¹ Mahuku aAcaz, mwaana Jotao, mwaana Uzias, mwene oJuda, wiiranyaale wiira Rezim, mwene oSiria, ni Peca, mwaana Remalias, mwene oIsrael, yaahorwaatja oJerusalem wiira yawanane, massi khaakhwitiratjale. ² Nuulumeliye ntthoko naDavi wiira Siria aataanale ni Efraim. Nrimaawe ninrimaaya atthwaawe tjaaheenheenha, phanka miri tjineenheenhaaya niiphyoo. ³ Vano, Apwiya yaahomwiirela Isaias: Okhume ni mwaamwanaa Sear-Jasube wakumaane ni Acaz, woomaleloni wotanki yuulupale, nttala wonphantte onkatthiya. ⁴ Waahimeerye: Wiira yiikhikitjere ni wiimaalihe. Ohoove wala ohikutakuthye mwaha wokhuni piili tjomwiissi; wala mwaha woorussiya Rezim ni Siria, wala mwaha wa Peca, mwaana Remalias. ⁵ Siria, Efraim ni mwaana Remalias npheelaka woopankani yootakhala, iiraka: ⁶ Nttwee nin'wanane Juda; nipheelatje wiira nihooleliye nimweneehu, mwaana Tabeel. ⁷ Apwiya aniira: Eyo khinkhala, ni khin'hala wiiranyaatho, ⁸ Siria n'hooleliya ni Damasco ni Damasco nkhulupalyaawe Rezim. Womyaakha tjookhalaaka sapiini nathanu, Efraimnaahala okwanhulatjiya ni naahala waahiya atthwaawe. ⁹ Efraim n'hooleliya ni Samaria, ni nkhulupalyaawe Samaria mwaana Remalias. Mweehikhale oolipa mowaamini, weekhweeli, khamun'hala okhala oolipa. ¹⁰ Apwiya yaahomwiirelatho Acaz, yiiraka: ¹¹ Waavekele Apwiya nthoonhero, Nlukwaa; nthoonhero on'hala woolipihera mooteene. ¹² Vano, Acaz aahaakhula: Akin'hala olepela, wala akin'hala waattehatteha Apwiya. ¹³ Vano, Isaias aahaakhula: Kihiiwa, ntthoko na Davi. Khunuutossani olawihatja ovilela waatthu. N'nopheela nanlelo onttehatteha Nlukwaaka. ¹⁴ Phimaana Apwiya anaahala woovahani nthoonhero: Nun'mwaari naahala orupala non'yara mwaana, ni yooyo naahala wiihaniya Emanuel. ¹⁵ Yena n'hala olya eleeti nooravo npaka wantjuwelaawe ohuluwa yootakhala athanlaka yooreera. ¹⁶ Kontha mwaana hinatjuwela ohuluwa yootakhala athanlaka yooreera, elapo yomamwene eeli, yaayo anooveenhu, enaahala omorihiya. ¹⁷ Apwiya anaahala woowiihera atthu, nintthoko naathumwanaa, phanka mahuku yaarya ohinoona, okhuma mahuku Efraim nihiyanalyaawe ni Juda Ayena anaahala woowiiherani mwene owaAssiria. ¹⁸ Owakathi yoole, Apwiya anaahala wiihana ephenpele tjon'muro tjowiitjiipitu ni mamololo elapo yo Assiria. ¹⁹ Tjinaahala owa ni tjin'hala olukama npaani, ni n'mamwala, n'mataakhuruni, ni n'matakhwani mooteene. ²⁰ Owakathi yoole, Apwiya anaahala omwiihana mwene owaAssiria ohiya emuro Eufrates, wiira akasse muru, tjitjon'mo nimapuruuru on'mettoni nookuha erori. ²¹ Nen'no nihukun'no, ntthu naahala ohuwa mihuwo, ²² ni mwaha woleeti yintji, yena naahala olya, kontha ooteene yoole nkoohala naahala olya yooreerela nooravo. ²³ Owakathi yoole, nipuro naakhala tjooruweriya ekonto wohissapu yo konto tjoparatha, khin'hala okhala etthu woohikhala miiwa. ²⁴ Atthu anaahala okela mon'mo wiira atothe nimattheeryaaya, kontha elapo yooteene en'hala otjala miiwa. ²⁵ Ayenatja an'hala okhala ottayi womapuro ooteene yaalimaaya niihipa, mwaha wowoova ni mwaha womwiiwa; massi nin'hala nipuro emope niinama tjin'halaaya olya.