¹ Nritta n'motja on'hala ophuwela niikhokolo ya Jesse, ntaakhuru nimotja ninaahala wuunuwa nintithaaryaaya. ² N'nepa waApwiya on'hala okhala niyooyo, n'nepa wowiiwa nootjuwelatja, n'nepa woofunttiha noowerya, n'nepa wowiiwa noowooova Apwiya. ³ Otthunawawe on'hala okhala owoova Apwiya. Ayena khan'hala olamula enoona meethwaaya, wala khan'hala opanka tjiniiwa maarwaaya. ⁴ Ohiya vaa, ayena an'hala waalamula amassikhini niissariya ni anaahala ovara, niissariya, mwaha waatthu owiiwelela elapo yovathi. ⁵ Ayena anaahala ottarussa elapo nimalakwaaya, niiphyoo tjon'mwaanowaya, anaahala omwiiva nlolo. Essariya en'hala okhala nlipiherwaaya, ninkhavihero, nlipihero woorukureerya n'yununimwaya. ⁶ Kharamu n'hala okhala niipuri, niinama tjoovirikana tjin'hala okhala vamotja. Mwan'hima naahala weettihera. ⁷ Emope ni ursu tjinaahala weetta nkhayi, assaanaaya an'hala orupaathi nphantte wankhwaaya, kharamu naahala olya malassi phanka emope. ⁸ Mwaana naahala othuka watjulu mwiithe wonuaa ni mwaana oohiya waamwa naahala weessa ntatanawe mwaano wonuaa. ⁹ Khaavo n'hala orakaliha wala okkwanhula ntjinanaka ttakattiifu; kontha elapo en'hala otjara otjuwelatja waApwiya, phanka maatji tjinkhuneelaaya epahari. ¹⁰ Nihuku nen'ne, ntithaari wa Jesse on'hala okhala phanka nthoonhero waatthu. Elapo tjooteene tjinaahala opheelatja, ni nipuronaya noomumula nin'hala okhala nowaarya. ¹¹ Nihuku nen'ne, Apwiya tootho anaahla otaphula ntatanaya wiira yoopole atthwaaya oohala, ahanle oAssiria, wiitjiipitu, oPatros, weetiopia, oElao, oSinar, oHamate ni nmakissiro mopahari. ¹² Ayena anaahala ovussa nthoonhero nlaponi mooteene ni anaahala waakussa owiisrael ni ootthawanatja oJuda okhuma malootho oomatjesse onlaponi. ¹³ Ayena anaahala omaliha nttima noEfraim ni tjoovara tjoJuda tjinaahala omalihiya. Efraim khan'hala omoonela nttima Juda, ni Juda khan'hala omoonela nttima Efraim. ¹⁴ Ayena ankowaawanana mafilisteu nphantte woohitto, ni nkhayi anaahala waahukheratja atthu ootjulu. Ayena anaahala waawanana Edom ni Moabe, ni atthu oAmom anaahal wiiwenla. ¹⁵ Apwiya anaahala okwanhula epahari yowiitjiipitu. Niiphyoo yoopharela, ayena anaahala orukunussera ntatanaya npphantte womuro Eufrates ni anaahala okawaniha miphantte saapa. Tjitjon'mo onaahala olapuwiya ninaakoronti. ¹⁶ Enaahala okhala eparapaara waatthu an'hala ohokolyaa waAssiria, phanka tjaapankiyaawe Israel akhumaka wiitjiipitu.