¹ Apwiya yaahokiirela: Okusse ethaapwa yuulupale ni wantikhe mon'mo: Maer-Salal-Has-Baz. ² Kinaahala waalattula atthu wiira akikhalele namoona, kinaahala omwiihana Urias, nankuttho, ni Zacarias, mwaana Zeberequias. ³ Kihorupa naamwaaraka, ayena ahorupala ni ahon'yara mwaana. Vano, Apwiya yaahokiirela: Onvahe ntjina na Maer-Salal-Has-Baz. ⁴ Kontha mwaanooyo hinatjuwela wiira paapa wala maama, mihakhu tjoDamaco ni tjookussiya oSamaria tjin'hala orweehiya wamwene oAssiria. ⁵ Apwiya yaahaakulela okuulumana: ⁶ Kontha atthwaala anookhotta maatji oomaala ooSiloe, ni yaahohakalala ni Rezim ni mwaana Remalias, ⁷ Apwiya anaahala onkurussela maatji on'muro mwene oAssiria ni waaryawawe wooteene, an'hala olovola munkhuma maatji mooteene. ⁸ Murooyo on'hala ovira oJuda ni onaahala wiissa npaka wanphiyaaya nsssikoni. Onaahala otjara nookhuneela etthaya yooteene woomalela, ohh Emanuel. ⁹ Nhu atthu, n'naahala okwanhulatjiya! Ooteene nhu n'nokhala mapuro oottayi: nrwee okhottoni, massi n'naahala okwanhulatjiya; hata n'nari owiitthonkomanihera okhottoni, n'naahala omalihatjiya. ¹⁰ Hata npanke enpankeenhu, khin'hala oloka. Hata nkumihe nuulumo, khiivo en'hala wiiwenliya, kontha Nluku ri nihiivano! ¹¹ Kontha Apwiya, nintatanaya nookilipihera, ahokiirela wiira kiheette munttalani mwaatthwaala, yiiraka: ¹² Ohikutakuthyee, phanka atthwaala; ohoove tjinoovaaya, ni ohikhale owoopopihiya. ¹³ Apwiya phanpheelaa wiittakattifiha; okhaleke owoova ayena, kontha phaayena paassi anpheelaa owoova. ¹⁴ Ayena anaahala waavarenla, massi nin'hala okhala phanka nluku noothererya ni mwala woohilipa wotthoko piili tjowiisrael, ni nryankho waatthu ooJerusalem. ¹⁵ Entji anaahala otherekuwa noomora; ni anaahala okwanhulatjiya, noovarakatjiya. ¹⁶ Onssunke ratta namoona, otthukele tjowantikhiya, waavahenre arumeyaaka. ¹⁷ Kin'hala ownriiha Apwiya, anvitha ekhovyaaya ntthoko naJaco, ni kinaahala ossunka ninkhuluvelo. ¹⁸ Nkaweha! Kiriiva, naassaanaaka Apwiya akivahalyaaya, omithoonhero nimiiriirya wiisrael, wonphantte waApwiya aatthu ooteene, ankhala omwaako Siao. ¹⁹ Mwahimeeriyavale: N'naarweela anamatjitta naananhanka, yaale anvara tjitthu tjoohiloka! Wakhala tjon'mo atthu khayaahala wuulumana anlukwaaya. Khayaahala wuulumaniya atthu okhwa mwaha waatthu akumi. ²⁰ Mwarumenle: Npheelatje ekettelo ninamoona! Mweehuulumatje enan'na yeeyo, onoonanyaa wiira khaarina nthuko. ²¹ Ayena anaahala okhala niitala yuulupale nimahuviho. Yakhala niitala anaahala orussatjiya, ni wooweha ntjulu, anaahala ontakhaliha mwenyaaya niNlukwaaya. ²² Ankoowehaka elapo ni ankoowehaka mahuviho, epiphi nootjikulatja woohuva. Ni anaahala ovavaressatjiya.