¹ Nluku, yooyo n'mwiipelaaka, n'hikhale oomaala. ² Kontha atthu oohiloka anaakikhumenla ni anaakootheryatja. ³ Anaakirukureerya yuulumaka tjitthu tjoohikhala. ⁴ Woovirikaniha nfentwaaka, an'nokimoriha, massi kin'naavekelela. ⁵ Ankiliva yootakhala wayooreera, ayena khunaatjivela nfentwaaka. ⁶ An'nomootherya ntthu wan'wanani; namootherya akhale monueenhu nlopwana. ⁷ Alamuliyavale, akhale oopanka yooyo; mavekelwaawe akhale ookossa. ⁸ Mahukwaaya akhale vakaani, ntekwaawe akusse ntthu nkhwaawe. ⁹ Assaannawe akhale ekhwaatjuni ni amwaarawe, anankhweli. ¹⁰ Assaanaawe yeette woohinipuro noomalela, alepelaka tjoolepela, ni yoomoliyeke n'mawan'nhaya. ¹¹ Namakopheliya akusse tjitthutjawe tjooteene; anaatanhifwaawe akusse tjooteene tjinphwanhaawe. ¹² Hikhale nttaliviha n'nemanawe wayena; hikhale n'hala woonela ekiriri ekhwaatjunitjawe. ¹³ Nlokonawe nirimeele; ntjinanawe nikhale noofutthiya nikhoto nin'mwa. ¹⁴ Etanpi tjaassimutjaawe tjikhale tjootjuweliya naApwiya; ni tjoottheka tjaanumwanawe tjihiliyaliye. ¹⁵ Okossawawe okhaleke ohoolo waApwiya; Apwiya athikile muupuwelwaawa watthayani. ¹⁶ Apwiya apanke tjitjon'mo kontha nlopwanoola khiivo ethoonhiheralyaawe; ohiyavaa, nanssankihatja oohuva, onkutakutheeha npakha okhwa. ¹⁷ Yena fentale otakhalihiya; amwaakulele. Yena aanootanhifu oreerihiya; oreerihiya ohin'weele. ¹⁸ Yena aanoowara otakhalihiya, phanka ekuwo; akhale n'hinamwawe phanka maatji, phanka makhura on'makhuvanimwawe. ¹⁹ Otakhaliya okhale phanka ekuwo tjiniikhuneelaawe, phanka essuntu ehinlevan'naawe. ²⁰ Yeeyo ekhale etthuvo yaApwiya waatthu ahinontthuna, wayaale ankuuluma onhala. ²¹ Apwiya, Nlukwaaka, nkoonele ekiriri mwaha wonfento wantjinaninhu. Nkoopole mwaha wonfentweenhu wokhweeli. ²² Akiniikhwitiri ni nrimaaka ohorakala. ²³ Kinaarimeela phanka ntthuutji wiipheelaka wiila; kinriheliya ottayi phanka etjoroope. ²⁴ Makuthaaka ahotteetthyaa nootthuka, kihanle nttapala nimakhuva. ²⁵ Kinawoomolanihiya naawanani; yakiwehaka, anaatutha murutjaya. ²⁶ Nkikhavihere, Apwiya Nlukwaaka; nkoopole ninfentweenhu wokhweeli. ²⁷ Ni atjuwelatje wiira envareenhu; Nhu, Apwiya, phinvarakeenhu. ²⁸ Hata ayena akitakhalihatje, Nhu n'naakireeriha; yakikhumenla, yoonihatjiye ehaaya, nrumeyiinhu ahakalale. ²⁹ Awananyaaka awarihatjiye ehaaya; aware ehaayatjaya phanka nlaya. ³⁰ Nimalakwaaka kinaahala waavaha mahala Apwiya; kinaahala owiipela eriyari yaatthu. ³¹ Kontha ayena an'hala okhala moono wonlopwana wayoole npheela nkhavihero, wiira amoopole wayaale anonlamula.