Ekapiitulo 141
1
Apwiya, kinawookhuwelani; n'mwe wowaakuvyaatja. Nkiiwe kiiwiihanakani.
2
Mavekelwaaka akhale phanka elunpani ohoolowinhu; matataaka akhale phanka tjoovahiya tjoothana.
3
Apwiya, mwaanomwaka munkhalihe ookhalenla; kihuulume tjitthu tjoohikhala.
4
N'hihiye nrimaaka wuupuwelaka etthu yootakhala, wala ovaraka etthu yootakhala vamotja naatthu omwiipiphini. Wanakhalakhala n'hikihiye kilyaaka eyoolyaaya.
5
Mun'hiye ntthu ossariya akaattaka; phun'halaaka okhala ratta. Mun'hiye akivaanhihe; an'hala okhala phanka makhura on'murumwaka; muupuwelwaaka ohikhotte, kontha mavekelwaaka ankhala nitjoovariya tjoohikhala.
6
Ahoolelyaaya an'hala oriheliya ottayi wovathi; anaahala wiiwa moolumwaaka ooreera.
7
Anaahala wiiratja: Phanka ntthu nthakela etthaya, tjitjon'mo makhuveehu ahomwaresseliya n'mahiye.
8
Weekhweeli, meethwaaka an'nowoonani, Apwiya, Nluku; kin'nootthawenlani; khan'nohiya nrimaaka veekha.
9
Nkikhavihere, womiryankho tjaatakhali.
10
Mwaahiye atakhali amorele muntthavinimwaya, kinatthawale.