¹ Mwaatthapele Apwiya, nrimaaka! Tjooteene tjiri n'hinamwaka tjithamale ntjinaninhu ttakattiifu. ² Mwaatthapele Apwiya, nrimaaka ni n'hiliyale wanakhala etthu emotja womitekotjinhu. ³ Ayena phanlevenla etanpitjinhu tjooteene; Ayena phanvoniha ekwereretjinhu tjooteene. ⁴ Ayena anaakumiha ekumiinhu mookwanhuwatjani ni woovahani etthuvo ninfento ni miteko tjokiriri. ⁵ Ayena anaakhaliha ekumiinhu nimiteko tjooreera, wowiira enanttonpeenhu ekhale yophiyaaru phanka mwaanuni. ⁶ Apwiya phossariya ni nphuki aatthu ooteene oohuvihiya. ⁷ Ayena anaatjuweha mittalatjaya wa Moises nimitekotjawe, waatthu owiisrael. ⁸ Apwiya phokiriri ni omahala; Ayena phoolevenla ni muulupale nfentwaaya. ⁹ Ayena khan'halaokhala oorussiya mahuku ooteene. ¹⁰ Ayena khan'nivara phanka tjinphwaneleehu, mwaha watjoovaratjihu; khan'nikhaliha phanka etanpitjihu tjinpheelaaya. ¹¹ Tjitjon'mo phanka erimu tjiryaaya ottayi niitthaya, tjitjon'mo nfentwaawe muulupale waatthu yaale anonkokhorela. ¹² Phanka tjittalivalyaaya wiirimu ni variihu, tjitjon'mo ayena anaakumiha tjookossatjihu. ¹³ Phanka thumwaane tjinaafentaawe assaanaawe, tjitjon'mo Apwiya ahaana nfento naatthu anonkokhorela. ¹⁴ Kontha Ayena anaatjuwela tjunpiyeehu; Ayena anaatjuwela wiira nantthupi. ¹⁵ Atthu, mahukwaaya ari phanka etthu yoonhaala; enaaphuwela phanka ethutu yon'mattani, ¹⁶ ephyoo yooteene enanphwanha, ni enaarimeela, ni khaavo ntjuwela wuunuwenlyaaya. ¹⁷ Massi nfento waApwiya khun'malatho wayaale anonkokhorela. Nfentwaaya ori Naasimutjaaya, ¹⁸ yaale anssunka waataanawaya ni anuupuwela ¹⁹ tjoorumatjaya. Apwiya ahunpa ehitjaaya wiirimu ni ekettelo weehoolelyaaya waatthu ooteene. ²⁰ Mwiipele Apwiya, nhu malaikha okuru, n'niiwelela moolumwaaya, nviriyane tjoorumatjaya. ²¹ Malaikha ooteene yiipele Apwiya, nhu nri ananteko, nvare otthunawawe. ²² Tjowunpiya tjooteene tjiipele Apwiya, mapuro an'hoolelaaya ooteene. Kinaahala owiipela Apwiya ekumyaaka yooteene.