¹ Khin'hala okhalatho epiphi wayoole aari ootjukulatja. Mahuku okhalayi, Nluku aahohuluwa elapo yooZebulom niilapo yoNaftali; maana waviraka vaa, Ayena anaahla okhaliha yowaarya, okhuma opahari ohiya oJordao, noopuro atthu oottayi onkhalaaya. ² Atthu yeetta mwiipiphini ahoona nthuko muulupale; naale yaakhala muntthuutjini monookhwe, waahopharela nthuko. ³ Nhu n'hintjiviha elapo ni wintjenra ohakalala; ayena ahohakalala mwaha waawinhu, phanka tjintthapaaya owakathi woohepha ni phanka tjintthapaaya atthu yuntanaka tjitthu. ⁴ Mun'nokhala ookwanhula mirinttitjaya, phanka tjipankaleenhu nihuku na Midia. ⁵ Kontha tjoowaratjaya yaale yeetta nkhottoni ni tjooteene tjeettanaaya tjophome tjinaahala opahiya, phanka ekhuni. ⁶ Kontha mwan'hima honiyara, mwaana ovahiyeehu; nphwinko waatthu ori n'makhataniwinhu; ni ntjinaninhu nin'hala okhala: Nooreera noolaka, Nluku okuru, thumwaane aatthu araru, nkhulupale onrettele. ⁷ Ohoolelawaya ninrettelyaaya khun'malatho; ohoolelawaya on'hala okhala neehitje ya Davi noomwenyaawe, wiira ankhalihere niissariya nin'nema, okhuma nen'nava ni womahuku ooteene. Nfento naApwiya ninaahala opanka tjon'mo. ⁸ Apwiya yaahoveleeliha nuulumo waJaco, ni naahomorela wiisrael. ⁹ Ooteene anaahala otjuwela, wamotja ni Efraim naatthu ankhala oSamaria, ninrimaaya an'niira: ¹⁰ Etitjolu tjihomora, massi ninaahala oteka nimaluku oolipa; ni tjikhwaawe tjihomora, massi ninaahala weessenra wanipuroniwaya. ¹¹ Phimaana, Apwiya anaahala okhala naayena awanani oRezim ni anaahala waamoriha awananyaaya. ¹² Asirio ookhopela nimafilisteu oohitto anaahala ontankula Israel nimalakwaaya. Watjooteene, orussiya waApwiya khun'hala orukunussiya, nintatanaya ninaahala otaphuliya. ¹³ Atthu khayaahokoleelale yaaphwanhale, wala khayaarweelale Apwiya aatthu ooteene. ¹⁴ Phimaana, Apwiya anaahala othikila murwaaya nimwiilaaya, nrittaaya nintithaaryaaya, nihuku nimotja nen'no. ¹⁵ N'hooleli naatthwaawe phimuru; nrumeyi nssomiha tjowootha phumwiila. ¹⁶ Atthu aneettiha atthwaala anawaahiiha nttala, ni yaale aneettiheriya ni yaayo anaamiriya. ¹⁷ Phimaana, Apwiya khan'hala otjiveliya naananttonpyaaya, wala khan'hala woonela ekiriri ekhwaatjuni naanankhweli, woona wiira ooteene alolo ni anhali, nimalakwaaya anuuluma tjoohiloka. Hata tjitjon'mo, orussiyawaya khumaalale, nintatanaya ninkhala nootaphuliya. ¹⁸ Yootakhala enaapaha phanka mooro, onaapaha miri tjon'mwiini, wuunuwaka nphwinko womwiissi. ¹⁹ Mwaha woorussiya waApwiya, etthaya enaapahiya ni atthu ankhala phanka tiitjele wamooroni, khaavo ntthu nomoopola mun'nawe. ²⁰ Ayena anaahala okhala niyoolya ni nanlelo anaahala okhala niitala, anaahala olya eyoolya, massi khin'hala waatossa. Khula ntthu n'hala opheela okhuura enama yomoonwaawe. ²¹ Manasses n'hala onkhuura Efraim ni Efraim n'hala onkhuura Manasses, ni ooteene anaahala onkhumenla Juda. Massi, hata tjitjon'mo, orussiya waApwiya khun'hala omaala, kontha ntatanaya nin'hala okhala nootaphuliya.