¹ Kinaahala owiipelani, Apwiya, niikumyaaka yooteene! Apwiya Nlukwaaka, phinhu oophwanela; Nhu nri oowariya ni waarya. ² Nkhuneeliye ninthuko phanka wonlaya; Nhu n'hotaphulela erimu phanka heema. ³ Nhu n'naalipihera nipuro ninkhaleenhu nimahutte; Nhu mahutte n'nokhaliha nkukutteenhu; Nhu n'neetta n'mapuphani wophyoo. ⁴ Mahutte n'nokhaliha arumeyiinhu, naanantekweenhu, n'niihana mooro. ⁵ N'horihela vathi tjoorumatjinhu, ni khatjin'malatho. ⁶ N'hokhuneela etthaya nimaatji phanka yoowariya; maatji yaakhuneela myaako. ⁷ Ohitthunihawinhu, maatji yaahohokolyaa; nintjuuninhu nuulupale, yaahotthawa. ⁸ Myaako tjaahokhuma, ni mwaamuro tjaahokhuma tjirwaaka mapuro atthunihaleenhu. ⁹ N'hopanka mwiinano ohintthunaaya ovikana, wowiira tjihikhuneele etthaya. ¹⁰ N'naakumiha mwaamuro tjooyevatja emuro tjinvira nmwaakoni. ¹¹ Tjinaavoniha enama tjooteene tjon'mwiini; epwittipwitthi tjonmwiini tjin'nimaliha ntthona. ¹² Nkurukurumwaya, assaanuni owiirimu an'nopanka epwaarutjaya, ni an'niipatja. ¹³ Okhuma mahuku ankhaleenhu wiirimu mun'nomitjera myaako. Elapo entjara mihokorokho tjontekweenhu. ¹⁴ Mun'non'nuwiha ohakheliya wonama nimiri woopheela olima pinaatamu, wankumihaaya yoolya vathi: ¹⁵ nipha ninpanka nlowana ootteeliya, makhura ooreeriha ekhovyaawe niiyoolya yopheela okhalihera ekumyaaya. ¹⁶ Miri tjaapwiya tjinaamitjeriya ratta; Ayena ahaala miritjaya; ¹⁷ mon'mo, assaanuni an'nopanka epwaarutjaya. Enuni mon'mo phunkhalaaya. ¹⁸ Epuri tjontakhwani tjinkhala woomaleloni mwaako; mwaako ntthawenlo tjonama tjookhuura. ¹⁹ N'hunpa mweeri wiira okhaleke nimapurwaaya; ntjuwa ninaatjuwela tjinpheelaaya okela. ²⁰ N'naawiiha epiphi yoohiyu, enama tjuulupale tjontakhwani tjiikhumaka. ²¹ Akharamu ophiyaaru an'nonhakula ni anrweela waNluku eyolyaaya. ²² Ntjuwa niiwelaka, tjinaakhuma ni tjinrupa nmaphaani. ²³ Nlopwana naakhuma arwaaka ontekoniwawe ni naavara npakha wiila. ²⁴ Apwiya, miteko tjintji tjiri nmatataniwinhu! Nootjuwelatja n'hovara tjooteene; etthaya tjinootjarana mihakhutjinhu. ²⁵ Epahari, yuulupale ni yowaatalyaa, tjowunpiya tjitntjiru, tjuulupale ni tjooyevatja. ²⁶ Tjin'neetta tjitthu tjuulupale, tjunpaleenhu wiira tjithukeke. ²⁷ Tjooteene tjiwanriihani nheenhuva wiira mwaavahe eyoolya. ²⁸ Mwaavahakavale, an'naakhenla; mwataphulaka ntataninhu, an'nossukhuru. ²⁹ Mwavithaka ekhoveenhu, anaakuthakuthyaa; mwakumihaka nfentweenhu, anaakhwatja ni ankhala ntthupi. ³⁰ Mwawaanaka n'nepeenhu ttakattiifu, an'nokhala ratta, ni n'naareeriha elapo yovathi. ³¹ Waarya waapwiya khun'malatho; Apwiya anaahala otthapa nmitekoniwaya. ³² Ayena anaaweha elapo yovathi ni enaattettemela; anaakwanha myaako ni tjin'neenheenha. ³³ Kinaahala owiipela Apwiya ekumyaaka yooteene; kinaahala omwiipela etjipo Nlukwaaka kakhala nkumi. ³⁴ Tjowuupuwelatjaka tjikhale tjowuutjivelani; kinaahala waatthapela Apwiya. ³⁵ Amalihatjiye anatanpi elapo yovathi naatthu omwiipiphini ahikhaletho. Kinaahala waatthapela Apwiya niikumyaaka yooteene. Mwiipele Apwiya!