¹ Anamaliviha mposto oteene ni nanamatotha ehopa yahomwattamela parra emwiiwe Yesu. ² Mafariseu ni anamalepa ekano yanattokutta yayoru, yiiraka: "Olaa nlopwanoola nawakhalana anamatheka mpaka namwaalhiana. ³ Vano Yesu ahottonka nlikaniho iiraka: ⁴ "Tipani yoole, nokhalana epwittipwithi eminha ne enrimelaka emotja, khan'hiya tusuiini na nanaane muthakoni ni ovira aphelaka yeele erimeelale? ⁵ Ni, aphuanhaka vale, nakusaa wanthuri ni na tteeliya. ⁶ Ni aphiyaaka owan'nhawe, namwalattula assimpwanaawe ni amwattamanoaawe, ahimeriyaka: "Ntteliye ni mivano, kontha kihopwanha epwittipwithiaaka yarimeelale". ⁷ kinawuhimeriani wiira, wo manan'na yaayo, onaakhala otteeliya wiirimu muaha wanamatheka owiituthuwa, wovirikanatho n'nhe tusuiini na naane tjihimphela wituthuuwa. ⁸ Walani nthiyanani, narina nsurukhuaawe khuumi wo parata, wam'moraka n'motja, khampharihela elampataawe, khankwetja m'paniwawe e arueelaka wowirattavelawene mpaka ophuanha? ⁹ Ni aphuanhaka vale, nawathukumaniha assipathaniaawe, amwattamanoaawe, yiraka: "Ntteliye nimi, kontha kihophuanha nsurukhuaaka wakirimelale". ¹⁰ Wo manan'na yaayo, kinawuhimeriani wiira, ohaavo otteliya eriyari wo malaikha aa Muluku wa natampi m'motja ni tuthuwa". ¹¹ Vano Yesu ahira: "Nlopwana m'motja ahaana assanawe eeli, ¹² onkaniuuyo ahowirela athumwane: "Paapa, nkivahe mphantiaaka wo mihakhu tjimphelaka ovahiya". Vano, yena ahokawela. ¹³ Ahinavira mahuku meentji, mwaana onkaniuule ahothukumaniha tjarinaawe tjoteene, ahorua elapo yottayi ni waphiyaliaawe n'we aholia mihakhutjawe tjootene athumaka tjithu tjahaphelawe a gastariki nsurukhuaawe wohitjuwaniaatja. ¹⁴ Wa gastaraliaawe woteene, yahokhumenla etala elapo yeele, ni yenani ahantja ovoliya etala. ¹⁵ Yena ahantja onvarela nteko nlopwana m'motja wa yeele elapoeele, wa mwirenliaawe avare m'mattani, aruaaka womolela ekuluwe. ¹⁶ Ni anophela olia ehalahalo tjikuluwe, kontha khavo anvaha eyoolha. ¹⁷ Yena ahupuwela vekhaawe ni ahiira: "Ananteko akavi arinaaya athumuanaka ahaana eyolha yintji, ni mi n'no kinkhua etala! ¹⁸ Kinaarua wa paapa ni kinaahala owiirela: 'paapa, kihonthekela Muluku e kihuthekelani nhuuva. ¹⁹ Akinphuanela okhala mwamwaninhu, nkitafiti ntoko nantekoeen'nhu' ²⁰ Vano muaavoanoole ahokuma ni ahorua wathumwaane. Narieene ottayi, athumwane yahomoona ni, otjaria ni thuunku, yahonthimakela, yahonkapatta ni yahoombejar. ²¹ Ni muanoole ahiira: 'Paapa, kihonthekela Muluku ni kihuthekelani, akimphuanela wihaniya muamuaninhu'. ²² Vano athumuaniaale yahowirela anantekoaale: 'Muakuve phiyaaru nmwaane ekuwo tjoreera muin'warihe, muinwarihe aneli nkokhoni wawenmo ni tjampali n'nani waweenmo. ²³ Ni n'mwanetho ebezerro yoneneva ni muiinve; nilhe ni nipanke esukuhuulu! ²⁴ Kontha mwamwanaka anookhua ni vano hovuweenla. Anorimeela ni hophuan'nha' Ni yahotteliya. ²⁵ Weratjon'mo mwamwanawe omulupale avara nteko omattani, wattamenlaawe owan'nhawe, ahin'wa onhakuliya wo musica nu win'natjiya. ²⁶ Yena ahomwiihana nanteko nmotja ahonkoha ethu yiiraniya. ²⁷ Nanteko ahakhula: 'N'himaa hohokoleela owaani ni, thimaana athumuanaa ahinva ebezerro yoneneva tjineneeyo, kontha yena hohokolia nkumi ni okhikitjeriya. ²⁸ Vano yena ahorussiya khaphelale okela . Vano athumwanawe yahokhuma ni yahonsonttelela wiira akele. ²⁹ Massi mwanoole ahowakhula, iraka: 'Muakhatjenen'nhava kihuvarelani nteko kikhalaka ntoko nantekoeen'nhu akivonhihale wakhalaka nlamulo ninhu; wanarieene tjonmo, khankivahale wanakhala epuri wiira kipanke essukuhulu nassipathaniaaka. ³⁰ Wakhala mwamwaninhu gastarale mihakhutjawe tjoteene naathiyana, hohokolia, vano nhuuva n'hinva parra yena ebezerro yoneneva'. ³¹ Massi athumwane yahomuakhula: 'mwanaka, we ori ni elee eri yawaka ni we yawaa. ³² Massi hivano nahaana nithapaka ni nitteliyaka, kontha n'himaa ari okhueene ni vano ovuweenla,ari orimela ni hophan'nha.