¹ Vano yesu aahohimya nlikaniho n'motja wiira waahalaaya ovekela woohihiyenra. ² Yaahaavo epooma emotja ni aahaavo namaphuka milatthu ahaamoova n'luku wala ahaahissimu atthu. ³ Ni ahaavo epooma yeele nan'khweli n'motja khula owakathi aawa okhala ni yena, iiraka: Okipankele ekhweeli nin'wananyaaka. ⁴ Owakathi mwintji khaakhala ootthonkomanyaa wiira ankhavihatjere, massi aahiitjiirela: Onookhalaru wiira alin'moova n'luku ni akinaahissimu atthu. ⁵ Kontha olaa nan'khwelyuula naakinhoonhiha, mi kinaahala wuuluma nlattuaawe, wiira hun'nheele okissatiyari. ⁶ Vano apwiya yaahiira: N'homwiiwa tjiiralyaawe namaphuka milathu oohissariya. ⁷ Nin'luku khan'hala waavaha essariya atthu athanleliyaawe, anonkhuwela yena othana nuuhiyu? Naahala opitjapitja naayenatja? ⁸ Kinoohimeeryatjani wiira wowaakuvyaatja naahala wuulumela. Kontha mwaana antthu awavale naahala okhalana waamini wathayani? ⁹ Ni yesu aahohimyatja nlikaniho waatthu yiihimya okhala anassariya, ni yaanawaatanhifu akhwaaya. ¹⁰ Alopwana eeli yaahorwaa okapela wiira yalompe, nfaritji n'motja, n'motja namaliviha n'ssokho. ¹¹ Nfaritji neemelale, aalompa tjo: N'luku, mi kinawoossukhuru, kontha akinakhala toko atthu akhwaawe, athapaya, oohissariya ni oweetha oluva: Wala akinakhala toko namaliviha n'ssokhoolava. ¹² Kinaatthuka emaara piili wokhulessumana, ni kinaavaha mwaavulo wa tjooteene tjin'pwanhaaka. ¹³ Ni namaliviha n'ssokho, neemelale ottayi, wala hitthunaka ovussera meethwaawe wiirimu, massi aanawiitjaatta etherema, yiiraka: ¹⁴ N'lukwaaka, okoonele ekiriri, kinamattheka. Kinooyimeeryatjani ola hokhala ossariya owan'nhawe woovirikana nkhwaawoole. ¹⁵ Ni yaahowaaniya assaana ooyevatja, wiira ankwanhe; ni arumeyi, yaanawaakhothiiha. ¹⁶ Massi yesu, aahowiihanatja awiirelaka: Mwaahiye anamwanyaayo awe waryaaka, n'haakhothiihe, kontha yaayo omwene wan'luku. ¹⁷ Weekhweeli kinoohimeeryatjani, wayoole hinkowaakhenla omwene wan'luku toko mwaana, khan'hala okela. ¹⁸ N'hooleli n'motja aahokoha iiraka: Mwiitthutjihi, essiyani en'halaaka ovara wiira kikhale mwiikumini yoohimala? ¹⁹ Ni yesu aahiira: essiyani okiihanaka ooreera? Khaavo ri ooreera, woohikhala n'luku. ²⁰ We onaatjuwela ekethelo: Ohiraruwe, ohiive, ohiiye, ohaavahe anamoona oohikhala, waathithimihe athumwanaa naanumwanaa. ²¹ Ni yena aahiira: Tjithu tjooteene kinaweethela enan'thonpyaaka. ²² Ni yesu wiiwalyaawe n'nho, aahiira: Etthu emotja enawoohaleela. Otumihe tjooteene tjirinaa, ni waakawele amassikhini, ni onaahala okhalana tjoweesseriya wiirimu; Ni okithareke. ²³ Massi yena, wiiwalyaawe tjon'mo, aahotheeliya ventji, kontha aari thaatjiri. ²⁴ Ni yesu wamoonalyaawe yena atteeliyaka tjinene, aahiira: Tivoorika thaatjiri okela muumweneni wan'luku! ²⁵ Kontha wanaawaakuvyaa ecamelu okela waniithoni wossinkano woovirikana thaatjiri okela muumweneni wan'luku. ²⁶ Ni yiiwalyaayo yaahiira: Vano tipani n'hala wiitjoopola? ²⁷ Ni yena aahiira. Tjitthu tjinon'rikarika pinaatamu n'luku khatjinonrikarikela. ²⁸ Ni peturu aahiira: Hii nihohiya tjitthu tjooteene, ninawoottharani. ²⁹ Ni yena aahowiirelatja: Weekhweeli kinoohimeeryani, haavo ntthu niira ahiya enupaawe, an'nathumwanawe, wala assun'nawe, wala amwaarawe, wala assaanaawe. ³⁰ Hinaakhenlatho awakathi yoola, nuuwakathi woorikarika aakhenlaka ekumi yoohimala, ³¹ Arwaaka niyena ookhumi nayeeli: Aahowiirelatja: Nineetta nirwaaka Ojerusalem, ni enaahala omaliheriya mwaana antthu tjooteene tjantikhiye naarumeyi. ³² Kontha yena n'hala ovahenriya mwaamalapo, athanhiyaka, ahuvihiyaka ni assuweliyaka. ³³ Ananttarussaleene, anaahala omwiiva; Ni nihuku noneeraru naahala ovuwen'la. ³⁴ Ni ayenatja khayaatjuwelela moolumwaayo; Ni nuulumon'na naanaawiipithyaa; Ni khayaatjuwelela yaahimeeriyaaya. ³⁵ Naattamelale Ojerico, ahaavo nlopwana n'motja ahoona ookomale nphironi, alepelaka. ³⁶ Ni yoola, awiiwaka atthu yaavira, aahokoha: Wiira essiyaniiyo? ³⁷ Aahaakhuliya wiira Yesu oonazareti phin'vira. ³⁸ Vano aahokhuwela, iiraka: Yesu, mwaana a Davi, okoonele ekiriri! ³⁹ Ni yaari ohoolowawe yaanaamwaateeliha wiira amaale, phaatepaawe okhuwela: Mwaana a Davi, okoonele ekiriri! ⁴⁰ Vano yesu, neemelale, ahiira awaaneliye, wapiihiyaawe, aahonkoha iiraka. ⁴¹ Onpheela kiwiirihe tjani? Ni aahiira: Pwiya, kinpheela mi kooneke. ⁴² Ni yesu aahomwiirela: Wooneke, waaminiwaa ohowoopola. ⁴³ Ni yena aahoona, ni anan'ttharenla, anvuwihaka n'luku. Naatthu ooteene, yoonaka yeele, yaanomwiipela n'luku.