¹ Mwiipele Apwiya, nvuwihe ntjinanawe, ntjuwelihe mitekotjawe elapo tjooteene. ² Mwiipeleke, mwiipeleke etjipo; ntjuweliheke mitekotjawe tjooteene tjomiiriirya. ³ Ntthapeleke ntjinanawe ttakattiifu, atteeliyee nrima yaale anaarweela Apwiya. ⁴ Mwaarweele Apwiya niikurwaaya; mwaarweele woohihiyenra. ⁵ Muupuweleke miteko tjomiiriirya tjipankalyaaya, mitikiniho niikettelotjaya, ⁶ nhu amutji aAbraao, nantekweenhu, nhu atthu aJaco, Yaathanlaleenhu. ⁷ Ayena Apwiya, Nlukweehu. Ekettelotjaya tjihaavo elapo yooteene. ⁸ Ayena anawuupuwela woohimala waataanawaya, wonuulumo nivahalyaaya wolapo ekonto ekontotjene. ⁹ Ayena anawuupuela waataana waapankalyaaya ni Abraao, nooluphelawaya wa Isaque. ¹⁰ Yeela phiikettelo yaakupanlenlyaaya ni Jaco, ni Israel waataana woohimala. ¹¹ Ayena yaahiira: Kinaahala woovahatjani elapo yooCanaa n'halaneke. ¹² Ayena yaattonkela owakathi waaritjaaya vakaani; vakaani ni anan'mwa nlaponi. ¹³ Ayenatja akhumale nikho ninikhoto ni omwene ninkhwaawe. ¹⁴ Ayena khaatthunihale wiira hikhale npheela waahuviha; ni yaahaatthukela mamwene mwaha waayena. ¹⁵ Ayena yaahiira: N'haakwanhakwanhe yaatthapenlyaaka ni n'haapanke yootakhala arumeyaaka. ¹⁶ Yaahiihana atala elapo yovathi, yaahomaliha eyoolya yooteene. ¹⁷ Ayena yaahonveleeliha ntthu ohoolowayatja; Jose aahotumihiya phanka nanteko. ¹⁸ Enhaatjawe tjaanootthukiya nuunholo, onholo woyuuma phaatthukeliyaawe, ¹⁹ npaka wamanlyaaya mahukwaawe. Nuulumo naaPwiya naahonlawiha. ²⁰ Mwene aahaaveleeliha ananteko wiira atthukuliye, nkhulupale aatthu aahontthukula. ²¹ Aahonkhaliha nkhulupale watthokoniwawe womapurwaawe ooteene, ²² wiira aafunteke ahoolelyaawe phanka tjaatthunaawe ni wiira aassomihe otjuwelatja mahumwaawe. ²³ Vano, Israel aahokela wiigiipitu ni Jaco aahokhala owakathi mwntji elapo yooCam. ²⁴ Nluku aahowintjenra athhwaawe ni nawaakhliha entji woovirikana awananyaawe. ²⁵ Ayena yaapanka wiira awananyaawe yaathanheke atthwaawe, yaapanke yootakhala anantekwaawe. ²⁶ Ayena yaahonveleeliha nantekwaaya Moises, ni Arao, yanthalalyaaya. ²⁷ Ayenatja yaathoonheratja mithoonherotjawe waatthu owiigiipitu, miiriiryatjawe elapo yooCam. ²⁸ Ayena yaahokurussa epiphi ni yaahoripela elapweele, massi atthu khayiiwenlale tjoorumatjaya. ²⁹ Ayena yaahotjariha ephome maatji ni tjaahokhwa ehopa tjooteene. ³⁰ Elapotjaya tjaahotjara amarapi, npaka nmapaani mwaakhulupale. ³¹ Ayena yaahuuluma ni nphwinko wophenpele niissentjema tjaahokhuneela elapo yooteene. ³² Yaahokurussa epula, niitari nlaponimwaya. ³³ Yaahokwanhulatja emathatjaya, yaahomorihatja miri tjonlaponiwaya. ³⁴ Yaahuuluma ni tjaahowa etjoroope, etjoroope tjintji ³⁵ tjaalyaale tjaalyaale etjoolya tjooteene tjonlaponi. ³⁶ Yaahowiiva owantjera oyariya ooteene nlaponiwaya, owantjera oyariya ooteene. ³⁷ Yaahaakumiha atthu owiisrael, yaakhumale niiparatha niiwooru; ni khanivo nikhoto naakhumale munttalaniwaya. ³⁸ Atthu yaakhala wiigiipitu yaahotthapa owakathi okhumatjalyaaya. ³⁹ Apwiya yaahotaphula ntatanaya wiira naakhuneele nimooro wiira waamwaleele ohiyu. ⁴⁰ Atthu owiisrael yaaholepela eyoolya ni Ayena yaahon'mwaana mwaamwaanuni ni yaahorupalatja ninkatthe wowiirimu. ⁴¹ Yaahokawaniha mwala ni maatji yaahomwaryaa, yaahomwareela moothakoni phanka muro. ⁴² Ayena yaahowuupuweliha nkhuluvelwaaya ttakattiifu waapankalyaya ni Abraao, nrumeyaawe. ⁴³ Ayena yaahaavaha ohooleli atthwaaya nootteeliya, yanthanlalyaaya nookhuwela wootthema. ⁴⁴ Yaahaavaha elapo, yaahokussatja mihakhu tjaatthu ⁴⁵ wowiira assunke tjoorumatjaya ni weettela ekettelotjaya. Oottottopeliya akhale Apwiya!