¹ Ni wahiraniatho esabado, owakathi Yena wakelaliaawe enupa yan'holeli omafariseu wira alhe nkathe, ayenatja yeera em'mwehaka. ² Vano ahavo Eriyariaawe nlopwana m'motja ahuva ni retta anowimpiya. ³ Yesu ahakoha amwinthutji okettelo ojudaica ni mafariseu: "Onathunihiya ovoniha nihuku nosabado, walani mena?". ⁴ Massi ayenatja yahokhalatja omaala. Vano Yesu ahonkussa, ahonvoniha ni ahomwirela arweeke. ⁵ Ni ahowirela: "Tipani wariyariwinhu, wakhala mwanawe walani emoopeaawe omorela n'himeni, khanhala orwa onkumiha wowakuvia, nihuku nosabado?" ⁶ Vano vavale, ayenatja khayamwakhulale. ⁷ Owakathi Yesu wawehaliaawe hata ni yaale yalattuliye wassukuhuluni yathanla ekhatera tjopatjera, ahattonkela nlikaniho nimotja, iraka: ⁸ "Mwalattuniya nihukun'no essukuhulu yothelaniya, nhonkome ekhatera tjoholela, poti okhala wira holattuliya nthu onttittimiho aholattuliya. ⁹ Wo wira ehikhumenle, owakathi nlopwana olattulale we ni yena, owa owirela: "Onvahe nipuro olava". Ni vano, nihaya, we ohana wonkoma ekhatera yomalela. ¹⁰ Wovirikanatho, walattuliyaka, orwe wonkome ekhatera yomalela, wo wira, wankelawe owa yoole olattulale, awireleke: "Mpathani, wonkomeke nipuro nowonania". Vano onahala ottittimihiya eriyari wathu otene olattuliya. ¹¹ Vano yoole nittittimiha nahala oyevihiya, vano yoole niyeviha nahala ottittimihiya". ¹² Yesu ahomwirela nlopwana anlattulale: "Wivahaka eyolia, ohiwihanele assipathania, walani assihima, hata assimutjia, mpaka amwattamano, wo wira nayena yolattula yuhokolossere tjitjan'mo. ¹³ Wapanka essukuhulu, walattule amassikhini, owuntakia, ohetta ni ohona, ¹⁴ ni onahala orerihiya, kontha ayena khanona yowuhokolossera. We onahala othuviya nihuku nin'hala ohihimuwa anassariya. ¹⁵ Winwaliaawe yeele, m'motja ari ni Yesu wa metja, ahomwirela: "Orerihiya thiyoole nolia eyoolia yo Mwene wa Muluku!". ¹⁶ Yesu, ahomwakhula: "Nlopwana ahothenkatja essukuhulu yulupale ni ahalattula athu entji. ¹⁷ Owakathi woliya, yena ahonruma nantekoawe owirela yaale yalattuliye: "Owin'ye, kontha eholikana". ¹⁸ Massi othene, wohathanla, yahantjera okhotta ni nruku. Opatjera ahira: "Kinothuma emattaka kimphela orwa woona. Soontte, okilevenle". ¹⁹ Nkhuawe ahira: "Kinothu emopetjaka thanu, ni kinkotteha. Soontte, okilevenle. ²⁰ Nkinakuuyo ahira: "Kinothela, phimana akim'mwa." ²¹ Nantekoole ahohokolia ohimia tjithun'ya wapatarawawe. Vano yahokhala orrusiya, ahomwirela nantokoole: "OKhume phiyaru orwe mapaka mparaparani ni eparasa yotene, wawaane vaa amassikhini, oheetta, ohoona, ni owuntakia". ²² Nantekoole ahiira: "Pwiya, yakirumalen'nhu kihopanaka, ni ahavotho mapuro". ²³ Patarawuule ahomwirela nantekoole: "Orwe mpaka mparaparani wakhanhenrihe oowa athuaayo okela, wo wira enupakeeyo ekhale yotjariya. ²⁴ Kinawuhimeria wira wayoole alattuliye essukuhuluaaka nahala olhatho ni mi eyoliaaka". ²⁵ Athu entji Yananthara. Yesu arukunuwaka, ahowirela: ²⁶ Akhala ahavo noowa ni Mi harusihe athumwanaawe, anumwaane, amwaraawe, mwanaawe, n'himaawe, mwanrokorawe ni mapaka okumiaawe, khanlamuliya okhala nrumeyaaka. ²⁷ Yoole hinkela okussa nsalapaawe ni Akitharaka khankhala nrumeyaaka. ²⁸ Vano tipani wa nhuva, aphelaka oteka enupaawe, wohipatjera wonkoma opankela ekontha ni onaka ethu emphela othumiya? ²⁹ Wira ehikhumenle, apatjeraka oteka puhikhuitiriki omaliha, otene yaale an'hala woona opatjera ontarawa, yiraka: ³⁰ "Ola nlopwanoola ahopatjera oteka khakhuitinri omaliha". ³¹ Walaani tipani mwene, aphelaka okhuma orwa owana ni mwene nkhuaawe, hinonkoma tokoni ovanela akhala wira nahala okhuitiri, nanakhoto ekontotjene khumi, owana ni mwene nowa nanakhotto ekontotjene miloko miili? ³² Ni, onaka wira khan'hala okhuitiri, anarieene ottayi, yena nawaruma athuaawe orwa olepela enan'na wopheela nrettele. ³³ Tjo, wakuta nthu hin'hiya tjotene khankhala Nrumeyaaka. ³⁴ Maakha oreera, massi, yamalaka yootjiveeyo, on'hala ohokoloseriya tjani yotjiveeyo? ³⁵ Khamphuanela poti okhala vathi hata wuntteliha. Anariheliya ota. Yoole rina maaru ophela win'wa, in'we".