¹ Mwaavahe mahala Apwiya kontha Ayena phooreera ni nfenfwaaya khun'mala. ² Nkhuweleke emaara tjintji atthu Apwiya awoopolalyaaya, yaale awoopolalyaaya mooweryani mwa n'wanani. ³ Ayena ahaathukumaniha nlaponi tjoottayi, miphantte tjooteene. ⁴ Ayenatja yaaheetta moothakoni, mapuro oohiitthu, ni khayaaphwanhale mapuro oopheela okhala. ⁵ Yaaritji niitala, nintthona ni yaanossirikhatja. ⁶ Vano, nmikatjamihonimwaya, yaanaakhuwela Apwiya ni Ayena yaahaakussa mwaha womahuvihwaaya. ⁷ Ayena yaahoweettihera munttalani wooreera. Vano, yaahophwanha nipuro noopheela okhala. ⁸ Atthu ooteene yiipele Apwiya mwaha wonfentwaaya ni mwaha womiiriiryatjaya tjinaapankelaaya atthu! ⁹ Kontha Ayena anawaavoniha atthu arinintthona niwaavoniha ari niitala. ¹⁰ Akhwaawe yookomale wooripela ni wantthuutjini wonookhwe, ohuvihatjiya ventji. ¹¹ Kontha ayenatja yaanoohanhuriha Nuulumo naNluku ni yaanookhottatja tjooruma tjowiirimu. ¹² Ayena yaahomoriha mirimatjaya nimiteko tjoolemela; yaahomora ni khaarivo oopheela waakiha. ¹³ Tjitjon'mo, nmikuthakuthonimwaya, yaanaakhuwela Apwiya. Ni Ayena yaahaataphulatja moohuvanimwaya. ¹⁵ Ayena yaahaakumiha mooripela ni muntthuutjini monookhwe; ni yaahopwessakatja tjowaatthuka. ¹⁴ Ooh! Atthu ooteene yiipele Apwiya mwaha wonfentwaaya ni mwaha womiiriirya tjinaapankelaaya atthu! ¹⁶ Kontha Ayena ahokwanhulatja mikhora ni ahothikila minkittho tjoyuuma. ¹⁷ Yaahottarussatjiya mwaha watjoovaratjaya ni mwaha watjookossatjaya; ¹⁸ wakhula eyoolya khayoona otjiva ni yaahophiya n'mikhorani mookhwa. ¹⁹ Vano, n'mikatjamihonimwaya, yaahaakhuwela Apwiya; Ayena yaahaataphulatja moohuvanimwaya. ²⁰ Ayena yaahoveleeliha Nuulumonaya ni naahaavoniha; Ayena yaahaakumiha moohuvani. ²¹ Ooh! Atthu ooteene yiipele Apwiya mwaha wonfentwaaya ni mwaha womiiriirya tjinaapankelaaya atthu! ²² Avaheke okuttho womaha ni akhuweleke, nootteeliya, Tjoovaratjaya. ²³ Aneetta ekwahatjaya tjon'maatjini, atumihatjaka ²⁴ anaahala woona tjoovaratjaya Apwiya nimiiriiryatjaya mapuro owinssa. ²⁵ Kontha Ayena yaahuulumatja ni ephyoo yuulupale yaahokhumenla npahari. ²⁶ Tjoweetta n'maatjini tjaahokwanha erimu, mwaha womawinpi. Ekumitjaya tjaahokhala tjoohuva. ²⁷ Yaaheenheenhihatjiya ni yaakhalatja phanka atthu oohapaliya; ni yaahaamalela ekhuluvelo yowoopwaa. ²⁸ Tjitjon'mo, moohuvani, yaahaakhuwela Apwiya yaakumihale moohuvani. ²⁹ Ayena yaahomaaliha ephyoo nimawinpi yaahomaala. ³⁰ Vano, yaahotthapatja kontha epahari yaahomaala; Ayena yaahaakussa yaarweehaka nipuro naapheelaaya. ³¹ Ooh! Atthu ooteene yaattottopele Apwiya mwaha wonfentwaaya ni mwaha womiiriirya tjinaapankelaaya atthu! ³² Atthwaayo yaattottopele moothukumanoni mwaatthu ni amwiipele munthukumanoni momahumu! ³³ Ayena yaahotatussa muro okhaliha othako, mapuro oovira maatji yaahuuma, ³⁴ etthaya yooruweriya yaahokhaliha ekupa, mwaha watjoovara tjaatthu. ³⁵ Ayena yaahopittikussa moothakoni okhaliha ehime niitthaya yowuuma yaahonaana. ³⁶ Atthu yaari niitala yaahaapheelela nipuro, ni ayenatja yaahotekatja epooma wiira akhalakhale. ³⁷ Yaahaalatja etjoolya ni yaahoruweryatja tjinene. ³⁸ Ayena yaahaareeriha, weenan'na wowiira yintjeryaaneke ventji; khaatthunihale wiira avukuwatje. ³⁹ Yaahovukuwatjiya mwaha woohaawa nimahuviho. ⁴⁰ Ayena yaahaakurussela etanhifu ahooleli ni yaahaakhaliha mootakoni, mwahaarivo nttala. ⁴¹ Ayena yaahakussa atthwaale ni yaahowintjiviha, phanka mihuwo. ⁴² Nassariya naahala woona ni naahala otthapa, ni omwiipiphini ooteene naahala otthuka malakwaawe. ⁴³ Yoole ri ootjuwelatja avaressesse ni akhalane miteko tjooreera tjaApwiya.