¹ Ni yahiraniya tjo, Yesu ahantja ovira epooma tjoviirikana ni eparasa, alaliyaka ehapari tjorera womwene wa N'luku. Ni khumi neeliyaale yaarwa niyena, ² tjitjan'mo nathiyana yakhan'le ovonihiya minepatjaya tjottakhala nirettatjaya. Yaari yaayo: Maria, ihaniyaka Madalena, arina minepa saapa tjottakhala tjomoliye; ³ Joana, amuara Kuza, n'khulupale Herodi, Susana ni athiyana entji akwaawe yaawaneliya titju tjavaraliyaaya. ⁴ Ni ethukumanaka n'phin'ko n'motja mulupale naale athu akwaawe yawale epooma tjikwaawe wera en'pwaanye, Yesu ahahimiyera wariyari wa n'likaniho: ⁵ "Namaala eephiyo n'motja ahokhuma wera aale ephiyo waraawe yera aalaka, ephiyo tjikina tjamoren'le woonene eriyari ephiro, tjenya tjahonyaakelatjiya, ni asanuni owirimo yaholiya tjoottene. ⁶ Ephiyo tjikina tjaamoren'le wothaaya womuaala ni tjo tjahun'nuwa, phunwa kontha kawanaleela. ⁷ Vano ephiyo tjikina tjaamoren'le wa mirini tjomuiiiwa ni tjen'ya tjahun'nuwa wamotjaaru nimiwa, tjen'ya tjahosan'katja. ⁸ Massi ephiyo tjikina tjahomorela wathaayani yoorera, ni yahunuwa nukumi, ni piruwerya toohephiya ekwaha eminya tjulupaleru". Vano Yesu nahimiyalene tjenya tjithun'ya, ahokhuwela nintju nulupale: "Aale arina maaru wowira yiiwe, yiiwe". ⁹ Vano arumeyawe yahonkoha yeena wera n'likanihon'na naphela ohimuiya essiya. ¹⁰ Yesu ahahimeryatja: "Nyu muhovahiya otjuwelatja esiri tjomuene wa N'luku, massi akwawe an'rwa winthutjihiya nimalikaniho, yahona ayena ahoona, ni yaaniwa ahitjuwele. ¹¹ Eela phin'himuiya n'na n'likaniho: ephiyo nulumo na N'luku. ¹² Ephiyo tjamoren'le eriyari ephiro phaale anin'wa, massi sothwani phiiwa waakha nulumo wan'rimani waaya wera ehamini, ni tjitjan'mo wera ehoopwe. ¹³ Ephiyo tjamoren'le wathayani yatakanelale wamuala phaale anin'wa nulumo, yakhen'laka nutheliya, massi pihikhalanaka mittitharitjaya ayena anawamini owakathi vakani ni okathi woolawihiya anahathuwa. ¹⁴ Ephiyo tjamoren'le wamiwani ari n'toko athu yiwaale nulumo, massi okathi ontharen'liya ephirotjaya tjakhala tjothikileliya, ni tjitju tjiniraya, mihakhu ni tjowatjivelatja tjon'ttuniyani pihiruwerya mihokorokho. ¹⁵ Massi ephiyo yamoren'le wathayani yoorera ari athu, okupalela ni oreera n'rima anawin'ma mihokorokho nukhalela n'thiitti. ¹⁶ Ni khavo non'parihela saminiya pin'khunela ni muaapu waala phin'yathi vathi won'kori. Wovirikana, neesiya watjulu metja ni, tjitjan'mo oteene an'kela wera yoone waarya. ¹⁷ Kontha yooteene eri wowikithiya enarwa woniherya, ni yooteene eele eri besiri enahala otjuweliya ni enahala owaniya wan'thukoni. ¹⁸ Vano muin'we woorathaven'la, kontha ole rina, wowin'tjereriya navahiyatho, ni yoole hirina, hatta enupuwelawe okhalana n'rwa wakhiya. ¹⁹ Vano anumuani ni asihimawe Yesu yahowa waryawe, massi khayakhittiri omuattamen'la n'lathu won'phin'ko. ²⁰ Ni phamuiren'leya : "Anumuana na asihima ari ootta anawariha wera ewoone". ²¹ Massi Yesu ahahimerya: "Amama ni assun'naka phale anin'wa nulumo na N'luku ni phivarela n'teeko". ²² Pheraniya nihuku nimotja nen'ne, Yesu ni arumiyaswe yahokela n'nikulani, ni Yesu ahirela: "N'rwe n'pan'tti n'kwawe womuro". Vano ayeena yahokhuma. ²³ Massi, yettihakano, Yesu ahorupa ni ephiyo yulupale yahokukhumula muro ni nikula nahan'tja otjaara matji ni ayeena yari owopihiya. ²⁴ Arun'muawe a Yesu yahon'rweela ni, yahon'vusa yiiraka: "Muitjutjihi, Muithutji, nihan'le okwa"! yeena ahun'wa, ahothukela ephiyo ni mawinb omatji, ayeena yahin'wen'la ni wahokhala omaliya. ²⁵ Vano yena aheerela: "Orivayi waminiwinyu?" Anarineene woova ni osaan'ka, yerelanaka n'motja nin'kwawe: "Ttipaniyola, nirela ephiyo ni matji ni yena phimuiwen'la?" ²⁶ Ni ayena yahorwa pilaphuwela n'ttethe wogirasseno, okhan'le n'phan'tti n'kwawe won'ro wo Galileiya. ²⁷ Yesu wankeliyawe ethaya, n'lopwana n'motja opoma ahorwa on'pwanya yena, ni n'lopwanole haana n'nepa wottakhala. Okathi muintji khwara ekowo ni khakhala owani, massi tjo omahiyeni. ²⁸ Omonawawe Yesu, yena ahokhuwela ni ahomuerela owin'tho wawe. Ni akhuwelaka tjinene hera: "Kireni esiyani ni we, Yesu muana aN'luku owirimo? kinawulepelani wera muhikihaseni". ²⁹ Vano Yesu ahirela minepa tjohuluma wera tjikhume muan'lopwana womara tjintji, tjakhan'le tjin'huvihaka anathukiyaka nunhoolo woyyma, ni akalenliyaka, yena anakwattula on'yoolo ni anatjisiya muttakoni niminepa tjottakhala. ³¹ Vano Yesu ahon'koha yena: "N'tjinana tipani?" NI yena ahiira: "Legiao", kontha minepa tjottakhala tjintji tjaari tjonkela yenani. ³⁰ N'yoo tjanalepela eson'tte wera Yesu yomolele n'piphini. ³² Nikotto nintji nolukuluwe nari vavale, niliyaka nipuro nan'kani, ni minepa tjottakhalan'yo tjanalepela wera tjikele n'kuluweni. Ni yenani ahothunela wera ekhale yeeyo. ³³ Vano minepa tjottakhala tjahokhuma mwan'lopwana ni pikela n'kuluweni, ni nikotton'no nahitawa ni nahirihela nipuro nowin'sa ni tjahotjama. ³⁴ Wonaliya alopwana yaliha ekuluwe eeli yiraniyale, ayena yahon'thawen'la ni ehimiyaka n'poma ni wawatjeke. ³⁵ Athu yin'wale wayeyo yahorwa wona yiraniyale ni, wattamen'liya wa Yesu, ayena yahomona n'lopwana yole tjin'khumale minepa tjotakhala. N'lopwana ahowara ekuwo, ni narina an'khili omana, nokomale wamethoni wa Yesu, wonaliyawe yahokhala owovatja. ³⁶ Yaale yonale yiraniyale, yahahimeerya akwaya wowira n'lopwana ari owehawehiya ni minepa tjottakhala hopoliya. ³⁷ Athu oteene on'ttethe wotjiraseno ni yathamen'le yaholepela wera Yesu akhume wariyariya ayena, kontha ayena yakhala owoova ventji. Vano Yesu ahokela n'kalawani ni ahohokoliya. ³⁸ N'lopwana yoole akumihiye minepa tjottakhala ahon'lepela Yesu wera an'hiye arwe niyena, massi Yesu ahomuirela arwe iraka: ³⁹ "Ohokolele owaninya ni wahimiye tjithu tjupakaliyawe N'luku". N'lopwana ahon'thara epirwawe, ahimiyaka n'poma wootene tjithu Yesu tjin'pan'kaliyawe yena. ⁴⁰ Yesu wahokoliyaliyawe, athu yahomuakhen'la notteliya, vano ayenani era an'muehen'raka yena. ⁴¹ Vano ahavo n'lopwana n'motja yihaniya Jairo, ari n'hooleli n'motja osinagoga. Jairo ahokokorya wamen'thoni wa Yesu ni phin'lepela wera yena arwe owan'nyawe, ⁴² Vano muamuanawe n'motja omiyaka khumi napiili, ephelaka okwa. Massi Yesu arwawe, athu yanan'kinya. ⁴³ N'thiyana n'motja amalihale miyakha khmi na piili muaha wohawa ovuuva ephome ari vaava wathuni. Yena akhan'le apuettesaka n'surukhu woteene womamediko, massi anakhala n'motja khavo an'khitin'ri on'voniha. ⁴⁴ Yena ahaavo othuli wa Yesu, okwan'ya ehan'tjuawe ni naninoru ovuvawawe wahomala. ⁴⁵ Yesu hiira: "kin'kwanyule tipani? warunaliyaya oteene Pedro ahiira: "Muithutjihi, n'phin'ko wathu onawuttehattehani ni wukhinyani". ⁴⁶ Massi Yesu ahira: "Haavo kikwanyale, vano kihotjuwela wa min'yaano ohokhuma owerya. ⁴⁷ N'thiyana wonaliyawe wera kawan'rera ovitta yele evan'riyawe yena ahoova athukumelaka, ahakokorya wamen'thoni wa Yesu ni phihimuiyatja wathu oteene ninan'na yan'rwehale an'kwanyaka yenani nin'nana yavonihiyawe wowakuviya. ⁴⁸ Vano Yesu ahiira: "Muamuanaka, waminiwa ohovoniha. Orwe nin'rettele". ⁴⁹ Yesu nan'lelo olumatjaka n'kinako enupa ya n'holeli osinagoga, eeraka: "Muhin'khinye Muin'thutji. Muamuaninyu hokwa". ⁵⁰ Massi Yesu win'waliyawe yeeyo, ahomuerela Jairo: "Ohoove. Muamini paahi ni yena nawopwa". ⁵¹ Yesu wapiyaliyawe wathokoni, khavo an'thunihenryawe okela niyena, wahikhan'le Pedro, Joao ni Tiago, ni tjitjan'mo apapawe ni nanumuanawe muan'thiyana. ⁵² Athu oteene yakhan'le atjukhulatjaka ni amun'lelaka yenani, massi yena ahera: "Muhun'latja. Yena kakwale, naarupa". ⁵³ An'na papawe yari otikinihiya, massi yenani ahahimerya wera ehahimerye n'thu yiranalye ⁵⁴ Massi Yenani ahon'varen'la n'ttata na muathiyana ni ahokhuwela eraka: "Muathiyana, ovuwe". ⁵⁵ N'nepa wahohokolela ni ahovuwa yoole owakathiyole. Ni yenani aharuma wera avahiye ethu aliye. ⁵⁶ An'na papawe yaari ottikinihiya, massi yeenani ahahimerya wera ehihimerye n'thu yiraniyaale.