako ni anaakumiha mwiissi. ⁶ Anaakurussa etari ni anawaakwanhula awananyaaka; anaavonha mattheeryaaya ni ayenatja anaatthawatja noonhakulihana. ⁷ Ntaphule ntataninhu okhuma wiirimu, ni nkikumihe n'maatjini mentji ni n'matatani mwaatthu oottayi. ⁸ Malakwaaya anuuluma tjowootha, ni ntatanaya noolopwana nin'hoolela tjitthu tjoohikhala. ⁹ Kinaahala owiipelani ntjipo nophiyaaru, ooh Nluku; ni yooruma yomikhoyi khuumi, kinaahala owiipelani etjipo. ¹⁰ Nhu n'haavaha woopwaa mamwene; n'homoopola Davi, nrumeyiinhu, nkatanani yootakhala. ¹¹ Nkoopole ni nkikumihe n'matatani mwaatthu oottayi; malakwaaya anuuluma tjowootha, moolumwaaya ooteene owootha. ¹² Assaaneehu yuunuwe phanka tjowaaliya, naassaaneehu assithiyana, phanka assaana oopalaassiyu. ¹³ Makhupiihu akhalaneke khula enan'na yoyoolya, ni mihuwotjihu tjiyaraneke ventji, n'mattaniwihu. ¹⁴ Vano, emopetjihu tjinaahala okhala tjoolipa muntekoni. Khaavo n'hala otupha eluwanitjihu, ni khun'hala wunlatjiya munttalaniwihu. ¹⁵ Ootteeliya atthu areerihiye ventji. Ootteeliya atthu arina Apwiya phanka Nlukwaaya.