¹ Kinaahala omwiipela ntjipo nimotja npwanaaka nonfento mwaha womatteenhu. Npwanaaka aarina ematta ni nthala nooreera. ² Yena aahothipa, aahokumiha maluku ni aahaala ni yoolya yooreeressa. Aahotekenla wiira hikhale n'hala okela. Yena anriiha wiira naahala oruwerya tjitthu tjooreera, phimaana, aahoruwerya etjoolya tjon'mwiini. ³ Vano, atthu o Jerusalem ni atthu o Juda, nkilamule niimattaka. Yaahala ovariyatho essiyani ehivaralyaaka. ⁴ Wanriihaaka etjoolya tjomaana, oruwenryeni etjoolya tjon'mwiini. ⁵ Vano kinaahala woohimeeryani en'haalaaka wiiriha emattaaka: kinaahala okumiha mataakhuru ooteene nookhaliha nipuro noolya enama; kinaahala okwanhula eluwaniinhu noomorossa yooteene. ⁶ Kinaahala okwanhula, khin'hala olimiyatho; nin'hala okhala phanka nipuro noothamiya, ni kinaahala wiirela mahute wiira epula ehirupe. ⁷ Kontha ematta yaApwiya yaatthu ooteene ntthoko nowIsrael, ni atthu ooJuda nreerelwaaya. Ayena yaahanriiha wossariya, massi, ohiyavaa, waanokhwiya; yaahanriiha nin'nema, massi waahaavo wunliya tjinene. ⁸ Ootakhaliya phaale antakaneela ntthoko nintthoko, ematta niimatta, npaka wahin'halaaya nipuro, yiitjoonaka okhala assineene elapo! ⁹ Awiya aatthu ooteene ahokihimeerya wiira etthoko tjintji tjin'hala okhala woohiitthu, hata etthoko tjuulupale tjin'hala okhala woohaatthu. ¹⁰ Kontha ematta yomope khuumi en'hala okhala eliituru ssiriini napiili tjonipha, ni eliituru emiya piili wossiriini tjopyoo tjin'hala oruwerya eliituru ssiriini napiili. ¹¹ Ootakhaliya phaale anvuwa owitjissu apehenryaka nipha noohapala, yaale aniipitjapitjiha ohiyu npaani npakha waakhwitiri nipha! ¹² Ayena anpanaka essukuhuulutjaya ni tjoruma, ninipha; massi khaanuupuwela nteko waApwiya, wala khaanaamini tjoovara tjon'matataniwaya. ¹³ Phimaana atthwaaka ahotthukeliya mwaha wowaahaleela otjuwela; atthwaaya ari niitala, ni atthu akhwaawe khaanoona yoowurya. ¹⁴ Phimaana, ekhapure ehintjenra opheelawaya olya ni ahohula malakwaaya; ahoolelyaaya, atthwaaya, akhulupale naassaana, naale anthyaa naayena anaahala okela nkhapure. ¹⁵ Ntthu naahala okokhora ni ntjoko onaahala wiiyeviha; meetho aakhulupale anaahala okurussiya. ¹⁶ Apwiya aatthu ooteene anaahala ovuwihiya niissariyaaya, ni Nluku, ttakattiifu, naahala wiithoonhera ettakattifu niissariyaawe. ¹⁷ Vano epwittipwitthi tjinaahala ohakheliya, ni enama tjinaahala ohakheliya phanka atthu oottayi. ¹⁸ Ahotakhaliya yaale anvara tjoovara, ni anpurula etanpi! ¹⁹ Ahotakhaliya yaale aniira: Nlukuuyo aakuvatje, arussiye wowaakuvyaatja noone enpheela wiiranyaa; tjootthuna tjattakattiifu Israel tjaattamenle,wiira nitjuwele! ²⁰ Ahotakhaliya yaale aniihana yootakhala yooreere ni yooreera yiihanaka yootakhala; epiphi ankhaliha nthuko ni nthuko ankhaliha epiphi; yoowaawa anoona onaa yonaa anoona owaawa! ²¹ Ahotakhaliya yaale aniitjoona otjuwelatja ni alolo mootjuwelatjanimwaya! ²² Ahotakhaliya yaale aniitjoona okhala ossineene noovurya nipha ni ofunti wootakanihatja mapha; ²³ yaale anaakhavihera anamakossa, ni yaakhaka tjawaya atthu oohitjuwela etthu. ²⁴ Tjitjon'mo phanka mooro tjinpahaaya, ni phanka ekokhola tjinvyaaya, tjitjon'mo miraitjaya tjinaahala wuntta ni ethutwaaya enaahala okhala ntthupi. Kontha ayena ahokhotta ekettelo yaApwiya aatthu ooteene ni ahotanhifu nuulumo nattakatttiifu Israel. ²⁵ Phimaana, orussiya waApwiya opharenle mwaatthwaaya, ni ayena yaaweheehale yaayo ni ahaattarussa; myaako tjin'nottettemela, ni erutthutjaya tjinkhala phanka ekokhola n'mittalani. Wanookhalaru watjitthu tjooteene, orussiyawaya khun'malatho, ni ntatanaya ninkhala nootaphuliya. ²⁶ Ayena anaahala weemessa nthoonhero nlaponi tjoottalivana ni anaahala waakhuwela ari moomaleloni elapo. N'mwehe, anaahala owa wowaakuvyaatja. ²⁷ Eriyaryaaya khaavo owootjyaa; khaavo tjinon'vola ekhove ni khaavo nrupa; wala essuntutjaya khatjinootjyaa, wala naakorontyaaya khankwattuwa; ²⁸ mattheeryaaya phonthonkoliya, ni mikukutthatjaya tjineetta phanka ephyoo. ²⁹ Onhakulawaya on'hala okhala phanka kharamu. Anaahala onhakula phanka akharamu ooyevatja; anaahala onhakula noovara enama tjiniiviya niimatjikhwaaya, ni anaahala okussiya ottayi, woohikhala ntthu oopheela waakiha. ³⁰ Nihuku nen'ne, anaahala onhakula tjinene, phanka onhakula wopharyaa. Akhala ntthu awehaka ettaya, n'hala woona epiphi noohatjuwa, kontha nthuko onaahala oripela nimahutte.