¹ Ahotakhaliya yaale ankumihatja ekettelo ni anantikha malamulo oohikhala. ² Ayena anaawinkitthela essariya atthu oohuva, anawin'yera tjowaaphwanela amassikhinyaaka, anaawin'yera anankhweli ni anaahuvihatja ekhwaatjuni! ³ N'nohala opankani nihuku noophukiya milattu okwanhuwatja owaaka ottayi. Tupani n'haleenhu ontthawenla wiira ookhavihereni, ni mihakhutjinhu n'nohala ohiya vayi. ⁴ Khiivo en'hala ohala, n'nohala othaniya naanantthukiya wala n'nohala omora phanka atthu ookhwa. Watjooteene, orussiyawaya khun'hala omala ni ntatanaya nin'hala okhala nootaphuliya. ⁵ Hotakhaliya Assiria, orussiyawaka, nkopo yooyo oneettanaaka mookassiriyawaka! ⁶ Kinveleelihera elapo yoohitthuna etthu, waatthu antanhifu orussiyawaka. Kinoowiirela wiira akusse tjooteene tjirinaaya, waakussa ootthukelia ni waanhakela phanka etthu yoohiloka. ⁷ Massi khunakala otthuna wa mwene oAssiria, wala khunakhala muupuwelelwaawe; wanrimaniwawe ori opheela okwanhulatja elapo tjintji. ⁸ Kontha yena niira: Akhulupalyaaka ooteene khaanakhala mamwene. ⁹ Calno khavirikan'ne ni Carquemis. Hamate khavirikan'ne ni Arpade. Samaria khavirikan'ne ni Damasco. ¹⁰ Tjitjon'mo phanka ntatanaka yaatthemalyaaya mamwene eethiru, yaayo yaakokhorenle attontto waahiya ooJerusalem ni ooSamaria, ¹¹ tjitjon'mo tjipankalyaaka oSamariya naattonttwaaya woohaakhaliha etthu, akin'hala opanka tjitjon'mo oJerusalem naattonttwaawe. ¹² Apwiya yamaliha ntekwaaya omwaako Siao ni Jerusalem, anaahala wiira: Kinaahala ottarussa nrima woohiloka wamwene oAssiria noowehawawe woohiloka. ¹³ Kontha ayena aniira: Eriyari wokurutjaka nootjuwelatjawaka, kihovarela nteko, kontha kinawiiwa; kihokumiha wiinano tjaatthu, kihin'ya mihakhutjaya, phanka ntthu ooweryessa, kihaamoriha atthwaaya. ¹⁴ Ntatanaka nihokussa mihakhu tjonlaponi, phanka epuuru, phanka ntthu nttottela mootje oohin'ya, kiholokotthela elapo yooteene. Ni khaavo kwanhulale enupatjaya, wala tthukulale malakwaawe, wala ttokuttale. ¹⁵ Eheko ehaana ekuru wonvkana varenlale. Saroti nawiitjeenheenhiha woohikhala ole nonvarenla. Phinkhalaaya phanka nkopo opheelaka onvussa nvussa, wala nkopo opheelaka onvussa ntthu. ¹⁶ Phimaana, Apwiya aatthu ooteene anaahala owootjeehatja anakhotto; vathi wowaaryawaya, onaahala opharela mooro. ¹⁷ Nthuko owiisrael on'hala okhala mooro, ni ttakattiifwaaya, nlumi nomooro; onaahala opaha mtaakhuru wonihuku nimotja. ¹⁸ Apwiya anaahala opwetessa waarya weetakhwaaya niitthaya yaaruweryaaya, erooho niirutthu; on'hala okhala phanka ekumi yantthu ooweren'ya yiirwaaka. ¹⁹ Miri tjinkoohala ntakhwani tjinkookhala vakaani, mwaana tjin'halaawe okhwitiri waalikela. ²⁰ Nihuku nen'ne, atthu owiisrael yaahanle, amutji aJaco yaatthawale, khayaakhuluvenletho yaale yaatthemale, massi weekhweeli yaakhuluvelale Apwiya, ttakattiifu owiisrael. ²¹ Atthu yaahanle aJaco anaahala waakulela waNluku oowerya tjooteene. ²² Atthu owiisrael hata wankhalaaya phanka n'hava woopahari, oohala n'motja paassi phin'hala waakulela. Okwanhuwatja ohokhomeliya, phanka tjinvariyaaya niissariya. ²³ Kontha Apwiya anaahala omwaressela okwanhuwatja wolapo yooteene. ²⁴ Phimaana, Apwiya aniira tjo: Atthwaaka ankhala oSiao, n'hiwoove atthu oassiria. Ayena anaahala woohoolelani niwookhalihatjani epottha, phanka meetjiipitu tjinpanakalyaaya. ²⁵ N'himoovatje, kontha owakathi vakaani onhoonhiwaka jinhu onaahala omala ni orussiyawaka on'hala okhala naayena. ²⁶ Owakathi yoole, Apwiya anaahala waattarussa phanka tjantthemalyaaya Midia omwala Orebe. Ayena anaahala ovussa nkopwaaya nphantte woopharyaa, phanka tjipankalyaaya wiitjiipitu. ²⁷ Nihuku nen'ne, nrintti onaahala okumihiya nssikonimwaya ni nkhovaaya onaahala pkwattuwa nssikonimwaya, mwaha wowiittivala. ²⁸ Awanani an'hala okhumenla oAiate ni an'hala ovira oMigrom; ekarumatjaya assunkale oMicmas. ²⁹ Ayena yaahotupanihatja ni yaahomakatja oGeba. Atthu oRama yaanaathukumela ni Gibea ookhopela aahotthawa. ³⁰ Munle tjinene, we mwaana Galim! Wiiweehe, we Lais! Massikhinyaa Anatote! ³¹ Madmena niira atthawaka, ni atthu ooGebim aniira antthawenlaka woopheela onkhavihera. ³² Olelo awanani anaahala weemela oNobe waattamenla mwaako wa mwaana aSiao, mwaako wooJerusalem. ³³ Apwiya, anaahala orihela ota miritta noonhakula ventji; miri tjuulupale tjinaahala omorihatjiya nitjowuunuwessa tjinaahala othikilatjiya. ³⁴ Ayena anaahala okwanhulatja etakhwa niiheko, Apwiya anaahala opanka tjon'mo nooweryawaya.