Ekapiitulo 138
1
Kinaahala woovahani mahala ninrimaaka wooteene! Ohoolo waanluku kinaahala owiipelani.
2
Kinaaha wookokhorelani npaanimwinhu ni kinaahala ovaha mahala ntjinaninhu, mwaha wonfentweenhu wokhweeli, kontha n'heettihera, vatulu watjooteene, nuulumoninhu nintjinaninhu.
3
Nihuku nookhuwenlyaakani, mwaahokaakhula; mwaahokikhavihera ni mwaaholipihera nrimaaka.
4
Mamwene ooteene olapo yovathi anaahala woovahani mahala, Apwiya, kontha ayena anaahala wiiwa moolumo on'mwaanowinhu.
5
Weekhweeli, ayena anaahala waakhela mittala tjaApwiya, kontha waarya waApwiya wuulupale.
6
Apwiya phaayena paassi, ni tjitjon'mo, an'nokuthakuthyaa nintthu owiiyeviha; massi owiittottopa Ayena anontjuwela ottayi.
7
Hata keette mapuro owoopiha, Nhu n'naassunka ekumyaaka; Nhu n'naataphula ntataninhu mwaawananyaaka, nintataninhu noolopwana ninaahala okoopola.
8
Apwiya anaahala okhala nimiivano npaka woomaleloni; Nfentweenhu wokhweeli, Apwiya, khun'malatho. N'hihiye matateenhu evaralyaaya.