¹ Nkiiwe, nhu n'nowehaweha essariya, nhu n'naarweela Apwiya. N'mwehe mwala yooyo wunpeliyeenhu, vaava wakumihiyeenhu. ² Mun'mwehe Abraao, thumwaninhu, ni Sara, ooyaraleni. Wamwiihanalyaaka aari veekha. Kaahonreeriha ni kaahomwintjiviha. ³ Khweeli, anaahala on'maaliha Siao; ayena anaahala olipihatja mapuro ooteene oohiloka; onkookhala othakwaa phanka Eden; nphantte wowuuma nphantte womwaamuro Jordao, phanka ematta yaApwiya. Otteeliya noohakalala on'hala ophwanhiya mon'mo, miteko tjomahala ni nintjuu tjotjipo. ⁴ Nkiiweehe, atthwaaka, nkiiwe, atthwaaka! Kontha kinaahala ohimyatja ekettelwaaka yossariya enkookhala phanka nthuko nlaponi. ⁵ Essariyaaka eri wakhiviru, woopwaawaka onaahala owa, monwaaka onaahala olamula nlaponi; elapo tjoottayi tjinaahala wanriiha, mwaha wowoopolawaka. ⁶ N'welihe meethweenhu wiirimu ni n'wehe elapo yovathi. Erimu tjinaahala otthawa phanka mwiissi, etthaya enaahala othaalatja phanka ekuwo, ni atthu anaahala okhwa phanka ephenpele. Massi woopwaawaka onaahala okhala woohimala ni essariyaaka khin'mala. ⁷ Nkiiwe, nhu n'notjuwela ekhweeli, nhu nrina ekettelwaaka wanrimaniwinhu. N'hoove oruwaniya naatthu, wala n'hikhala ootteetthya mwaha wooveehiya niyaayo. ⁸ Kontha ayena anaahala okwanhulatjiya phanka tjinthaala ekuwo, noorimeela; massi essariyaaka khin'malatho ni woopolawaka, wolapo tjooteene. ⁹ Sontte, sontte, Apwiya n'nikhavihere! Phanka mahuku okhalayi, phanka makhoto avirale. Khan'nakhala nhu mwan'hassarale Raabe ehanassi yonpahari, mwiivale ehanassi. ¹⁰ Khan'nakhala nhu mun'mihale epahari, maatji mentji, mwaatthukulale nttala npahari wiira yoomoliya avire. ¹¹ Owoopoliya naApwiya anaahala ohokoleela oSiao ni an'hala okela niitjipo tjootteeliya woohimala anaahala waatthapela; otthapa nootteeliya anaahala ophwanha, otjukulatja ni wunla onaahala omala. ¹² Mi, phuule noolipihera. Essiyani omoovaka ntthu n'hala okhwa, asaana apinaatamu, ankhala phanka malassi. ¹³ Essiyani waaliyalaka Apwiya, awunpaleni, yunpale erimu niitthaya. Nihuku nooteene onkhala owoova mwaha wantthu apheelaka wookwanhula. Orussiya wantthuuyo ori vayi. ¹⁴ Akhala ntthu ootthukeliya Apwiya anaahala waakuvatja okontthukula. Yena khan'hala okhwa wala okela n'mahiye, wala khin'hala onvola etala. ¹⁵ Kontha mi Kaapwiya, Mulukweenhu, antjika epahari wowiira mawinpi yiipe Apwiya phintjinanaya. ¹⁶ Kiheessa moolumwaaka mwaanomwaa ni kihookhuneela nintthuutji nontatanaka; kihunpa erimu, kihunpa etthaya ni kihomwiirela Siao: Nhu mwaatthwaaka. ¹⁷ Nkavuwa, Jerusalem, onvurya n'matatani mwaApwiya, ephwanhero woorussiyawaya; n'vuryaka, npakha ohapaliya. ¹⁸ Khaavo, mwaana n'motjaaya muunuwihalyaaya, wala n'motjaaya oweettihera. Waassaana ooteene awuunuwihalyaaya, khaavo naakussa nmatatani. ¹⁹ Mikatjamiho tjoomiili tjihookhumenla; tupani n'hala owunliha. Otthawiya nookwanhulatjiya, etala niikatana. Tupani n'hala woomaaliha. ²⁰ Assaanaa ahossirikha; ayena anaamorela khula nttala, phanka enama muntthavini; ayena onowaatjara tjowaarussa Apwiya, otthukeliya wa Mulukwaaya. ²¹ Vano, wiiweehe, we onkhala oohapaliya, woohikhala nipha: ²² Apwiya ,ulukwaa anaakiha mwaha tjaatthu aniira tjo: N'kaweha kinaakumiha yootakhala n'matataniwa, orussiyawaka wowiira ohivuryetho. ²³ Kinaahala waakussa n'matatanimwaka, yaale yaawiirela: Orupe, neette watjuluwaa; yaakhalihale erutthwaa ´phanka etthaya ninttala, wiira aweette watjulu.