¹ Apwiya, Nhu mun'nokiweha ni n'naakitjuwela. ² Nhu mun'notjuwela kookoma wala kavuwa; hata kikhale ottayi, Nhu n'naatjuwela muupuwelelwaaka. ³ Nhu mun'notjuwela meettelwaaka ni marupelwaaka; Nhu n'naatjuwela mittalatjaka tjooteene. ⁴ Ni nuulumonihinaphiya mwaanomwaka, Nhu n'naatjuwela woomalela, Apwiya. ⁵ Nhu n'naakirukureerya ottuli noohoolo, ni n'naakeessenra ntataninhu. ⁶ Otjuwelatja phiwomiiriirya tjinene wonphantthyaaka; muulupale tjinene ni akinkhwitiri ophiyeera. ⁷ Ktthawaka N'nepeenhu kinkoorwaa vayi. Kinkootthawela vayi okhalawinhu wakhiviru. ⁸ Kawela wiirimu, Nhu nri woowu; kakhala n'mahiye, Nhu nri mon'mo. ⁹ Kava n'mapuphani oowitjissu nookhala moomaleloni mopahari, ¹⁰ nan'lelo ntataninhu ninaahala okeettihera; Ntataninhu noolopwana ninaahala okikhavihera. ¹¹ Kiiravale: Weekhweeli epiphi tjinaahala okikhuneela ni nthuko onaahala okhala ohiyu eriyaryaaka, ¹² wala mooripela khan'nohala okivitha. Ohiyu n'nohala okhaliha phanka othana, kontha epiphi ninthuko tjinawoolikanelani. ¹³ Nhu n'hokunpa, n'hokikumiha n'mirimani mwaanumwanaka. ¹⁴ Kinaahala woovahani mahala, kontha nhokunpa weenan'na yomiiriirya! Tjoovaratjinhu tjinkhala tjootikiniha ni nrimaaka onaatjuwela. ¹⁵ Makhuvaaka khayaari oovithiya, nssiirini wakunpaleenhu, phanka moomaleloni motthaya. ¹⁶ Nhu mwahokoona n'mirimani, oohilikana, ni mahukwaaka ooteene yaari owantikhiya nliivurunimwinhu, hinaaya okhala hata n'motja. ¹⁷ Nluku, muupuwelelotjinhu phitjookireerela! Muupuwelelotjinhu tjintji! ¹⁸ Kinamananihale waalikela, tjaahala okhala tjinene phanka npuussu. Ni kavuwa, nanlelo kinkhala Ninhu. ¹⁹ Nluku, aapheela nawiivakatjale atakhali! Nkihulussere atthu ootakhala! ²⁰ Ayena anawuulumani tjinene ni ntjinaninhu khankhaliha etthu. ²¹ Apwiya, akinaathanha yaale anoothanhani. Akinaathanha yaale anooromolatjani. ²² Kinawaathanha tjinene; ayena an'hala okhala awananyaaka. ²³ Nkiwehe, ooh Nluku, ni ntjuwele nrimaaka; nkilawihe ni ntjuwele tjinuupuwelaaka. ²⁴ N'wehe akhala wiira ehaavo yootakhala mwiirutthuniwaka ni nkeettihere nttala woohimala.