¹ Vano Yesu watjuwelalyaawe wira ma farise yaahin--wa wira yena eera aapankaka ni aapathusaka arumeyi entji wo virikana ni Juwau ² (wookalaru wira kahiyena Yesu aapathusa, masi arumeyaawe), ³ Aahohiya o J udeya ni aahokolela o Galileya. ⁴ Waari woorerela yena ovira o Samariya. ⁵ Vano, aahowa epoma emotja yo Samariya yiihaniya Sicar, waathamela mapuro Jaco wanvahalyaawe mwanawe Jose. ⁶ Yaahavo vale emuro ya Jaco.Yesu aari owoothya niikwahele, ni aahookoma wakiviru niimuro. Waari owakati wo na sita. ⁷ Nthiyana mmotja o Samaria aahowa orika maatji, Yesu aahomwirela: "Okivahe kivurye"; ⁸ maana arumeyaawe yaahirwaatja opoma othuma eyoolya. ⁹ Vano nthiyana o Samariyoole aahomwirela Yesu: "Ntokoo we, ookanle njudeu, onkilepelaa mi kikanle nthiyana o Samariya, ethu yoophela ovurya?"; maana ma Judeu ni ma samaritano kayiiwanana. ¹⁰ Yesu aahakula: We onatjuwenle tjoovahiya tja Nluku, ni nthu onwiirela: Okivahe yoowurya". Ti we waarwaa onlepela, ni yena aarwaa woovaha maatji makumi". ¹¹ Nthiyanoole aahomwakula: "nlopwana, we kurina epariti, ni emuro ti yoowisa ventji; vano nipuroni waarwaa orika maatji makumi? ¹² Pooti we omuulupale woovirikana apaapehu Jaco, yaayo anivahale emuro avuralyaya nasaanaya ni nimatjatjaya? ¹³ Yesu aahakula: "Wo yoole onrwaa ovurya ala maatjyala onaahala ovoliya nthona tho; ¹⁴ vano wo yoole onrwaa ovurya maatji anrwaaka onvaha kanrwaa ovoliya tho nthona. Woovirikana, maatji kinrwaaka minnyano onvaha ankookala yaayo nipuro nomaatji ankuma weekumi yoohimala. ¹⁵ Nthiyanoole aahomwirela: "Nlopwana okivahe yaayo maatjyayo, wo wira minnyaano niikivoletho nthona, ni wira kiiwetho va orika". ¹⁶ Yesu aahomwirela: "Orwe, owiihane awannyaa ni ohokoleele va". ¹⁷ Nthiyanoole aahakula: "Nkirina awannyaka". Yesu, vano tamwiirelawe: "Ohulumatja saana wira: Minnyaano nkirina awannyaka, ¹⁸ maana waahana athanu, yoowo orinaa phiyaaru kahiyena awaa! ni yeeyo ohuluma ekheeli". ¹⁹ Nthiyanoole aahomwirela: "Nlopwana, kinoona ntokoo o namaloha. ²⁰ Annapaapehu yahoompepetja Nluku yoola mwaakola, masi nyu nnira wira o Jerusalem tiri opuro woophela opepetjiya" ²¹ Yesu aahomwakula: "Nthiyana, onaakikupali minnyaano, woophiya okati wo wira hataa ola mwaakola, hataa o Jesusalem kamwinrwaa opepetja Paapa, ²² Nyu nnopepetjaa nthu hinontjuwelennyu; hinyaano ninompepetjaa nthu nontjuweleehu, maana woopwa onwaa wo ma Judeu. ²³ Pimaana, okati oniira ophiyaka, ni ohophiya, wo wira anamapepetja okhweeli anrwaa onpepetja Paapa mwinnepani ni muukhweelini, kontha ti yaayo anamapepetjaayo paapa onkalaawe aapheelatjaka. ²⁴ Nluku nnepa, ni wo yaale anompepetja ahaana ampepetjaka mwinnepani ni muukhweelini". ²⁵ Aaheera nthiyanoole: "Minnyaano kinaatjuwela wira Messia oniira awaaka, yooyo oniihaniya "Cristo". Yena awaaka onaarwaa onihimeerya tjootene hinnyaano". ²⁶ Yesu aahomwirela: "Minnyaano ti mi, yooyo onuuluma ni we". ²⁷ Ni yoole owakatyuule arumeyaawe yaahowa ni yaahokala otikinihiya esiyani yaamulumanelawe nthiyananoole; masi kaavo ankoohale: "Ompheelatja esiyani? mena "ommulumanelani yena?. ²⁸ Vano, nthiyanoole aahohiya mwaapwaawyole, aahokolela opoma, ni aahowirela athwaale: ²⁹ Owinnye, mmoone nlopwana okihimeerale tjuyhu tjootene tjipankalyaaka, Kaarwaa okala yoola Cristo?". ³⁰ Ayena yaahokuma opoma okoomonanna Yesu. ³¹ Ekumenlaka eyo, amwithutjihi yiira anlepelaka: "Rabi, olhe". ³² Masi yena aahowirelatja: Kihaana eyoolya emotja yoophela olya nyu ehintjuwelennyu." ³³ Arumeyaawe yankohana yaayoru: Pooti ohaavo nthu onwaanenle ethu wiora alye?". ³⁴ Yesu aahowirelatja: "Eyoolyaka opanka othuna wa yoole okiwaanale, ni omalihera ntekwaawe". ³⁵ Nyu kamwiratjale: Tjinaahala nanlelo myeeri mitjesewo wira ophiye okati woohepha?. Minnyaano,vano,kinuuhimeerani wira nvuse mentwennyu ni moone mmamathani, maana tjrii tayaari wira tjihephiye! ³⁶ Yoole on-hepha onamwaakela ethikithi ni onthukumaniha mihokoroko tjeekumi yoohimala, wo wira onaala ni onhepha atheelatjiye wamotja. ³⁷ Pimaana, nlikaniho tineekweli: Mmotja ti naala ni nkhwaawe tin--hepha. ³⁸ Minnyaano koorumalenoi ohepha opuro muhivanrennyu nteko: ni akina aniira avaraka nteka, ni nyu nniira nkelaka mmitekoniwaya. ³⁹ Masamaria mentji o yeele epomeele yaahonkupaleela yena nlathu woosahiti wanthiyanoole: "Yena ohokihimerya tjoothene tjimpakalyaaka". ⁴⁰ Vano, masamaria wawaatjalyaya mpaka wa Yesu, yahoonlepelatja wira akhale naayena ni yena aahokala vaavale mahuku meeli. ⁴¹ Ni athu entji yaahokupali nlathu wo nuulumonawe. ⁴² Ayena yaamwirela nthiyanoole. "Hinnyaano nikupanlii, kahii wo moolumwaa pahi, masi kontha nihomwiinwa naasineneehu, ni vano nootjuwela wira ola weekhweli moopoli ontuniyani". ⁴³ Anavirale ale mahukwaale, aahorwa o Galileia. ⁴⁴ Kontha Yesu mwaneene ahohimya wira kaavo namaloha onthithimihiya elapwaawe. ⁴⁵ Vano yena waphiyalyawe o Galileia, ma Galileiu yaahomwakenla. Ayena yaahonatja tjithu tjootene tjaapankalyawe Yesu o Jerusalem osukuhuuluni, maana naayena yaahirwaatja osukuhuuluni yo Pascoa. ⁴⁶ Yesu aahowa tho oCana yo Galileia, wonwo waatatusalyawe maatji nipha. Ahaavo nanteko mmotja a mpewe, aawerennya mwanawe o Cafarnaum. ⁴⁷ Winwalyaawe wira Yesu aahokuma o Judeia ni ahokoleela o Galileia, aahorwa okoomonanna Yesu anlepelaka wira akhuruwele ni anvonihe mwanawe ahaanle vaakani okhwa. ⁴⁸ Yesu, vano aahomwiirela: "Mwiihoneneke tjookumenla, ni mitikiniho, nyu kamwinrwaa okupali". ⁴⁹ Nantekoole aahakula: Pwiiya nkuruwe nimii mwanaka ohinakhwa". ⁵⁰ Yesu aahomwiirela: Orweeke, mwanaa nkumi". Nlopwanoole aahokupali nuulumo Yesu nuulumalyawe, ni aahorwaa. ⁵¹ Okathi yena waakuruwelaawe, anantekwaawe yaahomphwanya, yiiraka mwanawe aari nkumi. ⁵² Vano yena aahakohatja nihukuni mwanawe waavonalyawe; ni aahakula: Ntjana ohiyu, okati wonaasapa, ethekusa phan-hiyalyaya. ⁵³ Athumwanawe mwanoole yaahaamineela wira waari yooyo owakatyuyo waahimyalyawe Yesuuyo: "Mwanaa orii nkumi"; Vano yena ni amutjaawe ootene yaahokupali. ⁵⁴ Ola waari ntikiniho wonayeeli wapankalyaawe Yesu okati waakumalyaawe o Judeia arwaaka o Galileia.