¹ Yahirania, nihuku nimotja, athu yahotjara enrukureeriaka Yesu wira yinwe nulumo na Muluku, ni Yena anowemela wakhiviru wo nthiya noo Genesare. ² Yena hona ekalawa piili nkerekhere nthiya, anamatotha ehopa yanowemessatja ni yera erapihatjaka mathaviaaya. ³ Vano Yena ahowela ekalawa emotjayaari ya Simao, ni aholepela wira etjisserihiye ekalaweele mpahari. Yesu ahonkoma, nkalawani, anawassomiha athuaale. ⁴ Wamalihaliawe ossomiha, Yesu homwirela Simao: "Okusse ekalawa orwaane eriyari maatji ni orihele mathaviayo" ⁵ Ni Simao ahakhula: "Mwinthutjihi nihovara nteko ohiyu wotene ni khaniphuanhale ethu, Massi okhala wira mohimya kinarihela mathaviaayo. ⁶ Wapankaliwe tjom'mo, ayenatja ahophuanhatja ehopa tjintji, mathavi yahantjera wahuwatja. ⁷ Vano ayenatja ahowihanatja assipathaniaya ekalawa ekhuawe wira ewatje ayakhaviheratje. Ayenatja yahotjarihatja ekalawa tjo piili mpaka tjahophela otjama. ⁸ Simao ni Pedro owakathi wonaliaaya yeele. yena ahokokhora oholo wa Yesu, iraka: "Ohikatteme, kontha mi kinamatheka, Pwiya". ⁹ Yena ni otene yaale yarinaweyahokhala otikinihiya ehopa tjaphwanhaliaaya. ¹⁰ Nulikanawene, hata, Tiago ni Joao, assaana aa Zebedeu, yari assipathaniaawe Simao. Ni Yesu homwirela Simao: "Ohoove, okhuman'navaa onkokhala ntothi athu". ¹¹ Owakathi owanaliaya ekalawan'nhe vate, yahohiya tjotene ni yahonthara Yesu. ¹² Ohiraniatho, Yena wariawe epoma thikinaku, ahavo nlopwana arina makuttula. Owakathi wamonaliawe Yesu, ahokokhora, ekhoveawe akwanhihaka vathi, ahonlepela, iraka: "Pwiya, wakhala wira othunawinhu, nkivonihe". ¹³ Ni Yesu ahontaphulela matatawe ni ahonkwanha, iraka: "N'no othunawaka ovone!" Ni owakathi yoole makuttula yahon'hiya. ¹⁴ Yena ahomwirela wira hikhale nthu non'himeriaawe, massi ahmwirela: "Orweeke, withinhihere anamukutho, ni wavahe nkutho mwaha wovonihiyawaa, ntoko Moises tjiwirenliaweni, wira mwinkhalele ossahiti". ¹⁵ Vano, ohimiya wa Yenani wahomuarela tjinene, ni athu entji yanaawa wira ayimwin'we Yesu assomihaka ni wira ayivonihiye erettatjaaya. ¹⁶ Ewora ekinaku Yena anakhumaka orwa mphantti nkinaku ni anovekelaka. ¹⁷ Ni wahiraniatho, nihuku nimotja, Yesu anassomiha, ni yahavo mafariseu ni amwinthutji okano yonkomale wakhiviru wa Yenani. Ayenatja yahowatja omapuro mentji ni onttethe ojudeia ni Ogalileia ni hata epoma yoo Jerusalem. ni ekuru tja pwiya yari ni Yenani wira avonihe. ¹⁸ Vano alopwana akina yahowa anankussale wa nkorini nlopwana owuntakia. Ayenatja yanaphelatja manan'na ophela omwaana mpani mwathukumaniye, aphelaka omwatalela oholo wa Yesu. ¹⁹ Massi, muaha wathu, ayenatja khayakhuitinri. Vano yahowela wanivathonoi ni, wanivatho yahonkurussa nlopwanoole ninkoriawoole vavale, eriyari wathu yaale, ohoolo wa Yesu. ²⁰ Wawonaliawe waminiwaya, Yesu ahira: "Nlopwana, etampitja tjoleveleliya". ²¹ Anawantikha ekano ni mafariseu yahantjera onkoha, yiraka: "Tipani yoola nihimia matarawo yaala? Muluku thinlamuliya olevenla etampi". ²² Massi Yesu, watjuwenliaawe yeele yupuwelaaya, ahakhula ni ahowirela: "Essiyani n'nokalen'nhu mwikohaka wanrimaniwinhu? ²³ Eri yohirika wira: "Etampitja tjolevenliya". walani "ovuwe weette?" ²⁴ Thimana, n'haana ntjuwelaka wira Mwana Anthu haana ekuru ntuniyani wira alevelele etampi, mi kinawuhimeri: "Wunwe, okusse nkoriooyo orweke owani". ²⁵ Wowakuviawene yena ahovuwa oholowaya, ahokussa nkoriaawe warupathelaawe ahorwa owani anttithimihaka Muluku. ²⁶ Otene yahokhala otikinihiya, yananttithimiha Muluku ni, yahotjarana woova, yiraka: "Elelo nihona tjithu tjotikiniha". ²⁷ Waviraliaya tjithun'nha, Yesu ahokuma wenwe ni ahomona namaliviha nsokho ihaniyaka Levi nonkomale nipuro nalivihawe nsokho. Vano Yesu ahomwirela: "Okithare". ²⁸ Levi ahohiya tjootene, ahovuwa ni Ahoonthara. ²⁹ Vano Levi ahothenka esukhuhulu yulupale owan'nhawe. Anamaliviha nsokho entji ni athu akinaku yahorukureria mesa, aliaka nayeenatja. ³⁰ Ni mafariseu ni anawantikha ekano yanawihimiatja wamwinthutji a Yesu, yiraka: N'nolhelani ni n'novurielani na namaliviha nsokho ni anamatheka? ³¹ Yesu ahowakhula: "Ale arina okumi khonomphelatja medico, ahikhanle yaale anweren'ya. ³² Mi akiwale owihana anassariya, kiwaale owihana anamatheka owituthuuwa". ³³ Ayenatja yahomwirela: "Awinthutji a Joao anathuka kuta nihuku ni anavekele, hata awinthutji omafariseu. Vano awinthutjiaayo anaavuria ni anaalia''. ³⁴ Yesu ahowirela: "N'nahala wapanka othuka ale ananlattuliya nipuro ninthelaniya narieene namathela nayenatja? ³⁵ Massi anahala ophiya mahuku on'halaya okussiya namathela, yaayo mahukuaayo anahala othuka. ³⁶ Vano Yesu ahattonkela nlikaniho nimotja: "Khavo nokumiha etjapha ekuwo yo nanaano wira ettotheliye ekuwo yokhalayi. Kontha wapanka tjom'mo ekuwo yophiyaruiiyo enahala wahuwa, ni etjapeeyo khin'hala olikana ni kuwo yokhalayiiyo. ³⁷ Khavo nohela evinho yophiyaru puhela mwapu wokhalayi, wapanka tjom'mo, evinho yophiyaruiiyo enahala ottenla mwapuuyo ni enahala omwariatja, ni mwapun'yo tjinahala ophwiakatja. ³⁸ Massi evinho yophiyaro ehaana eheliaka m'mwapuni tjonanaano. ³⁹ Khaavo, neera navuriaale evinho yokhalayi, ophelatho ovuria evinho yophiyaaru, nahala wiira: "Yokhalayiiyo phitjivaale.