¹ Yesu aahovussa meethwaawe ni ahaaweha mathatjiri ale yaavaha tjoovahatjaya n'mwe mwaaheliya tjoovahiya. ² Ni aahomoona naan'khweli massikhini arihelaka vaavale enoota piili. ³ Vano ahiira: Veekhweeli kinawoohimeeryani wira ola nan'khwelyuula massikhini hovaha wowaavikana atthu ooteene. ⁴ Kontha ooteene vahale tjomahala woovirikana tjihalan'nyaaya, vano ola nan'khwelyuula nuumassikhinyaawe hovaha tjooteene tjaaroromelaawe. ⁵ Ni akwaawe yaanawuulumela mwaha wokapela, okhala wira elee yaatekiye nimaluku ooreera ni tjoovahiya tjaawa tjookhuluvelihiya. ⁶ Vano yesu aahiira: Tjakhala tjen'nha tjithun'nha tjinooneenhu mahuku anaawa wowiira khani'hala okhala mluku nimluku nihin'hala okwanhuwatja. ⁷ Ayenatja vano yaahonkohatja, Mwiithutjihi, yaakhani onkookhumenlaaya tjithun'nha? Ni onkookhala nthoonheroni tjaattamenlaka n'nha tjithun'nha tjinkookhumenla? ⁸ Yesu ahaakhula: Mkhale ootthonkomanyaa wowiira hikhale oopheela wuuthepyani, kontha ankoowa entji mwantjinanaka yiiraka: Mi timi yooyo, ni owakathi ohaattamela! N'haathare. ⁹ Mwarwaaka okowiiwa ekhotho ni onhakulihanatjiya, n'hikhale ootuthuwa, kontha tjihaana tjikhumenlaka n'nha tjithun'nha, massi wuumaleloni khun'hala owa naanaanoru. ¹⁰ Vano yena aahiira: Elapo en'hala owana niilapo ekhwaaya, owene nuumwene. ¹¹ Tjinaarwa okhumenla ottettemela wothaya tjuulupale, mapuro mentji, etala niiretta, tjinkookhumenla tjitthu tjowoopiha nimithoonhero tjuulupale tjinkoowa wiirimu. ¹² Vano tjihinaaya tjooteene n'nha, ankowoovahenrani matataaya ni ankowootharatharani ni munkovahenriya osinagoga nuutthukelatjiya ni tootho munkoweethihatjiya eriyari yomamwene ni mahooleli nlathu wontjinanaka. ¹³ Eyo enkookumihera wottayaari weesaahitieenhu. ¹⁴ Phimaana nthoonhihereke mirimatjinhu, ohinaaya wiitjaakihawinhu. ¹⁵ Vano mi kinkowuuvahani moolumo nuutjuwelatja, wayaayo khaavo n'motjaaya aassiwananiinhu nkoorwaa olipa wala ovaanhihera. ¹⁶ Ni munkootumihatjiya nan'nathumwaninhu, assun'ninhu, assimutjiinhu, assimpwaneenhu, ni ayena anaarwa owiiva athu akinaku. ¹⁷ Ni n'naarwa ohipheliya nlatto wo Ntjinanaka. ¹⁸ Massi neem ekharari emotja tjiri m'muruwinho enaahala orimela. ¹⁹ Ovilelawinhu, n'nahala ophuanha erohotjinhu. ²⁰ Muawoona anakhotto anavirenle elapo yo Jerusalem, n'haana ntjuwelaka wiira owakathi ohophiya wophela okuanhuliya. ²¹ Vano yaale ari oJudeia athiawele m'mwakoni, ni yaale ari eriyari eparassa yakhume, ni yaale an'hala okhala mwaawatjeke ehihokolele ottuli, ²² kontha yaayo mahukuaayo ankokhala oliveliya, wophela wiirania yeele yanthikhiye. ²³ Yii yaale ankookhala nirukulu, ni yaale ankokhala yaaamwihaka yaale mahukuaale! Kontha ankokhala mahuku omahuviho onlaponi ni oviruweliya athuaala. ²⁴ Ni ankela winvakatjiya nii katana ni anaahala othukeliya elapo yoteene, ni Jerusalem n'hala onhakelatjiya naamalapo, mpaka muhuku yaayo tjihaana tjikhumenlaka. ²⁵ Tjinaahala okhumenla ethoonhero wa ntjuwani, nmwerini ni nthonttoni. Nlaponi, an'hala okhumenla mahuviho nlaponi, mahuku otjukuliha ni okukhula wo mayji onpahari ni mawinpi. ²⁶ Anaahala okhala athu onkhwa nankhuume, yupuwelaka tjithu thin'hala okhumenla nlaponi. Vano owerya wo wiirimu thinkokhala tjopopihiyaka. ²⁷ Vano ayenaa anaahala omoona Mwaana Anthu awaaka m'mahutteni, nii kuru ni waarya. ²⁸ Massi, tjiihalaka okhumenla tjithun'nha, mwavusse myuru, kontha wopoliyawinhu ori wakhiviru. ²⁹ Ni Yesu haattonkela nlikaniho nimotja: 'Moone efikeera ni miri tjikhuaawe. ³⁰ Tjantjeraka waalyaa, nheenhuva, n'natjuwela wiira nlaala ohattama. ³¹ Hata ni nhuuva, moonaka tjithun'ya tjiiraniaaka, ntjuwele wiira omwene wa Muluku ori wakhiviru. ³² Wekhueeli kinoohimeeriani wiira, khanihala ovira nikhoton'na tjithun'ya tjikhumenleke. ³³ Erimu nii ethaya tjinaahala ovira, massi Nulumo naka khan'hala omala. ³⁴ Mwirattavenle, wo wiira mirimatjinhu tjihikhale tjolemeliya ni tafaauti wonhakulihanatja, wohapaliya ni misankiho tjomwekumini. Wo wiira nihuku nen'no n'hitutuseriye, ntoko ntapha. ³⁵ Kontha Yena n'hala waweela athu oteene onlaponi. ³⁶ N'khale n'wehawehaka owakathi wooteene, nvekelaka wiira nkhalane ekuru tjowuphiyerani wira tjuvonheni tjithu tjinphela okhumenla, ni nkhalele ni Mwaana Anthu.' ³⁷ Ni, owakathi yooyo, Yena eera assomihaka nkapela ni ohiyu anaakhuma orua omuako wiihaniyaka wOolivera'. ³⁸ Athu oteene yanakhuma owitjissu tjinene orua okapela wiira ya mwiin'we.