¹ Mwaakha okhwalyaawe mwene Uzias, kaahowoona Apwiya anookomale weehitjeni; ni nlayanaya naanootjala npaani. ² Watjuluwaya, yaahaavo malaikha; khula nlaikha naahaana mapupha sita: meeli yaakhuneela owiitho, meeli yaakhuneela enhaa, ni meeli yaavavanaaya. ³ Nintjuu nuulupale, yiiratjo: Ttakattiifu, ttakattiifu, ttakattiifu phaApwiya aatthu ooteene! Elapo yooteene enootjara waaryawaya. ⁴ N'mamikhorani niiwanyaa ntju naakhuwelaaya, ni enupeeyo yaahotjara mwiissi. ⁵ Vano kaahiira: Kihotakhaliya, kontha kihorimeela! Kontha kintthu oohiphwanela ni kinkhala naatthu oohiphwanela, ni meethwaaka ahaaweha amwene, Apwiya omalaikha! ⁶ Vano, nlaikha nimotja naahokiweela, n'matataniwaya enakusale etthu yaakumihalyaaya waaltaare niireerelo emotja. ⁷ Naahokwanha malakwaaka ni naahiira: Nkaweha! Ereerelweela ehokwanha malakwaa, tjoovaratja tjihokumihiya ni tjookossatja, tjiholevenliya. ⁸ Kaahiiwa ntju naApwiya niiraka: Tupani n'halaaka onveleeliha. Tupani n'hala onihoolela. Vano kaahiira: Kihavi miivano, nkirume. ⁹ Ayena phiiraaya: Orwee ni waahimeerye atthwaayo: N1naahala wiiwa, massi khan'nohala otjuwelela; n'naahala woona, massi khan'nohala otjuwela. ¹⁰ Nlipihe mirimatjaya atthwaala; maarwaaya ahiiweke, ni meethwaaya, ahooneke, wiira ahooneke ni meethwaaya, ahiiweke nimaarwaaya, ahitjuweleleke ninrimaaya ni ahikhaletho avonaka. ¹¹ Vano phwiiraaka: Apwiya, ankookhala mahuku makavi. Ayena phwaakaakhulaaya: Npaka epooma tjoteene tjikhale woohaatthu, etthoko tjooteene tjihale woohaatthu niilapweeyo ekhale woohiitthu; ¹² ni npaka Apwyiya yaarweehele atthu ottayi, ni elapweeyo ekhale woohin'nema. ¹³ Hata wan'halaaya atthu nphantte wonakhuumi, enaahala okwanhuliya; phanka tjinkwanhulatjiyaaya tjitthu tjikhwaawe, tjihalaka ekhokolotjaya, tjitjon'mo epyoo ttakattiifu en'hala vaavaa.