¹ Mwiiwe mavekelwaaka, Apwiya; okhuwelawaka phiye wariinhu. ² Nihuku nomahuvihwaaka n'hivithe ekhoveenhu. Nkiiwe, kookhuwelani, nkitjipwe wowaakuvyaa! ³ Kontha mahukwaaka anvira phanka mwiissi ni makhuvaaka anaapaha phanka mooro. ⁴ Nrimaaka ori woorakala, kiri phanka etthu yowuuma; npaka kinaaliyala okhuura nkatthyaaka. ⁵ Mwaha wowoovawaka ohinkimalela, makhuvaaka ahovaraana niirutthwaaka. ⁶ Kiri phanka mwaamwaanuni moothakoni; kiri phanka mwaamwaanuni hinrupa ohiyu. ⁷ Akinrupa; kiri phanka leeketja watjulu enupa. ⁸ Awananyaaka anaakoomolaniha nihuku nooteene; yaale ahinkipheela ankhala nintjinanaka wiira akitakhalihe. ⁹ Kinlyaaka ettuura phanka nkatthe ni wootakanihiya maatjyaaka meethori; ¹⁰ mwaha woorussiyawinhu nootikinihiyawinhu n'hokivussa ni n'hokimoriha. ¹¹ Mahukwaaka ari phanka ntthuutji ninrimeela ni, phanka ethutu , kiniira kuumaka. ¹² Massi Nhu, Apwiya, n'nokhala womahuku ooteene ni ntjinaninhu ninaakhala womakhoto ooteene. ¹³ Nhu n'naahala ovuwa niwoonela ekiriri Siao. Vano owakathi wowoonela ekiriri; owakathi waahimiye ohophiya. ¹⁴ Kontha anantekweenhu anfenta malukwaaya ni anoonela ntthupi okwanhuwatjaya. ¹⁵ Elapo tjooteene tjinaahala ohissimwa ntjinaninhu, Apwiya, nimamwene ooteene onlaponi anaahala otiittimiha waaryawinhu. ¹⁶ Apwiya anaahala onvussavussera Siao ni anaahala okhumela waaryawaya. ¹⁷ Owakathi yooyo, Ayena anaahala waakhulela mavekelo aatthu ootthawiya; Ayena khan'hala okhotta mavekelwaaya. ¹⁸ Tjin'hala wantikheliya makhoto an'mwa ni atthu ahinayariya anaahala owiipela Apwiya. ¹⁹ Kontha Ayena ahoweha otjulu; wiirimu Apwiya ahoweha vathi, ²⁰ wiira yiiwe okhuwela waanantthukeliya, wiira yaataphulatje yaale yaapheela okhwa. ²¹ Vano, atthu anaahala okhuwela ntjina naApwiya oSiao niitjipotjaya oJerusalem ²² atthu naahooleli yathukumana wiira yaakokhorele Apwiya. ²³ Ayena ahottyaatthyeeha ekurutjaka eriyari weekumyaaka. Ayena ahokhuveeha mahukwaaka. ²⁴ Mi kaahiira: Nlukwaaka, n'hikikusse eriyari weekumyaaka; Nhu n'nokhala makhoto ooteene. ²⁵ Okhuma mahuku okhalayi, Nhu n'hunpa etthaya; erimu miteko tjon'matataniwinhu. ²⁶ Tjinaahala orimeela, massi Nhu n'naahala okhala; ooteene anaahala wuuluvala phanka tjoowariya, phanka ekuwo, n'naahala okumiha ni tjinaahala orimeela. ²⁷ Massi Nhu phinhu ni eyaakhatjinhu khatjin'malela. ²⁸ Assaana anantekweenhu anaahala okhala ookhuluvela ni assimutjaaya anaahala okhala wariinhu.