¹ Yesu ahokela oJerico ni aviraka epomeele. ² Ahavo nlopwana ihaniya Zaqueu, ari n'holeli anamaliviha nsokho ni ari thatjiri. ³ Yena anaphela omona Yesu, massi khakhwitiri Omona, kntha ari okhuvia. ⁴ Vano, Zaqueu ahothiawenla ohoolo wathu ni ahowela mwinrini wira amoone Yesu, kontha Yena akela ovira vavale. ⁵ Yesu waphiyaliaawe lipuroon'ne, ahoweha ntjulu ahomwirela: "Zaqueu, okhuruwe phiyaru kontha elelo kinrua okhala owan'nha". ⁶ Vano, yena ahokhuruwa wowakuviatja ni Ahomwakhenla nutteliya tjinene. ⁷ Owakathi wonaliaya athuaale, yahotikinihiya, yiraka: "Yena ruaale omotola nlopwana namatheka". ⁸ Zaqueu ahovuwa ni ahowirela aPwiya: "Pwiya kinrua wavaha amassikhini mihakhutjaka tjirinaka wakhala wira ahavo muin'nheraliaka ethu, kinarua owintjerera emaara tjesse". ⁹ Yesu ahomwirela: "Elelo wopoa ohophiya ethokoeela, kontha yena mwana Abraao. ¹⁰ Kontha Mwana Athu awelale owopola yaale yarimelale". ¹¹ Weraya yiwanwaka tjithun'nha, Yesu ira ulumakatho. Ahattonkela nlikaniiho, kontha ahattamela oJerusalem ni kontha athuaayo yoniha wira Omwene wa Muluku wahala owa wowakuvia. ¹² Yena ahira: "Ahaavo nlopwana m'motja ofaita ahokhuma orwa elapo yottayi arwa okothapeliya okhulupale nuhokolia. ¹³ Yena ahowihana anantekoaawe ookhumi, ni ahavaha nsurukhu khumi ni ahowirela: "Mwinpanke nakosso mpaka nihuku nin'hokoliaaka". ¹⁴ Massi athuaawe khayamphela ni yaharuma athu ottuliwawe yiiraka: "Khanimphela wira nlopwanoola aniholele". ¹⁵ Nathapeliyeene okhulupale, yahoruma wihaniya ananteko yavahaliaawe nsurukhuaale, wira athuwele elukuru yaphuanhaliaaya n'hina nakosso. ¹⁶ Opatjera ahowa oholowawe iraka: "Pwiya, nsurukhuule kihophuanhato khumi" ¹⁷ Yahomwakhula: "Wahorera, nanteko saana. Kontha wahamineela vakani, we onahala okhala ekuru mwa epoma khumi". ¹⁸ Onayeli ahowa iraka: "Pwiya, nsurukhuule kihophuanhatho mithanu". ¹⁹ Ni nuule ahomwirelatho: "We onahala okhala ekuru mwa epoma thanu". ²⁰ Ni ahowa nkinaku iraka: "Pwiya, kahosunka nsurukhu mwakivahalen'nhu kahothukatja mwi nlesoni, ²¹ kontha kanawoovani kontha nhuva mwaalopwana oviruwatja. We onkumiha ethu ehinsathalia, on'hepha ethu ehaalalia". ²² Ni yahomwirela nuule: Ni molumoaa kinahala wohukhumu, nanteko ohiloka. otjuwelaka wira mi kinlopwana oviruwatja, kinkumiha ethu ehinsathaliaaka ni kin'hepha ethu ehalaliaaka". ²³ Ohinsathenreni nsurukhuakooyo obanco? Wahalaka ohokolia, kanahala ophwanha ni juro. ²⁴ Ahowirela yaale yari nipuron'ne: "N'mwaakhe nsurukhuuyo ni mwinvahe ole rina khumiuuyo". ²⁵ Ayenatja yahowirelatja: Pwiya, yena hana missurukhu khumi". ²⁶ Kinohimeriani: Yoole rina, nahala ovahiya, massi hirina, hata yeele erinaawe nahala wakhiya. ²⁷ Vano awananiaaka, yahaphela wira kaholele, mwawaane vaa ni mwahitakatje oholowaka ²⁸ Nulumaleene n'nha tjithuya, ahohokolela ekuahaawe ni yale ni ahoholela, ahorwa oJerusalem. ²⁹ Wahokhumenlatho, owakathi ophiyaliaawe wakhiviruwaya oBatfage ni oBetania, wowattamenla omwako wihaniyaka Oliveiras, aharuma arum'mueaawe, ³⁰ iraka: "Nrwe mwaliten'yamwe. Nkelatjakaru, n'nahala omphwanha mwapuuru nathukiye yooyo khanathi wonkomeliya ni nthu. Mwanthukule ni nkiwanele. ³¹ Okohani nthu: "N'nonthukulelani? M'mwirele: "Apwiya anamphela". ³² Yarumiaale yahomphwanha muapuruule ntoko Yesu tjawirenliaaya. ³³ Owakathi wanthukulaaya, mwanene ahowirela: "N'nonthukulelani muapuruula?" ³⁴ Ayenatja yahakhulatja: "Apwiya anamphela." ³⁵ Ayenatja yahom'mwanatja mpaka nipuro nari Yesu, yahomwarihatja ekuwotjawe muapuruule ni yahon'welihatja Yesu. ³⁶ Owakathi wakhumaawe, athuaale yanawatala ekuwotjaya mphironi. ³⁷ Ni owakathi wattamenlawe ekhuruwelo yo mwako Oliveiras, athu otene arum'mwe yahantjera othapa ni enttottopelaka Muluku ni ntju nowinwania wo miteko tjokuru tjonaliaaya, ³⁸ yiraka: "Oreriya thi Mwene nowa mwantjina naaPwiya. Nrettele wirimu ni waria wotjulu. ³⁹ Mafariseu akinaku yari wariyari wathuaale yahiratja: "Mwinthutjihi, mwamalihe arum'mweaala". ⁴⁰ Yesu ahakhula, iraka: "Kinawuhimeriani wira, athuaala yamaalatja, maluku pin'hala othapa!" ⁴¹ Owakathi Yesu wattamenliaawe mpomam'mwe, wonaliaawe, ahunlela, iraka: ⁴² "Mwatjuwenle elelo ile enowanelani nrettele! Massi tjithun'ya tjihovithiya m'methoniwa. ⁴³ Kontha tjinahala wuweelani mahuku awanania an'halaya oteka mwinkitho, anahala wurukureriaani, anahala wuphunhenrihani mapuro otene. ⁴⁴ Ni anahala opuruleliya, mwassanen'nhu mpaniwinhu. Khanihala ohin'ya nluku watjuluwaya nluku kontha khantjuwelenle owakathi wotoliyen'nhu." ⁴⁵ Ni wakelaliaawe Yesu ntemplo, ahantjera owomola ale yathumiha, ⁴⁶ awirelaka: "Ehantikhiya: "Enupaka en'hala okhala enupa yomavekelo", massi n'hopanka nipuro nanawin'nhe". ⁴⁷ Yesu anassomiha khuta nihuku ntemplo. Massi aholeli anamukutho, anamalepa ekano ni aholeli athu yanamphelatja Omwiiva. ⁴⁸ Khayamphwanha, vano, manan'na Ompanka, kontha athuaale yananviriyana omalelieene.