¹ Ahaavo nlopwana mmotja ehaniya Nicodemos n'holeli o majudeu. ² Yena ahon'wela Yesu ohiyu amwerelaka:Mwithutjihi, ninatjuwela wira omwithutjihi onkuma wa Nluku, kontha kaavo on'werya opanka mithoonyihero, Nluku ohikanle ni yena. ³ Yesu ahaakula: weekhwel, weekhweli kinawuhimerya: Nthu aahiyariye tho yena kanoona opewe wa Nluku. ⁴ Nicodemos piirawe: manannani nthu on'yariyawe onuuluvanle? yena onakitiri okela mmirimani wa numwanawe ni oyaryaa tho? ⁵ Yesu ahaakula: weekhweli, weekhweli kinawuhimerya wira ole ohinrwaa oyaryaa mmatjini ni munnepani kanrwaa okela opewe wa Nluku. ⁶ Ole onyariya nruthuni onkala erthu, ni ole onyariya munnepani onkala nnepa. ⁷ Ohitheeliye nlathu wo wira: Onaaphwanela oyariya thotho. ⁸ Ephyoo enawuthjelela onthunaaya, ni onamwiiwa ntjunaya; kontjuwela onkumaaya, hataa onrwaaya; tjoo piryaawe otheene onyariya munnepani. ⁹ Nicodemos ahaakhula, ni aahomwerela:'' Enkhala tjani yeeyo ethwiiyo? ¹⁰ Yesu ahoomwakula eeraka: We mwithutjihi o wi Srael, ni kuntjuwela ela? ¹¹ Weekhweli, weekhweli kinawuhimerya wira hinnyano ninuuluma nintjuwelehu, ni ninvahera osaahiti nonaleehu, ni kannokupali osaahitihu. ¹² Kihohimerani tjithu tjoovathi, ni kankupanli, vano mwinrwaa okupali tjani koohimeerani tjithu tjowiirimu? ¹³ Kaavo owenle wiirimu, ohikanle ole okuruwale wiirimu, mwaana anthu orii wiirimu. ¹⁴ Ni toko Moises waatesalyawe enwaa wuutakoni, tjitjammo mwaana anthu ohaana oteesiya; ¹⁵ wo wira otheene onrwaa onkupali ohikhwe, masi akalane okumi wohimala. ¹⁶ Kontha Nluku hofenta etuniya, mpaka wanvahalyawe mwanawe mmotja, wo wira yoole onrwaa okupali ohikhwee, masi aphwanhe okumi wohimala. ¹⁷ Kontha Nluku honruma mwanawe otuniyani, kahii wo wira alamule etuniya, masi etuniya yoopoliye ni yena. ¹⁸ Nonkupali yena kanlamuliya, masi hinonkupali orii olamuliyeene, maana kakupanli ntjina na mwaana mmotja a Nluku. ¹⁹ Ni nlamulo tinna: Wira nthuko ohowa wa tuniyani, ni athwayo afentalee ventji epiphi ohiya nthukooyo, kontha mitekotjaya tjaari tjootakala. ²⁰ Kontha oteenne yoole ompanka yootakala onthanya nthuko, ni kanwa onthukoni, wo wira mitekotjawe tjihivanyihiye. ²¹ Masi ole ompamka ekhweeli onwaa onthukoni, wo wira mitekotjawe tjimwaruseliye, kontha tjimpamkiya ni Nluku. ²² Wamalalyaya ela, Yesu ahoorwaa narumeyaawe, elapo yo Judeia; ni arii nayena vale, ni ampathusa. ²³ Ni nno Tjuwau aampathusa tjitjammo o Enon, wamotja ni o Salim, kontha yahaavo vale matji mentji, ni yanwaatja vale,ni yampathusiya. ²⁴ Kontha Tjuwau aari ohinavonyeriya nkalaposo. ²⁵ Waahokala, vano nkatjamiho mmotja eriyari yaarumeyi a tjuwau ni judeu mmotja, mwaha wo mpathiso. ²⁶ Ni yaahorwatja omulumana tjuwau, ni yahoomwirelatja: Rabi, ole aari ni nyu mphanthe nkina wo jorda, yooyo onvaheralennyu namooni, oneera apathusaka ni oteene anonrweelaa yena. ²⁷ Tjuwau ahaakula, ni eeraka: Nthu kanaakela ethu , woohivahiya wiirimu. ²⁸ Nyennyuvaa tanamoonyaka oyeele yiralyaaka: Minnyaano akihiyena cristo, masi kinoorumiya oholowawe. ²⁹ Ole orina mwaarawe onkala mwannawe; masi mpwanaawe onlpwana, ononwatjera, ni onmwinwa, onaatheliya ventji nlathu wo ntju nanlopwana, Vano vaa othawala waka woophiyela. ³⁰ Onaaphwanela yena wuunnuwa ni minnyaano ovukuwa. ³¹ Ole onkuma otjulu onkala owerya waathu oteene. Ole onkuma vathi onkala oovathi ni onuuluma tjithu tjoovathi. Ole onluma wiirimu onkala owerya wathu oteene. ³² Ni yena ele yoonalyawe, ni yiiwalyawe, yeeyo onaathonyihera; nikaavo onmwamini namoonyawe. ³³ Ole omwaminale namonyawe ,yooyo ohoneeha wira Nluku teekhweli. ³⁴ Kontha ole orumiye ni Nluku onuuluma tjithu tja Nluku, maana Nluku kanonphimela nnepaawe. ³⁵ Papawe onanfenta mwanawe, ni tjithu tjootene ohonvaha mmatataniwawe. ³⁶ Ole nonkuupali mwaana onakalana okumi wohimala, masi ole ohinunkupali mwaana kanrwaa woona okumi, masi orusiya wa Nluku onahala okala ni yeena.