¹ Apwiya pniiraaya: Niri vayi nikhanta nonimwalane, ninaamwalanaaka anumwaninhu. Wala atthuni ookipheela yootumihenryaakani. Nkawehani, nhu ntumihiye mwaha wotanpitjinhu ni, mwaha womakhalelweenhu, anumwaninhu ahoomoliya. ² Hikhalenleni ntthu okathi ophiyalyaaka. Haakhulenleni ntthu okathi wiihanalyaaka. Ntatanaka naanookhuvyaa wiira niwoopoleni. Akaarina ekuru yoopheela owoopolani. Nkawehani, otthukelawaka, kihuumiha epahari; Kinaatatussa mwaamuro othako; ehopa tjin'nokhwa mwaha woothwaa maatji ni tjin'nuntta. ³ Erimu kin'nowariha epiphi; kin'nokhuneela niissaakho. ⁴ Apwiya ahokivaha nlimi phanka yaale anssomiha, wowiira kuulume moolumo onlipihero waatthu owootjyaa. Ayena an'nokikhaliha khula owitjissu, ayena an'notthukula maarwaaka wiira kiiwe hanka yaale anssomihiya. ⁵ Apwiya ahotthuka maarwaaka ni akaahanhurihale, wala akihuluwale. ⁶ Kihaarerya ettuli yaale akirakalihale ni akinoonan'na yaale akumihale eroryaaka. Akivithale ekhovyaaka mooruwaniyani ni moossuweliyani. ⁷ Kontha Apwiya anaahala okikhavihera. Phimaana, akin'hala ohittittimihiya; phimaana, kiheessa ekhovyaaka phanka mwala, kontha kinaatjuwela wiira akin'hala woona ehaaya. ⁸ Yaale ankookikhalela essariya ari wakhiviru. Tupani n'hala okaatja. Nivuwe noonane ntthu ninkhwaawe. Tupani npheela okivaanhiha. Akaattamenle. ⁹ Nkawehani, Apwiya anaahala okikhavihera. Tupani n'hala okoothenrya. Nkawehani, ooteenetjinhu n'naahala ophyaakatja phanka mwala. ¹⁰ Tupani wanhu noova Apwiya. Tupani niiwenla ntjuu naApwiiyaawe. Tupani wanhu neetta mwiipiphini hirina nthuko. Yena haana aakhuluvelaka Apwiya ni onkhuluvela Muluku. ¹¹ Nkawehani, ooteene nhu n'nopaha mooro, n'nowara tjoowaratjinhu, mweettaka n'mooroniwinhu ni n'malimini apahaleenhu. Yeela phin'haleenhu waakhela ohoolowaka: Nhu n'nohala orupa nipuro noonhakulatjiya.