¹ Athu ekonto ekontotjene, naale yaapwessanatja nthu ninkwaawe, antjale wuuluma naawiithutjiyaawe: Mwiirathavenle ni miropo tjaafaritji ari owootta. ² Khiivo ekhuneeliye ehin'hala wooniheriya; ni khiivo evithiye ehin'hala woonenliya. ³ Phimaana tjooteene tjuulumaleenhu mwiipiphini, tjinaahala wiiwiya vanthukoni; ni yuulumaleenhu n'mapaani, enaahala olaleiya watjulu enupa. ⁴ Kinawoohimeeryani, assimpwanaaka, n'hiwoove aniiva eruthu, kontta khaanoonatho yoophela ovara. ⁵ Massi miivano kinaahala woothoonherani n'haleenhu omoova; n'moove yoole, niira iivavale, haana ekuru yoonrweeha omooroni; aaye ola n'moove. ⁶ Khatjintumihiya enuni thanu nimisuurukhu miili? Ni wala n'motjaaya khaliyaliye ohoolo wa muluku. ⁷ Ni hata ekharari tjon'muruniwinhu tjooteene tjiri tjowaalikeliya; n'hoove, kontha, n'holemelihiya woovikana enuni tjintji. ⁸ Kinoohimeeryani ooteene yoole nkowiitjoonihera wameethoni waapinaatamu, tjitjon'mo mwaana anthu naahala wiitjoonihera ohoolo womalaikha owiirimu. ⁹ Massi nkookikhotha ohoolo waapinaatamo naahala okhothiya ohoolo womalaikha amuluku. ¹⁰ Ni wayoole n'hala wuuluma mwaha wa mwaana anthu, naahala olevenliya, massi wayoole nkooveeha n'nepa nthakathiifu, khan'hala olevenliya. ¹¹ Mwakussiya nrweehiyaka onuulumiya milathu, waahooleli nimakhulupale, n'hikuthakuthyee, yoorwaa wuuluma wala yowiira. ¹² Kontha n'nepa nthakathifu onaahala wuufunthani yoophela wuuluma. ¹³ Nthu n'motja waathuyaale aahiira: Pwiya, n'mwiirele mwaamun'naka wira naawayane mihakhu tjihiyeriyeehu. ¹⁴ Massi yena aahira: Mlopwana, tipani kikhalihale nassariya wala namakawaniha wanhu? ¹⁵ Ni aahowiirelatja: Muiirathavenle wira n'hissumke tjooteene tjowuuthepyani, kontha ekumi yanthu ttaatjiri nlathu wotjithu tjooreera tjiniiraawe. ¹⁶ Vano yesu ahaahimeeryatja nlikaniho n'motja iraka: Mlopwana n'motja ttaatjiri aahaana ematha ni aahoruwerya ventji. ¹⁷ Ni yena aahiikoha iraka: Akirina nipuro woosunka etjoolyatjaka, kiireke tjani? Yena aahiira: ¹⁸ Kiniira tjo: Kitankule makhupyaaka ni kiteke makwaawe moolupale wira kissunke etjoolyatjaka tjooteene ni tjooreera tjikwaawe. ¹⁹ Kihimeerye nrimaaka: Mrima, ohaana tjooreera tjintji tjoosumkiya, tjomyaakha tjintji, omumule, olye, owurye, ohakalale! ²⁰ Massi muluku aahomwiirela: Nan'malukuni ohiyuula onaahala woorimeela nrimaa ni tjithenkatjalyaa tjin'hala okhala tjapani? ²¹ Tjitjon'mo wiisunkatjera mihakhu, massi nimuluku khunakhala thaatjiri. ²² Ni aahowiiwerela awiithutjiaawe: Kinawoohimeeryani, n'hikuthakuthyee niikumitjinhu, wala en'haleenhu olya, wala mwiiruthuni, yoophela owara. ²³ Massi ekumi yoovikana eyoolya, niiruthu yoovikana yoowara. ²⁴ Mwaawehe anakhuku, khaanaala, walaa khan'hepha, khanoopuro woweessa tjithutjawe, walaa nikhupi; Massi n'luku nawaaliha. ²⁵ Ni tipani wanhu, nuukuthakuthyaawawe, nintjenra urekamawawe? ²⁶ Kontha mweehipankeke walaa niitthu yankaani, essiyani okhalaka ookuthakuthyaatja ni tjitthu tjuulupale? ²⁷ N'wehe ethutu, tjinun'nuwaaya, khatjin'vara n'teko, walaa khatjin'wara. Vano kinoohimeeryani wiira hata Salomao, waaryawawe wooteene, khawarale tokoo tjen'yo. ²⁸ Wakhalaka wiira n'luku naawariha ethutu, elelo tjiri n'matthani, meelo tjivyaaka, wiiretho nheenhuvaa atthu owaamini vakaani? ²⁹ Kontha, nhuuva, n'hikohe en'helenhu olya, wala en'haleenhu owurya, ni n'heetthe nkuthakuthyaaka. ³⁰ Kontha tjithu tjooteenen'nha, amalapo ontuniyani anaapanka, massi athumwaninhu owiirimu anaatjuwela wira n'naaphela tjithun'nho. ³¹ Massi n'rweele omwene wa n'luku, ni tjithun'nha tjooteene n'naahala win'tjenriya. ³² Nhoove, epwittipwithi yankaani, kontha athumwaninhu ohaatjivela mwaha wowoovahani omwene. ³³ N'tumihe tjirineenhu, ni mwaavahe anatjimola. Mwiipanke essunkero yohuuluvala, n'hakhu ohin'mala wiirimu, ohimphiya tthapaya, wala overa ohinkwanhulaaya. ³⁴ Kontha opuro on'hala okhala n'hakweenhu, nin'rimeenhu on'hala okhala vaavaa. ³⁵ Nkhale oowara essuntutjinhu, nimithuko tjipharelaka. ³⁶ Ni n'khale toko atthu ananriiha apwiya akhumaka ossukuhuuluni, wira yawavale, yaathaka nkhora, mwaahulele wowaakuvyaatja. ³⁷ Ooreeriya taale ananteko, yaayo, awiya wan'waaya, yaapwanhe awehawehaka, weekhweeli kinawoohimeeryatjani yena naahala owara, ni nahaala owookomihatja wameetja, ni aphiya, nahaala waavahatjera. ³⁸ Ni hata wan'waawe owehaweha wonayeeli, ni woneeraru, khwaapwanha tjitjon'mo, ooreeriya taala anan'tekhwaala. ³⁹ Ni tjitjon'mo, n'tjuwele, onari wira mwaneene enupa aanotjuwela owakathi tthapaya on'halaawe owa, yena khaahiya enupaawe ekeliyaka. ⁴⁰ Phimaana nhuuva nkhale ootthonkomanyaatja, kontha mwaana antthu n'hala owa owakathi wahuupuweleenhu. ⁴¹ Ni Pedro ahiira: Pwiya, n'nonihimeerya n'likaniihoola hii, walaa atthu ooteene? ⁴² Ni apwiya yaahiira: Tipani mweethihero eekhweeli ni owaamini, wayoole apwiya mwaminalyaaya wira ananteko, aavahe eyoolya owakathi wokhweeli? ⁴³ Ooreeriya tuule nantekoole, nkoopwanhiya naapwiya yawavale, iiraka tjitjon'mo. ⁴⁴ Weekhweeli kinoohimyeeryani, kinkooweessenrani mihakhutjinhu tjooteene. ⁴⁵ Massi nateko n'hala wira wanrimaniwawe: Pwiyaka naapitja owa, antjaka owaathakatja ananteko alopwana naathiyana, alyaaka ni awuryaka, ni ahapaliyaka, ⁴⁶ Apwiya anon'weela yoole nan'tekoole, nihuku nahaawehenraawe, nuuwakathi ohin'tjuwelaawe, naahala ohukhumwiya, wamotjaaru naatthu ohaamini. ⁴⁷ Ni nanteko aatjuwela otthuna waapwiya, ni khiitthonkomanihale, ni khavanre otthunawawe, naahala ohukhumwiya ventji. ⁴⁸ Massi yoole ahaatjuwela, ni varale tjoopwanela, n'hala ohukhumwiya vakaani. Ni wayoole n'koovahiya yiintji, naahala ovekeliya ventji, ni yoole khuluveliye ventji, naahala okhanhen'riya ventji. ⁴⁹ Kiwaale orihela mooro watthayani, ni en'halaaka otthuna, ekhaleke evyaaka. ⁵⁰ Massi miivano kihaana mpathisso wayooyo on'rwaaka opathissiya, ni okhala wira kiri ootjukulatja mpaka wan'maliheriyaaya. ⁵¹ Nhuuva n'nuupuwela wira kiwaanale n'rethele watthayani? Mena, mi kinoohimeeryatjani; kiwaanale okawanyaatja. ⁵² Kontha nen'navaa woorwaa ohoolo atthu athanu anaahala okawanyaatja enupa emotja; atthu araru owanihana naatthu eeli, naatthu eeli owanihana naatthu araru. ⁵³ Nan'yari n'hala okawanyaa nimwaamwaanawe, mwaana naathumwaane, anumwaane nimwaamwanaya, nimwaana naanumwaane, ntthu naamwara mwanawe. ⁵⁴ Niyena aahowirela atthu; mwawehaka mahuthe ntjulu n'niira: Enaawa epula; Nii enaawa. ⁵⁵ Ni mwawehaka ephyoo tjoovirikanatja, n'niira; elelo ninaaviha ntjuwa, ni tjitjon'mo onawiiranyaa. ⁵⁶ Alolo! N'naatjuwela ekhalelo tjowatthayani ni wiirimu, n'hintjuwelatja tjani owakathiyuula? ⁵⁷ Ni essiyani ohiiphukelaka milathutjinhu eri yoossariya? ⁵⁸ Kontha mweerwaaka nin'wananiinhu omilathuni, ntholathole manan'na oomaliha nlatho nin'thala, wira yena hoorweeheni waanassariya, hoorweeheni wankhulupale waanassariya, ni nkhulupale aanassariya hoorweehakani okalapoosso. ⁵⁹ Mi kinoohimeeryani khamun'hala okhuma nkalapoosso n'hikumihale nssurukhu woomalihera.