¹ Nlukwaaka, nrimaaka, ori woolipa; kinaahala wiipa, khweeli, kinaahala wiipa etjipo, ninrimaaka wonttittimiho. ² Kinaahala owiipelani ni tjooruma; kinaahala ovuwa mapinkoossa. ³ Apwiya kinaahala woovahani mahala eriyari waatthu! Kinaahala owiipelani etjipo nlaponi mooteene. ⁴ Kontha nfentweenhu muulupale ni onaarwaa ntjulu, ni n'nemaninhu nuulupale ninphiyeera erimu. ⁵ Attottopeliye, Nluku, watjulu erimu, ni waaryawawe ottottopeliye elapo yooteene. ⁶ Wowiira yoopoliye yaale anaafenteenhu; n'noopole nintataninhu noolopwana ni n'naakhule. ⁷ Nluku, niittakattiifwaawe, aahuuluma: Kinaahala otthapa; kinaahala onkawaniha Siquem ni kinaahala okawaniha muro Sucote. ⁸ Gileade awaka ni Manasses awaka; tootho Efraim nkhaviherwaaka ni Juda awaka. ⁹ Moabe nipuro ninrapaaka; Edom phun'halaaka orula etjapatthwaaka; Kinaahala okhuwela otthema oFilistia. ¹⁰ Tupani n'hala okiwaana epooma yuulupale. Tupani n'hala okirweeha Edom. ¹¹ Nluku, n'noonikhotta. Khan'nokhumatho naatthweehu nrwaaka okhottoni. ¹² N'nikhavihere nin'wananiihu, kontha nkhavihero wantthu khunanteko. ¹³ Ninkhavihero waNluku ninaahala otthema. Yena naahala waanhakela awananiihu.