¹ Ni yahokhumenla nihuku nimotja no sabado, Yesu era aviraka ematta yoo tiriku ni awissuthiawe yeera ahephaka makahampha, apapahaka ni matata ni elhatjaka. ² Vano mafariseu akhuawe yahira: On'wa tjani nhu mvaraka ethu ehinthunihiya nihuku noo sabado? ³ Ni Yesu ahakhula, howirela: Khan'nasoma yele Davi epnkaliae naa lopwana yarinaawe yahovoliya etala? ⁴ Yena ahokela enupa ya Muluku, ahokussa ephau tjottakattifihiya, ahokhura ni ahavaha ale yarinaawe. Ni anamukutho thalamuliya okhura ephaun'nhe. ⁵ Ni Yesu ahowirela: Mwana anthu thi Pwiya oo sabado. ⁶ Ni yahiraniatho nihuku nikhuawe noo saabado, Yesu ahorwa mpaka oo sinagoga ni anawassomiha athu. Ni ahavo vavale nlopwana m'motja ni ntatanawe noopahuwa. ⁷ Ni anawantikhatja ni mafariseu yeera en'wehaka Yesu wakhiviru, wira amoone Yesu akhala wira anahala onvoniha nthu nihuku noo sabado, yaphelatja ethu wira emootherie. ⁸ Massi Yesu, watjuwenliawe yeele yupuwelaya, ahomwirela nlopwanoole arina moono wopahuwoole: "nkavuwa weemele eriyari wathu otene". Vano nlopwanoole ahovuwa ni ahokhala owemeleene. ⁹ Vano Yesu ahowirela: "Mi kinawukohani: esabado onathumihiya opanka yorera walani yonhala? wopolaka ekumi walani mwinvaka?". ¹⁰ Vano Yena ahaweha eriyari wathu otene ni ahomwirela nlopwanoole: "Otaphule ntatanan'no". Yena ahopanka yeele, ntatanaween'ne nahovonihiya. ¹¹ Massi ayenatja yahokhala oviruwatja, ni yahantja wuluma yayooru wa yele yaphelaya ompanka Yesu. ¹² Yahokhumela mahukuyale, Yesu ahorwa omwaako ovekela, Ohiu wooteene, Yena ahohokolela onvekela Muluku. ¹³ Vano wassaliaya, Yena ahowihana awinthutjiyawe, ahathanla khumi neeli, ni Yena ahowihana mapostolo. ¹⁴ Matjina omapostoloaale yari: "Simao, yoole Yena mwihanaliawe Pedro, nin'himawe Andre; Tiago; Joao; Filipe; Bartolomeu; ¹⁵ Mateus; Tome; Tiago, mwaana Alfeu; Simao, ihaniyaka Zelopte; ¹⁶ Judas, mwaana aa Tiago; ni Judas Iscariotes, akhanle namatumiha ¹⁷ Vano Yesu ahokhuruwa naa yeena wamwako ni yahemelatja nipuro nowataliaa, nipuro naari athu entji awinthutjiaawe, ni hata athu entji oo Judeia ni oo Jerusalem, ni mphantti ori epahari yo Tiro ni yo Sidom. ¹⁸ Ayenatja yahowa wira ayimwin'we ni evonihiyaka erettatjaya. Athu yahuvihiya ni minepa tjotakhala yanavonihiya. ¹⁹ Ni athu otene yanaphela onkwanha Yesu, kontha waYena yanakhuma ekuru, ni Yena anawavoniha otene. ²⁰ Vano ahaweha awinthutjiaawe, ahowirela: "Orerihiya thi nhuva, amassikhini, kontha omwene wa Muluku wawinhu. ²¹ Orerihiya thinhu nri nvoliya etala, kontha n'nahala ovona. Oreriya thinhu n'nunla, maana mwinrwa othia. ²² N'nahala orerihiya mwakhala ohithuniya naathu ni nkhalaka ohin'ya, ni mwakhalaka oruwaniya ni nkhottiyaka ntjinaninhu ntoko atakhali, mwaha wa Mwana Anthu. ²³ Mwatteliye nihuku neen'no ni mwatuphe nuutteliya, khweli nhu n'nahala ophwanha nthuvo wirimu, kontha an'napapaya okhalai yanawatafiti maprofeta manan'na yaayo ²⁴ Massi, mootakhaliya nhu athatjiri! kontha n'hakhela olipiheriya winhu. ²⁵ Motakhaliya nhu, nri ovona! kntha n'naarwa ovoliya etala. Motakahaliya nhu, nri otteliya. kontha n'narwa otjukula ni wuunla. ²⁶ Motakhaliya nhu, n'nohala wulumiya yoorera! kontha an'napapaaya okhalai ahatafiti maprofeta owotha manan'na yaayo ²⁷ Mi kinawuhimeriani nhu n'nokin'wa: mwifente n'wananin'nhu mwapankela yoorera yaale ahinophelani. ²⁸ Mwarerihe yaale anonanarihani ni mwavekelele yaale anoohuvihani. ²⁹ Akhala nthu nrakalihani, mwinvahetho mphantti nkinakuuyo. Akhala nthu nokussaka ekuwotjinhu, n'hikhottihe. ³⁰ Akhala nthu nolepelani ethu, mwinvahe. Akhala nthu nokussa ethu yawinhu, n'hinlepele wuhokolosserani. ³¹ Ntoko tjimphelen'nhu wira athu awiriheni, mwapanke tjitjam'mo. ³² Mwafentaka yaale anofentani, n'nohala ophwanhani? Mpaka anatampi anawafenta yale anafenta. ³³ Mwapankaka yorera yaale anopankani yorera, n'nohala ophwanhani? ³⁴ Hata anatampi anawatjimia anamatheka ni anawehenra ohokolosseriya ni yale ephimelo yeeyo yatjimaliaya ³⁵ Massi, mwafente awananin'nhu, mwapanke yorera ni n'watjime n'hiwehenraka ohokolosseriya, ethuvoen'nhu en'hala okhala yulupale. N'nohala okhala assana aa Muluku, kontha thoorera ni yaale ahinsukhuru ni otakhala nrima. ³⁶ Nkhale anakiriri, ntoko apapen'nhu tjiriaaya anakiriri. ³⁷ N'hilamule, ni khan'nohala olamuliya. N'hithukele, ni khan'nohala othukeliya, Nleveke, ni an'nahala oleveleliya. ³⁸ Mwavahe akhwin'nhu ni n'nahala ovahiya. Ephimelo yorera, yokhitteliya,. Ni manan'na n'nohalenhu ophima, n'nohala ophimeliya manan'na yaayo. ³⁹ Vano Yena hattonkela nlikaniho: "Nthu ohona namwetiha ohona nkhwawe? Yena arwaka opanka, khan'hala omorela mwinlikittini oyeli? ⁴⁰ Mwinthitji khankhala onvikana mwinthutjihi, massi akhalaka othenkiya saana nakhala ntoko mwinthutjiaawe. ⁴¹ Essiyani owehaka ophorokotja tjiri m'methoni tja mwamun'naa, massi kuntjuwela ephorokotja eri m'methoniwaa? ⁴² On'hala omwirela tjani mwamun'naa: "N'himaka, okihiye kikumihe ephorokotja eri m'methoniwaa" ni we khunoona ephorokotja eri m'methoniwaa? Anamirima miili! opatjereke okumiha ephorokotja m'methoniwaa, vano orweke wanlepeleke onkumiha ephorokotja eri m'methoniwawe. ⁴³ Khuvo nri worera onvaha mihokhorokho tjonhuuna, walani nri wohiloka ovaha mihokhorokho tjorera. ⁴⁴ Wakuta nri onatjuweliya wa mihokorokho tjinvahaaya. Ni khavo n'hepha efigo tjo miiwa, walani uva yo sarca. ⁴⁵ Nlopwana orera, nakumiha ethu yorera yo wanrimaniwawe, massi otakhala, yonhala yo wanrimaniwaa enakumihera ota eri yonhala; kontha malaku anuluma wa yele eri wanrimani. ⁴⁶ Ni kontha essiyani Mwinkihanen'nhu: "Pwiya, Pwiya" ni khan'nin'wenla tjithu tjin'himiaka? ⁴⁷ Wakuta nthu noowa wa Mi ni nawin'wa molumoaaka ni anawin'wenla, Mi kinomwirela ntoko yena tjiriawe: ⁴⁸ yena ri ntoko nlopwana, atekale enupaawe, ahothipa mpaka winsiha vathi ni ahothipelatja wa mwala. Owakathi wawaliaaya ephioo, matji wawaliaya yahattaka enupeele, massi khimorale, kontha eri yotekiya ratta. ⁴⁹ Massi yoole ninwa molumoaaka ni hininwenla, ri toko nlopwana tekale enupaawe wa mpussuni, wo hilipihero. Vano matji om'muro wawaliaya yattaka enupeele, wowakuviawene yahoneela, ni okwanhuwawaya yahomaliheriya.