¹ Yesu ahaalathula ookhuumi nayeeli ni ahaavaha owerya niikuru mwaasotuani ooteene ni wira avonihe eretha. ² Yena ahaaruma wira alalyee omwene wa muluku ni waavoniha aretha. ³ Yena aahiira: n'hikusse ethu mwiirwaaka: wanakhala ekatjako, wala nrupa, ntjurukhu, wala n'hikhalane malaya meeli khulanthu. ⁴ Wakhula enupa enkookeleenhu nkhale mon'mo mpaka ohokolyaawinhu. ⁵ Mweehaakhenliye mweekhumaka yeeyo epoomeeyo ntathe nthupi non'nhaaniwinhu akhalaka namoonaaya. ⁶ Vano ayenani phaarwaaya m'mapooma alalyaatjaka ehapari yooreera yonaanaano ni yaavonihaka athu mapuro ooteene. ⁷ N'hooleli Herodes aahiiwa tjithu tjooteene tjaakhumenla ni aahokhala ootikhinatja kontha akwaawe yira Joao mrapiha hovuwenla waathu ookwa. ⁸ Akwaawe yira wira Elias okhumenlatho, ni akwaawe yira wira mrumeyi okhalayi uwenlale. ⁹ Herodes vano aahiira: Mi kaahoruma wira Joao iviye, vano tipani yooyo n'hala niiwaka watjern'nho tjithun'nha? Vano Herodes aahophelatja enan'na yoomoona yesu. ¹⁰ Owakathi arumeyi khuumi nayeeli yaarumiye ni yesu waahokolyaaya, ayena yaahon'himeerya tjooteene tjaapankalyaaya vano yesu ahaakussa opuro wiihaniya Betsaida. ¹¹ Massi athwaayo yaahiiwa tjithun'nho ni yaahothara. Yena aahowaakhenla, ni ahaahimeeyra mwaha womwene wa muluku, ni anaavoniha yaaphela ovona. ¹² Owakathi wantjalyaaya wiila arumeyi khuumi nayeeli yaahowa mpaka waaryaawe ni yaahiira: mweereleke athuaayo wira arweeke weena'na yeela orwaa mpaka n'mapooma ni mapuro owaathamana nin'hina wowiira apwanhe mapuro niiyoolya, okhala wira opuro oriihu othayi. ¹³ Massi yena aahowirelatja, mwaavahe ethu yoolya, ayenani yaahiiratja khanirina woovikana mikathe mithanu niihopa piili, woohikhala wira ninaarwa othuma eyoolya em'hala otossa mwaathu ooteene. ¹⁴ Yaahaavo ookhalaka athu nekonto thanu yoole opuroole. Vano ahaahimeerya awiixutyaawe monkomihatje mpwinko waathu hanssiini. ¹⁵ Vano tjitjon'mo ayenani yaahopanka ni athu ooteene yaahookomatja. ¹⁶ Yena aahokussa mikathe mithanu niihopa piili, awehaka wiirimu aahoreeriha, aahuntaniha ni aahokawatja ni aahaavaha awiixuthyaawe wira yaakawelatje athwaayo. ¹⁷ Yaaholya ooteene yaahokhala ootheeliya ni tjaahotjara ethuthu khuumi napiili eyoolya yaahan'le. ¹⁸ Ni yaahokhumenlatho yesu iira alompaka wowiikitya naawiixutyaawe yaari ni yena. Vano yena aahokoha: Athuaayo aniira wira mi kipani? ¹⁹ Ni ayena yaahaakhulatja: Akwaawe aniira wira nhu mwa Joao mrapiha, akwaawe anira nhu mweelias akwaawe aniira mwanrumeyi um'wenlale mookwani. ²⁰ Ni aahowirela, vano nhu munkiirela kipani? Akhulaka Pedro aahiira: kristu amuluku. ²¹ Massi yesu alipiheraka ahaahimeerya wira hikhale non'himeeryenhu yeela. ²² IIraka: onaapwanela mwaana anthu ohuvela tjithu tjintji akhale ookhothiya naahooleli, naahooleli onkutho, ni anamalepa akhale owiiviya ni akhale oovuwenla mwaathu ookwa nihuku noneeraru. ²³ Yoole mpheela okithara iikhothe, atjisse msalapaawe mahuku ooteene ni akithare. ²⁴ Yoole mphela woopola ekumyaawe enaahala ompwetyaa, massi yoole mpwetessa ekumyaawe mwaha wawaka naahala woopwa. ²⁵ Ni ethuvo eri wanthu n'motja ni yena nathemale etuniya yooteene, massi wiirimeeliha wala wiikwanhulatja omwaneene? ²⁶ Ni yoole nkoonela ehaaya nimoolumwaka, mwaana anthu naahala omoonela ehaaya wawaaka waaryawawe, ni waathumwaane ni malaikha nthakathiifu. ²⁷ Weekweeli kinawoohimeeryani, ahaavo wanhu nrivaa ahin'hala olawiha okwa mpaka woona omwene wamluku. ²⁸ Ni waahokhumenla wira, anvirale mahuku naane muulumtjale ala moolumwaala, yesu aahontjissa Pedro, Joao ni Tiago ni yaahowela wamwaako wira yalompe. ²⁹ Owakathi yena waalompaawe makhalelo owithowawe waahopithikuwa, ekuwotjawe tjaahokhala tjoothela ni tjowaarya. ³⁰ Ni alopwana eeli yiira yuulumaka niyena, yaari Moises ni Elias. ³¹ Yaayo yaahowa niwaarya, ni yaahuulumela okhumawaya, waari oophela opankeliya mphanthe ojerusalem. ³² Pedro naale yaarinaawe yaari niikhove, yaahoona waaryawawe ni alopwana ooyeeli yaarinaawe. ³³ Ni waahiranyaatho, wakhumalyaaya waaryaawe, Pedro aahomuiirela yesu: Mwiixuthihi, vahoreerela nikhalaka vaava. Nipanke mixaxa miraru, n'motja wawinhu, n'motja wa Moises, ni n'motja wa Elias, woohitjuwela yuulumaawe. ³⁴ Weeraawe uulumatjaka, naahowa nihuthe naahaakhuneelatja, ni yaahoovatja. ³⁵ Ni naahowa ntjuu n'mahutheni, naahimya wira: Ula mwaamwanaka nonfentaaka; wa yooyo kaahiiwa. ³⁶ Ninamaalale ntjuun'ne, yesu aari veekha; ni ayenatja yaahomaalatja, ni yaale mahukwaale khaavo anthokenlyaaya yeele yoonalyaaya. ³⁷ Nihuku nikwaawe, akhuruwatjaka wamwaako, athu entji yaahorwaa vaaritjaaya. ³⁸ Ni nlopwana n'motja waathuaale aahokhuwela: Muixuthihi, kinawoolepelani mwamoone mwaamwanaka, kirina n'motja yooyo paassi. ³⁹ N'nepa n'motja onankussa, wowaakuvyaatja naakhuwela, mpaka okhuma niphooru, ni ononkhuma onan'huvihatjale ventji. ⁴⁰ Ni kahaalepela arumeyiinhu wira yoomole n'nepa wootakhala, massi khakwitinri. ⁴¹ Ni yesu aahaakhula: Nikhoto noohiiwelela ni nootyawanatja! Mpaka eyaakhani kin'halaaka okhala ninhu, koovilelakani? Munwiihe vaa mwaamwaninhuuyo. ⁴² Weeraawe awaaniyaka, n'nepa wootakhala waahon'vara. Vano yesu aahothuka n'nepoole, aahon'voniha mwaanoole, ni ahon'hokolossera waathumwaane. ⁴³ Ni ooteene yaari oothukuwatja ni eyuulupale ya muluku. Ooteene woonalyaaya yesu yaapankaawe, aahowiirela arumeyaawe. ⁴⁴ M'sunke n'maaruniwinhu moolumwaala: mwaana anthu n'hala ovahen'riya n'matatani mwaathu. ⁴⁵ Massi ayenatja khayaatjuwelela nuulumon'ne, ni naari noohaakhuneela wira ahitjuwelele, ni yaanawoova okoha mwaha wonuulumon'ne. ⁴⁶ Yaahonhakulihanatja yaayoru mwaha wo phuuviphuuvi waayenatja aari muulupale. ⁴⁷ Massi yesu, atjuwelwka muupuwelelo omirimatjaya, aahonkussa mwaana n'motja waaryaawe. ⁴⁸ Vano aahowiirelatja: N'hala omwaakhenla mwaanoola wontjinanaka, hokaakhenla, ni yoole n'kaakhenla, homwaakhenla kirumale, kontha wayoole wanhu ri muulupale, yooyo n'hala okhala muulupale. ⁴⁹ Joao ahaakhula: Mwiixuthihi, nihoona wira mwantjinaninhu yaanoomola tjootakhala, nihi nihaateeliha, kontha khan'nithara. ⁵⁰ Ni yesu aahomwiirela: Ohiwaateelihe, kontha yoole hiri nihi, rinihi. ⁵¹ waahokhumenlatho, wamalihalyaaya mahuku yaahalaaya waakhenliya, yena aahohimya wira n'rwaa Ojerusalem. ⁵² Ni ahaaruma arumeyi ohoolowawe, ni ayenatja yaahorwaa, ni yaahokela ntjoko waasamariya, wira athonkomanihatje. ⁵³ Massi khayaakhenlatjiye, kontha ekhovyaawe yaathoonha wira nrwaa Ojerusalem. ⁵⁴ Arumeyaawe, Tiago ni Joao, woonalyaaya n'nha, yaahiira: Pwiya, munphela wira niire okhuruwe mooro wiirimu, toko Elias tjaapankalyaawe? ⁵⁵ Phimaana yena aahorukunuwa, ahaathukelatja. ⁵⁶ Ni yaahorwaatja ntjoko nkwaawe. ⁵⁷ Ni weethiyaka ninthala, haavo uulumatjale: Pwiya, kinaahala wootharani on'haleenhu orwaa wooteene. ⁵⁸ Ni yesu aahiira: Amarapi ahaana elipelo, naasaanuni owiirimu, epuuru, massi mwaana anthu kharina woweessenra muru. ⁵⁹ Aahomwiirela nkwaawe: okithare, vano yena aahiira: Pwiya, mptje okihiya kaassikhe athumwanaka. ⁶⁰ Massi yesu aahomwiirela: waahiye athu ookwa assikhane ookwaru, vano we orwee ni walalyee omwene wa muluku. ⁶¹ Mkwaawe tootho aahiira: Pwiya, mi kinaahala wootharani, massi mpatje okihiya kaaleehe yaahiyalyaaka owaani. ⁶² Ni yesu ahiira: khaavo n'hela ntatanawe woohoonya ni awehaka othuli toopwanela moomweneni wa muluku.